懶魚醉貓e烏白寫: 予台語文園區ê建議

2017年10月4日星期三

予台語文園區ê建議

咱真歡喜彰化縣chhōa頭成立台語文園區，總--是，無正規教育ê體制，欲利用縣市政府ê資源，咱欲達成siáⁿ-mih款ê目標？過去民間ê母語運動已經辨gōa濟活動，出版，才thang hō͘台語文kàu taⁿ koh leh喘喟。是講，看目前台語ê困境並無因為政權ê替換，看會著有khah好ê未來。咱身為1个台語人，真驚nā 園區ê業務nā無突破性ê chhui-sak，che園區落尾mā是變成空殼niâ。無--chiá，100个委員，100个台語文園區lóng無效。

推廣？A̍h是單純保護台語文ê史料？Á是lóng有？目標是siáⁿ？咱真向望hia籌備處委員ē-tàng想hō͘ chim-chiok，mā愛先對台語ê教育kap歷史ài有寡了解chiah tio̍h。為著「母語」成立「保護」園區，歷史ê觀點來看，這是殖民霸權siōng好ê干證。Nā是kō͘轉型正義ê觀點，咱tō愛kā歷史拆予白，講hō͘清楚，才thang看清咱對台語文復興ê願景是sáⁿ？台語猶未成做「死語」，這園區無必要mā無應該成為「紀念館」，極加是1座緊急ê救護站niâ。總--是，咱猶原愛kā彰化縣政府chhōa-thâu成立保護園區ê勇氣phah-pho̍k-á，是講，這敢有法調吸引一般民眾kap政治人物ê重視？在我看來，佔大數人ê台語族群恐驚無才調佇hông邊緣化ê命運--lih抽退。

咱佇chia幾个建議，向望縣長kap台語文園區ê委員參考：

第一：承認所有母語是官方語言。例：前台南市市長賴清德推sak英文成做官方語言，並且提出十年計畫。（註1）

第二：官方文件愛有母語書寫，至少愛有台、客語言。Che m̄-nā幫助文字標準化，咱mā會極加確定政府欲搶救母語ê堅心，koh thang幫chān文字標準化。Siōng好ê例是2016年3月25日<選舉公報並列羅馬拼音>一案立法院三讀通--過。（註2）

第三：地方文學獎設立母語組，包括詩、散文kap小說。Siōng好ê例就是台南文學獎。高雄kap苗栗逐冬mā有 (kan-taⁿ 有現代詩組)，台中mā是chit 2年才開始。文學獎ê設立是欲hō͘ koh-khah濟人來書寫母語，母語書寫ê多元性kap文學性有絕對ê幫chān。

第四：官府辨文學雜誌。母語出版冊大概5成以上是個人出版，m̄-nā因為閱讀市草冷冷，koh是閱讀人口相對濟少ê因素，通常了錢ê khah濟。為欲鼓舞創作，所致，愛有相對ê出版機關才tio̍h。目前有leh接受台語文投稿ê單位1隻手算會--出-來。其中台南市《臺江臺語文學》是官方提錢出版ùi 2012年開始kan-taⁿ已經5冬，算是頭例。