到底siáng出賣台灣？

<<到底siáng出賣台灣？>>

Kā chit 本冊<<被出賣e台灣>>(2014年版本)讀了後，有兩ê點心得，第一是台灣無法度獨立ê原因，第二是到底是siánn出賣台灣。是講chit本冊500 guā頁，chit時欲寫可能mā buē-tàng講khak chiok chiâu-ûn，若是無chiâu-ûn ê所在，望以後koh再補。

首先以美國ê角度來看kap整理一寡時間空間因素造成台灣無法度chiânn作一ê國家，koh有 lán 對“出賣“chit ê詞所指ê對象來討論。

Ē-té lán 提出三點來看美國因素部份：

第一，完全無了解台灣。美國驚台灣hō͘ 日本統治50冬，會khah為日本人，suah顛倒翻頭hō͘ 日本戰贏ê機會，所以戰術上支持蔣仔臭頭，ǹg-bāng i ē-sái來做寡tāi-chì，tàu-sio-thīn。

無了解受日本統治下ê台灣kap中國生活，教育，知識差別。無了解台灣在地民族ê多元性，叫是黃皮膚烏目仁--ê，lóng講“華語“--ê，tō是kāng族(國族，m̄是民族)。支那(chi-ná) tō是代表全部。真珠港事變後，chiah開始leh收集台灣相關資料。等in開始了解蔣仔ê人，顛倒suah驚惶i kap日本合作造成戰事一直拖沙，所致tō盡量滿足蔣仔ê援助。蔣仔suah kā資源一直uì台灣盡piànn送去支那國。不止將台灣當作是財庫，美國mā kāng-khuán。等美國仔了解時，mā無力koh插ah。

第二，中國內部戰勢不明，美國將蔣臭頭當作是chit粒活棋，koh驚i停止加入戰爭，suah將台灣送做hō͘中國國民黨(指開羅宣言，put-jî-kò，m̄是正式國際法，mā無簽約)，美國無閒chhih-chhih，無心情管去台灣人民是m̄是願意hō͘中國國民黨來統治。而且mā無hō͘台灣人有時間來決定是m̄是欲kap chiah 對岸來ê唐山仔chiânn做chit ê國家。甚至是對in來空思夢想欲拍轉去對岸。

第三，美國總統羅斯福死亡。過去阿本仔講台灣是『沉boē落ê航空母艦』，美國對是台灣生做圓ia̍h-sī扁lóng無知。Chiah會tī真珠港hō 拍khah m̄知死(1941年)。尾--ah，戰後過了mā是kāng-khuán。羅斯福總統來死亡，杜魯門接手(1945年)，hit當時國內mā ǹg-bāng khah緊結束戰爭，所致，中國台灣事項tiō koh kha無想欲來插。別人囝死boē了，chit句話講i tùi-tâng tùi-tâng。總--是，若無影響        tio̍h in ê利益，mài giâ-kê，m̄免siuⁿ考慮--ah。

