北極熊ê未來，咱人ê尾路

圖來源Kerstin Langenberger Photography  

https://www.facebook.com/kerstin.langenberger.photography

心情koh 沉重起來，chiâⁿ chē tāi-chì kap lán想ê差大碼。不管tī chit ê島嶼á是看che世界。想未來ê路想kah心驚驚， ē-tàng做ê kám kan-taⁿ有影顧好家己？無m̄-tio̍h，顧好家己是siōng低ê要求。總—是，顧好家己kán ē是 kan-taⁿ 犧牲別人，大食細，人食人ê做法？

看chē-chē人gia̍h香綴拜，人講siáⁿ lóng無經過思考、反省，koh當作家己是一个 chiūⁿ-kioh ê評論者，khiā tī社會ê siōng懸層級，替hia láu-á 剝削弱勢，人食人ê面腔koh ē激kah真文雅，hiah-nī-á自然。Che lóng是講為tio̍h生存，有影悲哀。

Lán看核能爭議mā是，明明lán chit ê孤島無本錢kap人poa̍h，koh lóng無核災應變ê才調[1]，hām今年歐洲火燒湧造成核電廠ài關廠關機[2]，chi̍t大堆人ē-tàng kā chia ê事實當作無khoàiⁿ。Nā是有影地球piang--去，in kám有影khah khùiⁿ-oa̍h？

看歐洲ê溫度jú來jú koân，chi̍t隻北極熊phō i ê kiáⁿ 坐tī chi̍t塊細細角á ê冰目神gāng-gāng看四kho͘圍á ê大海。I是m̄是leh想環境ná ē變做chit款？Leh想i ê kiáⁿ兒beh án-chóaⁿ 過？I ê kiáⁿ是m̄是ē-tàng看出pē-bú ê無ta-ôa？In應該iau足久ah hoⁿ？看chit張相片看kah心肝頭真thiàⁿ。

Lán soah hām chi̍t kóa正義、公平ê tāi-chì lóng bú bē出來。

Ka-tī想想leh lóng是lán ê教育出chiâⁿ大ê問題，m̄-nā tòe bē tio̍h時代koh chi̍t kóa毒素長久以來leh thāu lán ê心魂。無知覺，是beh án-chóaⁿ有救贖？看北極熊ê困境kám無法度看見lán ê未來？

---

[1] 立法院公報第103卷 第35期 第17頁。「9,000 個化學兵，108件 A 級防護衣…」。https://lis.ly.gov.tw/lgcgi/lypdftxt?10303501%3B0223%3B0278 。

[2] 歐洲熱浪 海溫過高迫使核電廠降載、停機。https://e-info.org.tw/node/213321

烏玫瑰

烏玫瑰

是我想袂開 才通陷佇愛情的是非

分開的週年 閣佇心內留你的空位

你送的玫瑰 猶閣會開蕊

你送的手指 閣佇阮身邊

為何你無看見 chhun阮孤人斷相思

講愛是無理 才通墜落情愛的陷阱

分開的週年 閣塊計算你我的婚期

作伙的日子 已經變慣勢

難忘的記持 煞喝欲走味

為何你無聽見chhun阮孤人珠淚滴

無人的海墘 海風陪我吐喟

頭頂的天星 袂記來閃熠

是我毋願醒 是我刁故意

毋甘願承認你得著愛情的勝利

無人的海墘 海湧洗我心悲

孤人的觸纏（tak-tîⁿ）害我欲無喟絲

是我毋願醒 是我想袂開

假影毋知影你得著愛得的勝利

你送的玫瑰 猶閣會開蕊

愈開愈媠 彼是變種的烏玫瑰

2018/8/2

*悼cammy Ng，1 位香港cha-bó͘ gín-á，i來台灣朋友請我chhōa i chhit-thô，tē 1 pái kah我見面（2012？），tō kā我tháu心事，lán 人mā kā i tàu khui-phòa, siáng知tńg去香港了後，i tō燒火炭自殺。我知ê時，已經是3個月後。Hiông-hiông，想起chit ê人，che thang講是i ê心情（？）。

