賴清德，請支持母語教育

圖來源

<<賴清德，請支持母語教育>>

政治人物操作族群問題m̄是第一擺--ah。11月29日後未來是m̄是ē-sái改變，本土意識是m̄是ē-sái來 提懸(kuân)，ài靠逐家ê智慧。

Tī tsiah，先mài講族群，來講語言保存問題。前一陣『巨蛋』號名問題，koh有台語文教課必修變選修問題tse lóng是對語言一種傷害 (註)。Lú過去親像國民黨thún-踏台灣語(台語，客語，原住民語各族語言)，tī 學校內講tō ài  罰錢，禁止台語，連歌-á，布袋戲lóng ài改講北京語。現準來觀察，有guā濟人會hiáng kap 厝內tī 序大講輾轉(liàn-tńg) ê母語？ Hām講tō buē 曉是beh án-tsuánn保存文化，做傳承？Nā-bô，只是膨風水雞刣無肉(Phòng-hong tsuí-ke thâi bô bah. )。

一ê政府是ài做文化，母語教學ê火車頭，濟濟bô仝款ê文化才會當激出koh kah suí ê文藝創造，提昇lán lâng本身文化素質。可惜政府suah來直直來逼壓，家己母語是台語ê政治人員，推sak無力，koh講彼-lo 烏魯木齊ê理論，親像講母語是一種可恥，bô需要浪費時間學--ê。

潘維剛講台灣話會傷害民族情感，是傷著siánn lâng ê情感？Tse只put過是漸統化獨思想niā-niā，對待台灣話是下等語言，台灣lâng是被殖民ê下等lâng。可惜六七十年洗腦，iu-guân bô覺醒。家己土地文化，歷史lú buē講-tit，四界lóng是有中國毒素ê敗害。

雖罔政治人物對待語言án-ne，put-jî-kò，ná到選舉就開始講台語kah客語，講i是台灣人。選後，tō親像糞埽(pùn-sò)仝款擲(tàn)去邊--á，尤其是彼款目頭懸(kuân)ê『高級外省人』。悲哀-- la, Tsit 時台灣lâng才成是主lâng，put過是目睭濁濁(lô-lô)看buē清，頭殼鈍鈍想buē明，gōng-gōng- khám-khám做lâng ê傀儡尪仔(ka-lé ang-á)。

Koh再討論國民黨過去ê罪孽koh有現準時ê政策，tse已經是有喙tshoh khah bô瀾 (nuā)。除非國民黨全全hōo i崩盤，bô, 台灣語言發展早已經是欲死但唉 (beh-sí-tōng-hāinn)。

Hōo我siōng艱苦傷心ê是台南市市長賴清德tī 舊年講2014年推動英文是第二官方語言。前幾日21號koh再講beh推sak英語，而且十年內tō會完成，hōo新一代市民ē-tàng用英文交流。 這m̄ kah刣死母語ê兇手意思仝款？我m̄是反對講英語來實現國際化。問題是賴清德根本是頭尾掠倒吊，kám講賴神buē記家己母語是台語，選舉huah khah大細聲kah民眾跋(pua̍h)感情時講ê話是台語，講sánn-mih釘根生根tī 府城…等等。別人欺負咱bô夠，你賴神mā beh來參一kha才有夠khuì？

過去中國黨政府利用官方ê威權去壓迫母親ê語言，tann換你？你有才調本事做到tsit ê位，suah雄雄buē-kì-tit家己叫sánn？有才調推sak英文，ná會bô法度來為台語教育讚聲？這m̄是天地倒反(tò-píng)？規氣你現準開始全部lóng講英文，以身做則。Nā-bô，tse只是kah國民黨政府仝款謀殺台灣文化，本土ê認同。

用家己ê母語建構出家己ê生活，才是生活。用家己ê母語建構家己ê價值，才是價值。母語是 siōng堅定ê武器，致使hōo lán家己成就有尊嚴有自信ê民族。

Tann 你tō buē徛(khiā)穩，就siáu beh行出國際，這kah國民黨直直講拚經濟有siánn差別？ia̍h是看家己看家己bô，見笑？

賴市長連任機會 tsiânn懸(kuân)，請相挺家己母親ê語言。台南是台語文推sak運動上興ê所在。假使賴神mā是bô要bô緊，i喙直講台文，tse變成一ê笑話而已。

台語可能有一工會完完全全來消滅，put過賴清德市長推sak英文，suah bô推sak台文ê歷史痕跡會永遠留hōo後lâng憢疑(giâu-gî) i ê正確性，ia̍h是錯誤。

註：

台語文ê消滅

爭取台灣語文教育權tī 11/29日

台語工具冊：華語揣台語

<<台語工具冊：華語揣台語>>

Góa是自細漢tō講母語--ah。Uì舊年底開始來寫台語詩，一開始有影是烏白寫。想起siáⁿ tō寫siáⁿ，無禁無忌，Siōng重要ê是走揣台文ê記憶，母語ê芳。Góa m̄是欲來討論如何寫一首詩，現準góa iá bô夠格。Góa是beh徛tī初學者ê角度來分享兼紹介工具。

Góa ê作法是m̄管你beh寫詩，散文，先kā你beh寫意境寫落來。有寡字揣bô台語，揣bô台語正字…等等。Lóng先想辨法記落來，put管用華語，英語，羅馬字lóng好，siōng重要ê是mài hō你ê思考斷斷去。一旦斷去，beh揣轉來，有當時是可能ài “kà早睏kà有眠“，看有法度koh再想起。

