Hayashi 囡仔夢

<< Hayashi 囡仔夢>>

80冬矣，彼時ê風光奢颺

五層樓仔，人叫你是銀座之光

Hayashi，彼時ê溫度，人來人去熱鬧滾滾

koh一擺現佇目頭前

搡開大門，いらっしゃいませ，鑿入阮ê心槽

頭殼內湧來湧去，開始搬記錄片

目睭是連接現在佮過去ê隔界

頂樓ê とりい，是毋是猶原徛挺挺保護這片土地

土跤ê色緻無變，咖啡色外牆煞淡薄仔變淺

彼跤我買ê壁櫥猶原在，花色無歲月ê拖磨

只是我已經是一ê連路攏行袂在ê おばさん

滿面全皺痕

笑笑講有人是倯，戴草笠仔，穿淺拖仔，坐流籠

阮是轉祖厝，毋koh厝毋是厝--ah

阮只是一ê外國來ê觀光客

お父さん 佮 お母さん ê 心血，佇歷史當中化做烏有

回想兒時記憶

目屎叫起阮共同ê生命經驗

飛龍機佇耳空內拍箍踅，目睭看不時飛彈逐過來的形影

掩崁心內ê驚惶，一步一步行去

銃子掃射無情，牆壁銃空猶原流出血…

雖罔重新裝潢，猶原有洗袂清ê血跡

我聽見每一位壁角有細漢tshit-迌ê笑聲

Hayashi，已經毋是阮ê土地，阮ê家

佇とりい前，將過去放下

祝福，請伊繼續守護新主人

Hayashi，ありがとうございます，さよなら

註：とりい (To-ri-i )：鳥居，為日本神社建築物

2014/11/30