大聲叫咱的名--台灣

大聲叫咱的名--台灣

一句「政治hoān政治，體育hoān體育…」，一刀敢to ē-tàng切斷政治的關係？無hoah出家己ê名，中國tō袂koh壓逼台灣？濟濟答案lóng thang uì過去ê歷史來得tio̍h答案。Uì 1996年ê臺海危機開始算，koh有大大細細非政府組織（NGO）交流hőng拆斥，親像世界衛生組織（WHO）要求世界醫師會改名，koh有連提中華民國護照攏袂使入聯合國大樓參觀，算算咧敢有較少。咱實在m̄-thang假做無看（khuàinn）， á是m̄願看清。

中國一冬比一冬軟塗深骨，利用手段要求國際航空公司共「中華民國（ROC）」、「台灣」ê名提掉，數想beh消滅世界對台灣ê認知，好thang認為台灣是中國ê一部份，咱kám 好koh講「維持現狀」，無要無緊來看待？前幾日，台中市beh舉辦頭屆東亞青年運動會，去hōo中國使漚步來取消，一部份人憢疑是目前民間beh爭取東京奧運正名公投ê活動來刺激tio̍h中國，tsiah有tsit款ê結果。Tse lóng是 hánn人ê白賊話。自來中國ê打壓lóng無khah少，無論是用中華民國、中華台北á是台灣ê名，顛倒是咱愈m̄敢kā家己ê名huah出來，in愈會kā lán食夠夠！

名字，敢hiah重要？中華民國、中華台北kám有影ē-tàng代表台灣？

名字是一種認同，mā是對這土地ê認同。自流亡政權中國國民黨來台，著阻止台灣人建立屬於家己台灣意識，佇二二八事件後掃除任何對黨國政權不利ê精英，致使咱ê教育無台灣主體性，歷史全是中國四千冬虛構ê故事，莫怪到今有寡人iá是車輦旗gia̍h懸懸m̄甘放，莫怪到今國民黨koh不時牽親引戚，自願做中國牽猴仔，出賣晟養in ê台灣，親像白蟻，一喙一喙beh吐食台灣每一寸土地。國民黨講ê「中華民國」á是「中華台北」，khîng-si̍t mā是無存在--ê，國民黨講ê拆白講就是「統一」，做「中國人」。2017年世界民主指數台灣排第33名，中國排第139名 （美國：21；日本：23），民主素養差大碼，這是beh怎麼ē合？濟濟中國官員攏送in囝兒出國讀冊，提外國護照做外國人，有人suah beh kā台灣ê未來賣去獨裁ê國度，家己顛倒繼續享受台灣ê福利！咱ài知咱nā無出聲做家己ê主人，無人會來共你koo-tsiânn，無人會看有目地，佇台灣統一思想的聲音定著會硩過民主獨力的聲嗽。

台灣政治替換是值驕傲的代誌，總--是，這無代表國民黨袂koh再執政，無代表中國牽猴仔會停止出賣台灣ê代誌。一時ê政治交替無才調kā過去ê不公不義齊齊改變，這無定是現實，任何台灣人mā無可能走閃一場koh一場政治局，beh聚集認同這猶原閣有tsiânn大ê空間。蔡政府如果無法度好好面對中國相連紲ê打壓，位實際政策kap行動來增加咱對台灣的認同，增加獨裁抗體，m̄-nā年底選舉會有崩盤，對台灣ê未來huān-sè會有tsiânn大ê副作用。蔡英文「維持現狀」ê口號，m̄-nā中國bē giàn接受，恐驚koh針對目前局勢無幫tsān，mā是leh huah心酸--ê。