基礎穩固拍hō在，事事項項照步來，十年功夫袂凊彩，出國比賽等出師。這四句聯送 hō͘ ta̍k-ke來參考，lán道理免傷講，ta̍k-ke知知--lah。

不而過--ah，siáⁿ是基礎？Góa撿兩點來講，基礎就是你使用ê用字正確性，言詞ê變化運用。

用字正確性可能有寡學派性深度ê討論，一般來講，是建議初學者用台語信望愛，白話字台語文網站閣教育部線頂ê字典來學習。將進前m̄ bat ê字拍入華文iá是羅馬字就ē-sái查出台文ê寫法講法。一開始一篇文章可能愛開足濟時間，不過這是一定ài行ê路。教育部建議ê 700字是chiâⁿ 好ê開始。Sūn-sòa學羅馬字，當然--la，本人是建議寫教會版羅馬字。內底差別，lán免tī chia討論。

 

言詞ê變化就難查--lo。Ná是beh查對應ê言詞，chia̍p-chia̍p kan-na揣著一個答案，甚至是無。佳哉--la，台語文前輩白聆老師拍拚十二冬出一本冊。所以今á日最後就是beh紹介chit本工具冊<<華語揣台語>>。Chit本冊內底有七千ê華語言詞，對應ê台語詞soah有一萬八千ê，che m̄是代表台語變化奇巧，kà súi，kà有文學發展。Chit本冊m̄-bián一擺讀hō͘完，就算你讀了，bô用mā是加了工。Ná是有m̄ bat ê詞才來揣，有用才會有印象，後擺ē-sài來活用。Án- nī，beh寫詩，散文內底ê言詞變化致使文學性提懸，讀者讀起來mābōe感覺無鹹無纖(bô-kiâm-bô-siam )，白汫（chiáⁿ）無味。

2014/11/23

爭取台灣語文教育權tī 11/29日

圖片來源：民報

前排右起楊承翰（鳳山）、劉哲宇（旗鼓鹽）、黃若桓（左楠）、陳信諭。後右起蔣偉文、張復聚等十大本土社團（記者陳俊廷攝）

<<爭取台灣語文教育權tī 11/29日>>

進前tī民報有用台羅字寫一篇<<台語文ê消滅>>，講起來是悲哀--lah。

除了民報，因為讀者數量ê關係，我相信目前四大報是m̄可能，mā m̄願意來發實體文稿。Tī tsia，感謝民報ê相挺，替台語文來tsàn聲。

昨日，一寡南部本土社團大聲放送11/29日將票投hōo支持台灣語教育ê候選人。是--lah，無挺in，bô是beh挺siánn lâng？彼leh馬英九m̄是siōng ài食台語ê 豆腐，平時bô推sak，koh直直利用政權力量來逼壓。致使主人家己ê聲，m̄敢huah出來，若huah出來顛倒ē歹勢，ē感覺見笑？！這bô tio̍h是中國黨in一貫ê作法。消滅其它文化kah歷史，保障in ê聲勢，建立殖民者至高無上ê威權。有影，欲選舉時落兩三句台語，客語，跋（pua̍h)一下仔感情，suah講kah不三不四，顛顛倒倒。“馬到（kàu）--ah“講成“馬倒（tó）--ah“，笑死了人下頦（ē-hâi）。袂曉講，m̄是伊m̄ tio̍h，是伊主人霸權ê 心態。今仔日，我hiah-ní高貴，雖bóng beh來giú票kah你tsia下等lâng講話，mā ài參兩三句--ah。真正是頇顢（han-bān）koh興喋（thih）。

轉來看現準政府機關，有原住民委員會，客家委員會，siánn-ná bô台語委員會？tsia ê 委員會lóng ē-sài辦理相關母語認證，suah台語認證ài靠教育部。教育部ê態度是koh如何？前教育部長蔣偉寧講好beh講本土語言khǹg入國中必修課程，suah下一任吳思華做部長，天地倒反，必修變選修。

教咱序小母語是天公地道ê代誌，現準政府連必選一節課攏beh搶koh刣價，這m̄是侵門踏戶，bô是sánn？北京語一禮拜上六至七節課，這kám ē siunn過hàm-kóo？Koh有潘維剛即款lâng講ài統一文字語言，國家才會來發展。tsit款殖民者霸權思想操作，tī 2014年原在，台灣人iáu-guân hōo lâng壓迫，看輕，講台語是bô水準--ē，tō ài hōo外來者洗腦管制，這m̄是悲哀，m̄是sánn？

到底siánn是這片土地ê主人？m̄管你是講台語，講客話，排灣，布農，阿美，魯凱族，撒奇萊族語等等，lín tsia  ê 人比hia大聲beh用北京語thún-ta̍h強暴ê人，kám m̄是siōng有資格講你是主人？用家己ê母語建構出家己ê生活，才是生活。用家己ê母語建構家己ê價值，才是價值。

Buē 來失志ê 是佇支持台灣教育ê候選人內底，有寡比我koh kah少年ê一輩，實在是使人感動。Bat tī高雄參加過基進側翼幾擺活動，in全場lóng盡量用台語來發表政見，雖bóng有當時會來摻幾句仔北京話，m̄ koh這是tsiok bô簡單ê代誌。看目前政治台仔頂，有幾仔人ē-tàng用一點鐘ê時間，全程用母語演講？一隻手算tō算完--ah。ná無本身來做起，欲推sak是如何進一步--leh？講母語，這是siōng ē-tàng感動人ê心肝，siōng suí ê聲音。少年出頭有較茈(tsínn)，精神喟力感動天。講世代交替，iáu是轉型ê正義lông好，希望有in少年仔出頭替咱台灣koh再來釘根。11/29日將一票tǹg hōo支持台灣教育，愛台灣本土文化ê人。