Góa m̄-sī koo-toaⁿ chit ê lâng / 我毋是孤單一个人

鄭兒玉牧師今（11）日下午4點55分驚傳去逝。（翻攝自 台灣教會公報）

<< Góa m̄-sī koo-toaⁿ chit ê lâng / 我毋是孤單一个人 >>

彼日，遠遠聽見兄弟姐妹咧唱彼條歌

Hit-ji̍t, hn̄g-hn̄g thiaⁿ-kìⁿ hiaⁿ-tī- chí-mōe leh chhiùⁿ hit tiâu koa

歌詞內底充滿對土地兮寄望佮信念

Koa-sû lāi-té chhiong-boán tùi thó͘-tē ê kià-bāng kap sìn-liām

這是我第一擺聽見屬於台灣兮心聲

Che-sī góa tē-it-pái thiaⁿ-kìⁿ sio̍k-î Tâi-oân ê sim-siaⁿ

原來做家己ê主人，是hiah-nih-á 自然

Goân-lâi chò ka-kī ê chú-lâng sī hiah-nih-á chū-jiân

解放嚨喉ê束縛，大聲唱出對國家對土地ê主張

kái-hòng nâ-âu ê sok- pa̍k, tōa-siaⁿ chhiùⁿ chhut tùi kok-ka tùi thó͘-tē ê chú-tiuⁿ

是hiah-nih-á 感動ê代誌

Sī hiah-nih-á kám-tōng ê tāi-chì

原來我毋是孤單一个人

Goân-lâi góa m̄-sī koo-toaⁿ chit ê lâng

推捒母語ê芳

Thui-sak bú-gí ê phang

我毋是孤單一个人

Góa m̄-sī koo-toaⁿ chit ê lâng

是你chhōa阮出帆

Sī lí chhōa gún chhut phâng

海翁宣言兮寄望

Hái-ang suan-giân ê kià-bāng

這毋是做眠夢，嘛毋是空

Che m̄-sī chò bîn-bāng, mā m̄-sī khang

彼年，我開始走揣母語

Hit-nî, góa khai-sí cháu-chhōe bú-gí

熟似推sak白話字ê你

se̍k-sāi thui-sak Pe̍k-Ōe-jī ê lí

我chiah知影母親ê聲是有魂有體ê

Góa chiah chai-iáⁿ bú-chhin ê siaⁿ sī ū hûn ū thé ê

你笑笑講推sak白話字是你上大ê享受

Lí chhiò-chhiò kóng thui sak Pe̍k-Ōe-jī sī lí siōng tōa ê hiáng-siū

講母語是咱做主人上基本ê權力

kóng bú-gí sī lán chò chú-lâng siōng ki-pún ê khoân-lek

脫離殖民者ê束縛佮思想

Thoat-lī si̍t-bîn chiá ê sok-pa̍k kap su-sióng

行佇台語文學習ê路頂

Kiâⁿ tī Tâi-gí-bûn ha̍k si̍p ê lō͘-téng

原來我毋是孤單一个人

Goân-lâi góa m̄-sī koo-toaⁿ chit ê lâng

你叫阮跤踏實地每事項

Lí kiò gún kha ta̍h si̍t tē múi sū-hāng

逐項著攏愛照起工

ta̍k-hāng tio̍h lóng ài chiàu-khí-kang

幼芷樹栽愛定沃

Iù-chíⁿ chhiū-chai ài tiāⁿ ak

大漢才會生媠閣紅

Tōa-hàn chiah-ē seⁿ súi koh âng

母語捷講捷推捒

Bú-gí chia̍t kóng chia̍t thui-sak

殖民體制一定崩

si̍t-bîn thé-chè it-tēng pang

我毋是孤單一个人

Góa m̄-sī koo-toaⁿ chit ê lâng

兄弟姐妹來鬥紡

Hiaⁿ-tī-chí-mōe lâi tàu pháng

挵破彼咧大統一兮甕

Lòng phòa hit leh tōa thóng-it ê àng

台灣意識來起航

Tâi-oân ì-sek lâi khí-hâng

我毋是孤單一个人

Góa m̄-sī koo-toaⁿ chit ê lâng

是你，予我了解我是一位台灣人

Sī lí, hō͘góa liáu-kái góa sī chit ūi Tâi-oân lâng