軍公教年金改革

l   軍公教年金改革

逐家應該量約攏thang感受一寡經濟ê壓力，月給起無siánn，物價suah直直起，穡頭無好tshuē，社會制度koh無siánn改善，面對未來感覺茫茫渺渺！Mā tō經濟ê in-tuann，一寡少年人m̄敢結婚、生gín-á，未來人口直直勼，社會勞動人數無khah進展，經濟惡性輪迴，造成世代不公平ê所在。

拆白講，tō是後一代少數人來趁錢hōo頂一代來開，頂一代有可能免做siánn tō領比目前退休ê人濟。若koh-khah不幸，頂一代錢lóng領了，suah破產，後一代所繳ê suah領袂tio̍h。所致，有人tsiah leh講「散赤老人」tsit ê詞，khang-khuè會做到死，愈做愈散赤，食老退休金領無guā濟來維持生活。

Uì經濟ê角度來看，思考過去年金制度[1]，進行轉型，追求khah公平正義ê社會，tse khah是符合目前社會現狀siōng逼切的代誌。

講ná leh講，lán ài sing理解目前社會保險、退休ê制度 kah過去改革ê過程[2][3][4]。

咱lia̍h勞工退休舊新制來看，親像計算方式免佇仝一間公司、提撥方式、kah改做個人專戶預防公司走路tō lóng差真濟，tsit ê過程是thìng-hó理解為siánn-mih ài改革。

社會保險kah年金制度百百種，面對無仝ê職業，有無仝ê法條，親像公保、勞保kah農保，退休金算法年資、基數kah月給基礎lóng無仝。Mê-kak tō是tī遮，軍公教kah一般勞工、農民是無仝--ê！內底siōng hōo人討論--ê tō是18%利息定期方案，mā是tsit kái軍公教ê重點。

Án-tsuánn講leh，一般人勞工來講退休有至少兩筆錢ē-sái領tō是勞保kah勞退，勞保是有保險ê概念tī內底，根據你投保ê薪水kah年資來計算[5]。軍公教佇1995年退休基金tsiah成立，iā tō是講1995年進前退休ê，kan-tann領18% niâ。 A̍h nā 1995以後退休--ê a̍h是koh teh做khang-khuè--ê，m̄-nā「公保」kah「年金」lia̍h外 koh比一般人加 18%定存[6]，án-ne你想 kám公平？Koh-khah hàm--ê，國民黨黨職thang算入去公務人員年資！所致，tsit kái ê改革決定欲hōo 18%逐冬減少，落尾完全取消[7]。Tse mā khah合公平正義，減少好額散ê精差，社會kah國家ê運作tsiah thang khah正常。

閣再講，任何khang-khuè lóng是值人尊存--ê，kán to̍h講軍公教tō khah高尚，ài領人khah濟？

Tse mā是可能造成台灣中下階級買袂起厝ê in-tuann，所致，房地產業者tsiah huah講軍公教改革會造成房產市草sue-bué。

Tann目前蔡英文針對軍公教年金seng做改革，sui-bóng內容無lán想ê hiah「理想」。比例來講，18%無應該koh等6冬tsiah完成取消，koh有國營銀行員工13％優待存款雖bóng mā是分六冬逐冬減少，不而過閣留6%，tse有影會hőng提來比較，mā hőng感覺iû-guân無公平。總--是，有足大ê進步啊。未來相信mā ê針對其它議題tshan-tshiūnn稅法來改革，我想tse是值人期待ê tāi-chì。蔡總統講「勞工是i心內siōng tì-ì --ê」，lán mā kan-tann ē-sái樂觀kah繼續觀察。

2018/6/25-26

---

[1] 年金改革 建構永續的年金制度

[2] 勞退舊制與新制之差異 ；2005年7/1/新制上路。

[3] 勞退舊制這5件事 一定要搞懂

[4] 行政院於2015.10.29通過「勞工退休金條例」修正草案，明定採勞退新制的勞工，在年滿60歲、年資滿15年後，可以自由選擇「一次領」或「月領」。

[5] 勞保年金uì 2009/1/1開始。

[6] Wiki：「1990年-1996年，中華民國第八任總統（李登輝）任期中，明訂民國84年之後「新」任職的軍公教人員，停止適用十八％優惠存款利率，是為十八％優惠存款的第一次重大改革。」 所致，1995以後ê軍公教你是leh反改革反火大--ê？