以上是uì二戰期間ê背景來看。Ah- ná戰後ê因素以後有閒koh chiah來補充。

Ē-té lán有幾點是uì台灣來看--ê：

台灣因素

第一，長期殖民控制，心理無正常。Che是歷史ê悲哀，四佰年，相連suà hō͘六ê政權來thún-ta̍h。老爸叫siánn-mih名，        tō lóng m̄知。看現此時，西拉雅族(siraya)ê正名運動koh一撇tō無。Che 一切造成了民族性長期心理迫壓，sui-bóng過去有一寡反抗，put-jî-kò，無法度真正chàm破殖民力量，顛倒是元氣大傷。甚至kàu戰後，二二八白色恐怖屠殺，中國國民黨一直教育洗腦，歷史，地理，母語，文化…等等來將“台灣本土化“壓落地，致使目前台灣人對家己ê土地，過去無了解，無法來釘根，無認同家己生長ê土地。中國國民黨是拍輸人ê外來政權，流亡政府，逃命來到台灣，食，toà kap 穿lóng tī 台灣，甚至面對對面中共來ê官員時，家己國家ê旗仔suah ài收起來，m̄ kánn來見光，buē-su人ê sin-pū-á kāng-khuán。過去反攻大陸，現準suah大聲huah ta̍k-ke lóng是親兄弟siōng知己，西瓜oá 大pîng，家己kap人和解，suah欲將lán台灣人全全送hō͘人繼續做二等公民。Kha有潘維鋼chit kho͘ 人講『推sak母語是傷害民族情感』，食台灣米suah uì後壁phí-siùⁿ台灣話，i ê 民族只有“大中國“。借問i kā圖博當作是kāng族？前幾工tī歷史課程調整上訴，法院判教育部敗訴，部長吳思華竟然koh講繼續照新ê課程行，che kám合理？Che sī你kap我，lán koh活tī殖民時代siōng好ê證明。語言leh，必選變選修，叫ta̍k-ke tī厝內kap父母學，是講學語言ài ē-hiáu聽，講，寫，讀，父母kám有法度教？m̄-thang sak chiah e責任hō͘人民掩蓋殖民洗腦ê企圖，世人看現現--ê-ah。

第二，對“大中國“ê錯誤siáu想。叫是hiah uì 中國來ê是來解救台灣人脫離日本人長期來ê控制。一開始面對hia穿草鞋，規身軀衫褲phòa-kô͘-kô͘，hām銅仔鼎kuà lóng phāiⁿ--leh，bōe輸leh 逃命kāng-khuán，台灣人suah起giâu-gî。一開始，in接收日本官廳，後來連私人ê厝宅看kap意tō lóng規碗phâng--去。尾á，實在是bô-chhàu-bô-siâu，chiah有1947年ê二二八事件。證明雙方ê認知認同是有chiânn大ê差別。Uì中國來--ê，認知台灣人是日本人ê走狗，phí-siùⁿ台灣人，自頭到尾認為台灣只是in暫時ê遮風遮雨ê所在。甚至kàu今仔日，郝伯村koh leh講皇民ê詞。總--是，家己tī台灣toà hiah 濟冬，iu-guân對台灣無認同，也iu-guân看輕台灣人。Hit時局勢混亂，臭頭仔可能mā按算好好，若是ko͘-put-lî-chiong kap共產黨拍輸，siōng無koh有台灣hō͘ i來倚靠，心內tia̍k算盤，急欲kap美國英國先chhiâu利益ê分配(開羅宣言)。美國仔mā驚蔣仔suān去kap阿本仔合作，chiah會來kap蔣仔開hiah ê條件。開羅宣言chhan-chhiūnn菜市仔huah價，無國際法規定，拍贏ê國家來分財產。蔣仔臭頭食軟飯，出chit支喙，徛懸山看馬相thâi，koh後尾kap好額人宋姓家族來結緣，經濟上chiah有法度來舞政治，現準koh kā i當作神來看待。Lán來想看māi連戰in tau 好額kàu世界排名第1911位，是全世界第一位政治人物排有名--ê。Koh uì 中國黨chit兩冬來看林益世，賴素如，柯朝欽，卓伯源，還有劉政鴻…chiah ê人烏西食錢，成就個人資產，che m̄是現在進行leh出賣台灣？顏銘緯chit ê少年仔提chit本冊去khian馬英九，che m̄是tú-tú-á好niā-niā？政治方面m̄是mā一直oá中國，lán大部份ê人kám有比過去khah清醒？Chit 本冊所講ê 過去kap現此時來比，台灣永遠是殖民喙內ê chit塊肉。“國民黨無倒，台灣boē好“chit ê口號，應該ài比阿門 kap Oo-mí-tôo-hu̍t khah 捷唸才對，才ē-tàng洗清脫離體內支那毒素。Siuⁿ 激動？Kám 會？

現代有『高級外省人』ê郭冠英，chit 款思考是in hiah國民黨政權來tō 有ê。陳儀tī第一屆參議會會議了後說台灣人是下等落伍ê人，m̄值hō͘ 叫做中國人。Hit時參議員郭國基khia出來說台灣人有革命理念kap精神，台灣人管理台灣人是應當ê義務。當然，lán m̄是欲分化“台灣人“，任何認同台灣人ê人有推sak台灣民主自由ê人lóng是台灣人，不管i是本底khiā tī chiah ia̍h-sī無。Lán koh 想看māi--ê，現準馬政府ná ē一直欲將台灣sak出去賣leh？Chiânn做chit ê買賣利益政權，是為siánn來拍算？未來nā-sī koh有一本“被出賣ê台灣“出冊，in ê 故事hông寫入去，我看mā是合該然。