[7] 「2017年6月27日立法院臨時會三讀通過《公務人員退休資遣撫卹法》（該法適用公務人員，非軍教人員）」；「2018年6月20日軍人年金改革法案「陸海空軍軍官士官服役條例」20日由立法院臨時會三讀通過，實施日期由行政院定之。」

《下流老人》kah《續-下流老人》心得

《下流老人》kah《續-下流老人》che 2本冊是1 ê日本人寫--ê，kah我平歲！

Che lóng thang去kah lán chìn-chêng看社會議題ê冊比較，lóng是sio牽連--ê。
世代散鄉、無公平、好額散精差…等等。

內底ê內容真符合目前ê社會變化，人口老化，退休金機制koh好額散精差khah koân ê問題。
問題ê本質是siáⁿ？（3*5 why, 1 H 5W）

老ê時beh án-chóaⁿ生活chiah thang有尊嚴 kah幸福？Siáⁿ-mih 生活chiah是有尊嚴？幸福？有健康koh有文化ê生活？

老--a，錢儉有夠無？破病欲án-chóaⁿ？退休金ē-tàng領gōa chē chiah thang維持生活？

個人án-chóaⁿ做，保險規劃、理財計劃、維持健康、提koân工作收入…che lán lóng知知。欲án-chóaⁿ做，kah為siáⁿ-mih che mā是lán結婚前tō開始leh想ah。總--是，che m̄是1-2 ê思考niâ，koh是ài兼行動--ê。何況，環境是leh不時leh變。

內底有一ê足重要ê觀念，tō是 ài phah破「無夠骨力、無夠phah-piàⁿ」ê歧視，因為長期無健全ê制度來造成。所致，lán ài去理解，去討論，參與改變，未來chiah ē koh-khah好，mā thang走閃連回ê困境。Tō是講lán所tú ê散鄉m̄是lán個人ê問題，是社會制度koh無kàu cha̍p-chn̂g。Che mā thang參考《階級世代》、《貧困世代》kah《窮忙》2 本冊。《貧困世代》mā 有點tio̍h社會制度無公平。Che 3本是美國人寫--ê，che lán知影chia ê問題khêng-si̍t是全球lóng差不多有--ê。《下流老人》內底有講tio̍h歐洲福利制度khah好，是有影，不而過，國內ê中層階級是kán kah beh死，問題mā是chi̍t大堆。


第2集內底有講tio̍h工作ê部份，che以lán ê工作內容lóng khah óa代工ē造成lán ê功夫 1 冬比1冬lám，iā tō是講nā beh換頭路月給tō無可能kah人 hoah價。Beh重新來受訓練koh ài開chiâⁿ chē時間 kah成本。Iā tō是講lán平日時tio̍h ài做寡教育投資，m̄是畢業了tō來停止學習。公司、政府無hō͘ lán，lán tio̍h ài khah巴結leh。Siōng khah ài去致意--ê，mài去停止熟似目前科技、新資訊ê變化。


以下主要是ùi制度來看。Ài seng理解目前社會ê運作，chiah thang面對。無--者，時到tō koh講「早知影…」，「無想tio̍h…」。

內底有chiâⁿ chē思考，mā thang去理解目前lán台灣一寡社會福利制度（勞保、健保（醫療、長期照顧？）、生kiáⁿ補助、保障siōng 低月給…稅法改革/財富重新分配）、年金制度（勞退、退撫）需要改變ê所在。 Che mā thang好面對未來。是án-chóaⁿ好額人愈來愈好額，是án-chóaⁿ後chi̍t代人ē活khah真艱苦，是siáⁿ-mih ê生活條件？Kah以前有siáⁿ無仝？頂懸所講ê福利制度教育、醫療、長期照顧、khiā家…等等，無應該傷過頭hŏng看做「商品」，無論好額散應該lóng ài有「權利」享受chiah tio̍h。

Chit本冊mā是有chiâⁿ chē數字kō͘社會科學、統計ê角度來看，現tú現，事實tō是tī眼前。

冊內底chi̍t開始tō tiám-tù「散鄉」有3 ê原因「月給少、儉少 kah社交少」。

Che 3 ê指標lán the̍h來用，心soah tiuh--chi̍t-ē，過去好li kai-chài，pē-bó，hō͘ lán健康ê身體，無欠債koh有chiâⁿ好ê教育…taⁿ lán chiah thang kah人有thang pí-phēng。不二過，lán mā bē-tàng當作未來tō ē 繼續án-ne lo̍h去。


Taⁿ目前蔡英文針對軍公教年金seng做改革，sui-bóng內容無lán想ê hiah「積極」，總是，有足大ê進步。未來相信mā ê針對其它議題chhan-chhiūⁿ稅法來改革，我想che是值人期待ê tāi-chì。「勞工是i心內siōng tì-ì --ê，」lán mā kan-taⁿ ē-sái樂觀kah支持niâ，無，lán tō hoān-sè ài做khang-khòe做kàu死 mā kāng-khoán散赤。是講，工作敢有夠穩定，che koh是個人siōng逼切ê問題。

《終結平庸》心得

《終結平庸》

美國人寫--ê，無chìn-chêng hit種chiâⁿ chē論述，不過mā 有chiâⁿ chē case來說明一般人 無影比「上等」人khah bái ê可能性。

Che tō牽涉lán一般人ê眼界lóng hō͘「 平均」ê觀念ín-chhōa，造成lán看個人時soah看無目地，khêng-si̍t，lán lóng hō͘「 平均」ê教育，標準化ê流程縛死死。平均是siáⁿ，he tek-khak是某種範圍來定義--ê，a̍h tō是講he kah lán ê生活可能差大碼--leh。不過，lán lóng soah一直用chit種觀念來看chiâⁿ chē tāi-chì，lán ê考試方式、教育，chhōe頭路kah學習tō是án-ne。

Che mā是chit本冊主要beh講ê，lán m̄-thang放棄，lán tiāⁿ-tio̍h有其它所在 á是目前chit款ê教育環境無適合lán niâ，lán tiāⁿ-tio̍h ài chhē出lán ê thian-po͘。 （定位）

內底mā有講一般工廠標準化ê需求，如果lán nā sioⁿ要求個人，che可能暫時對lán ê kè-e̍k有幫chān，總--是，長期以來無影對公司好。

Koh另外1 ê角度來看教育，kā每1ê學生lóng教kah仝款ê程度是m̄是lán ê目標？Chhan-chhiūⁿ工廠án-ne。

Nā以統計來看，beh算tiāⁿ-tio̍h ài有chiok chē chiok chē ê資料來說明，lán ài知用「中位數」來看有時koh-khah有代表性mā khah準。比如講政治láu-á講台灣平均月給超過5萬，lán tiāⁿ-tio̍h ài有khah科學性ê解度來解破che數字kha-chiah-phiaⁿ 無合理ê所在。

針對學習，因為時代變遷自主學習thang走閃過標準化ê教育，mā thang àn照lán家己ê速度來學習，koh thang chhē tio̍h家己ê興趣，chhē tio̍h 屬於ka-tī ê路。 Che siōng重要ê是，ài了解ka-tī。 Che mā有講tio̍h教育成本ê問題，名校khah有影khah好？Che mā 是《不讀名校，人生更好》bat講過--ê。