未來如何chiânn作chit ê國家？第三勢力？

郭國基講台灣人ài武裝起來，保護台灣。Chit 句話nā-sī ē-sái來發生，可能tō boē有二二八事件，二二八雖然有寡武裝抗爭，總--是，台灣人siuⁿ過『善良』。將chit句話來看318社會運動(lán mài講318 kan-taⁿ是學生運動，sui-bóng主體是學生來推sak，尾仔是社會各層力量注入，已經m̄是只有學生ê聲音niā-niā，筆者mā是其中chit ê。)，kám是ài khah激烈ê？Uì 現準來看，馬政府kám有改變？有聽無做，是了然--ah，是政治chhuì-nuā。既然是抗爭，何必ài chiânn作 hiah“理性“？khiú線入場照排隊，散場了後ta̍k-ke相招khioh pùn-sò，che kám是運動ê重點？Koh一擺，lán m̄是欲批評，是作chit ê反思檢討，ǹg-bāng將來運動ê參考kap改進。甚至引起爭議來討論，huān-sè是件好事，án-ne做可能會有愈濟ê批評。Lán社會ê支持純度kám有kàu？因為社會ê支持度kap公民意識無法度chiânn作運動背後ê力量，che可能kap lán社會普遍價值觀siuⁿ過淺見。Iu-guân無法度團結，屎尿boē攪沙。民主自由意識kap價值無法度tī lán ê頭殼內釘根，只有等到tòng boē tiâu時，chiah來huah聲，通常mā boē 赴--ah。“武裝“chit ê詞可能mā ài隨時代來演變。Lán提過去鄭南榕kap詹益樺兩位先輩做例，in ê犧牲換來言論自由，che kám是chit種武裝？án-ne，現代武裝來對抗壓霸政權siōng好ê方式是siánn-mih？網路？知識kap論述能力？我想che可能lóng是基本ê，而且反對方甚至有霸權切掉網路來源kap政治政策，án-ne，武裝kám iáu sī武裝？欲贏ê機會kám有？koh有林義雄ê和平非暴力抗爭kap千里苦行kám是一種ê武裝？Guán所想欲講ê，m̄是欲拍觸衰(phah-tshik-sue)，應該ài來好好看過去ê歷史，認清家己，才boē koh重行冤枉路。Lán mā需要濟濟知識份子，各行各業ê人tàu讚聲。

到底是siánn出賣台灣？

到底是siánn出賣台灣，若是tī過去(不管戰前戰後)，guán個人主觀來看是美國。因為in為tio̍h個人ê利益suah用台灣來成做買賣。現準guán會感覺是活tī chit ê土地60偌冬koh m̄願接受台灣是chit ê國家ê人。

Lán 來看二二八事件發生進前，一陣少年仔(一陣hō͘ 當作共產黨ê人)寫hō͘ 美國國務卿馬歇爾將軍ê陳情書(p250)內底尾á有chit句話。『改革省政府siōng短ê路線tō是全心倚靠聯合國tī台灣ê聯合行政團隊，koh ài kap支那國斷絕政治，經濟ê往來幾ná冬。無--chiah，台灣Formosa寶島tō ê lóng總 hông盡piàⁿ了了。』落尾，美國mā是激gōng- gōng，管in siánn-mih tī-tāi ê心態。過無幾工了後，二二八事件tō來發生，接suà是白色恐怖koh欲38冬ê戒嚴。死ê死，關ê關，長期ê逼壓koh洗腦，kám會正常？Lán必需要承認he是無正常ê，認清事實，chiah有法度繼續討論求改善。『若是獨裁是事實，革命tō是義務』，欲革命進前，lán腹內ê中國毒素kám清好勢--ah，認清認同kāng一條路？Mā是hit句屎尿boē攪沙，台獨派系吵吵無停，lán抗爭中國國民黨kám會反盤？當然，chit寡論述是ài不斷辨論kap反思，lán kám願意接收別人ê看法？翻頭koh再檢視家己，是m̄是已經有法度chiânn作一位合格ê公民？是講，家己人無kāng主張，是án-chuánn kap人拍？過去廖文毅tō是欲建立台灣kap支那是分離ê歷史觀。Kàu-taⁿ，lán kám有chit種想法？Mài講政治，經濟，連民間宗教tō纏綴 boē了。Lán需要是思考ê洗盪，刺激koh實踐(si̍t-tsiān)。會使歡喜ê是目前愈來愈濟第三勢力出來比如講『基進側翼』kap『時代力量』che lóng是lán 未來ê希望。