是講目前大部份ê公司、人lóng是看名、學歷，beh想kah ta̍k-ke lóng仝款 koh ài khah好，éng-éng相對上mā khah有利。總--是，che對社會、國家、個人無影有好處。

冊最後講ài起造1 ê「 平等ê機會」是ài有符合適合ka-tī ê環境，seng了解個人ê差別，chiah來論平均，減少精差，án-ne koh有「平等」，講平均mā khah有意義。

濁水溪語拼音調查表

先解釋--一-下，濁水溪語？有人講台語是閩南語、貉佬話、貉獠話、河洛話、和樂話、鶴佬話.，我想逐家sian-kak （鉎角）lóng 對創作有熱情，我mā beh來號一个「轟動武林，驚動萬教」ê 名。 XD

濁水溪語，真在地、天然siōng好。濁水溪變清hit日 tō是母語出頭ê時、溪ta語死人亡！

Lán ē-kha是針對最近koh有人leh討論用字，lán真無ài講che，第一是lán資質淺，學識無夠。二--者是lán時間iú限，beh魚 mā ài蝦，1粒頭2粒大leh渡生活kah saⁿ-tǹg。

是講，lán lóng是thīn母語ê人，mài論大細老chíⁿ，互相ŏ͘-ián是tiāⁿ-tio̍h ài--ê。

總--是，該反省檢討ê mā tio̍h ài。面皮bōe hiah 薄m̄聽人1 支chhùi，kha-chhng半天懸，chún是放一个屁，thong人hoah真芳。

Lán是需要理性ê討論lah，nā是óa靠多數霸權leh kā 壓，kah國民黨有siáⁿ無仝？

Lán hoân-nā tú-tio̍h反對羅馬字ê人，chiah問in ē-kha ê問題。

我/lán mā thèng-hó思考語言kah文字ê關係。Mā好理解toh 1條路khah是lán應該ài kiâⁿ ê路，m̄是聽人烏白tàu，竹篙插馬頭。


（歡迎增補）

Q1：Lín目前電腦漢字是án-chóaⁿ phah出來--ê？

Q2：延續Q 1 ，lín是使用 ㄅㄆㄇ ？

Q3：延續Q 2 ，所致，你支持ㄅㄆㄇ拼音？Che kám ē是lín 反對羅馬字ê 理由？

Q4：延續Q 2，如果是ㄅㄆㄇ拼音，he kám是中文音，m̄是正港台語音？

Q5：延續Q 2，選擇ㄅㄆㄇ拼音，是因為較緊？

Q6：延續Q 5，選擇ㄅㄆㄇ拼音，免koh學習羅馬字拼音？減少壓力？

Q7：你ê認知羅馬字m̄是字，kan-taⁿ拼音niâ？

Q8：延續Q 4，不管toh chi̍t種輸入法，橫直人看有tō好？

Q9：你kám捌讀過台語冊？（不管是toh 1種用字。）

Q10：你感覺目前台語作家是用toh 1種輸入法？

Q11：你感覺針對tú開始學字ê gín-á toh 1種 khah簡單？ㄅㄆㄇ拼音、羅馬字拼音。

Q12：延續Q11，nā是你來學toh 1種 khah簡單？ㄅㄆㄇ拼音、羅馬字拼音。

Q13：延續Q12，不管toh 1 種，你kám捌寫過超過5000字ê文章？

Q14：延續Q11，你感覺toh 1種khah適合外國人。

Q15：你kám捌試唸別人ê文章？感覺toh 1 種khah好？

Q16：延續Q15，你ê鼻聲、嚨喉聲、入聲khah輕聲kám有無去？

Q17：延續Q16，你kám知影我leh講siáⁿ？

Q18：你平常時寫（fb）台文khah濟á是中文/北京語？

Q19：延續Q18，nā是中文，原因是beh hō͘ koh-khah濟人來學？

Q20：延續Q19，nā是án-ne你為siáⁿ-mih無愛寫台文，ka-tī做模範？久久一篇mā好。