美國對二二八事件ê態度是siánn款？Lán ē-sái看hit時領事館ê立場『che是兩ê中國團體ê不幸事件，美國人無道理來插，koh審理chit ê 省長kap in民眾ê糾紛。現準台灣屬於中國。』Chit 種ê講法是因為陳儀chiah ê人造謠編故事ia̍h-sī美國人m̄願koh加入事端？是講，hit時in應該了解支那人ê能力kap心態chiah對。Chuánn-iūnn當作無看無聽leh，che是guán台獨者心內ê oàn-chheh。Lán ài放sak對美國eǹg-bāng，因為只有利益交插ê時，美國人才會來插手。支那兵坐美國船來接收台灣，落尾，台灣人是ǹg-bāng美國人來接收，美國人m̄-thang走，結果leh？甚至到三月初開始ê大屠殺，台灣人chiah完全死心，狗去豬來chit ê詞代表ê是無奈koh是怨恨--ah。

Mā有人講是蔣中正，陳儀，柯遠芬，彭孟緝chiah ê人出賣台灣，一邊kap台灣人講和講條件一邊調兵仔來thâi台灣人。我想根本無出賣ê問題，因為in自頭到尾根本無kā台灣人當作是家己人，koh leh siáu想有一工欲拍轉去leh。別人相拍，台灣人只是犧牲品來祭拜niā-niā。Lán koh kā 目光ǹg hiòng舊年ê服貿事件，自由經濟示範區審查，che kám m̄ 是koh一種ê “買賣“？買ê是in hiah政客ê未來，賣ê是lán囝孫ê將來。根據舊年(2014年)統計來看，目前認為台灣kap中國無kāng ê比例是愈來愈kuân，心靈ê殖民解放是m̄是mā有成長？相信kap hit 時蔣渭川ê政治宣言是天差地leh。Khí-má，lán 欲切斷chit 條肚臍帶！

好，繼續tī二二八事件前後來看。Lán已經知影蔣臭頭無閒內戰，lóng將台灣物資送支那國。到1949年尾，一直印紙錢suah變成四萬換一箍銀，hit種悲慘經濟市場變化，番薯簽tō bô thang食！Koh有in ê軍火是tó位來ê？美國--mah。冊捌記綠過，有人捌看見槍頂懸寫『美國』兩字，hit時了解而且絕望美國來解救是無可能ê tāi-chì。Che美國人kám真正m̄知？

結論

過去siâng出賣台灣可能已經無重要，歷史今現在看出出--lah，siōng重要ê是如何脫離殖民狀態(解殖/反殖)koh來ê是心靈上ê解放。網路Facebook頂定定有看濟濟ê人leh論述，che lóng是一件好tāi-chì，不斷論述，不斷解放過去舊ê思想，che 才是chiânn作一位真正ê自由人ê過程。Che ê工課事是無法度來phiah-bián--ê。可能會引起爭議，che是正常--ê。吳睿人教授提起chit點，lán無應該kā人來創造神格化，che是阻止台灣行向民主化的路。柯文哲，賴清德，學運頭人，網路名人…等等並m̄是神，也m̄是ē-tàng chit人ê力量tō ē-sái解救殖民，ai靠ta̍k-ke ê力量。總--是，ài樂觀，生命是不斷粒積ê過程，答案mā tī行ê過程內走chhuē。今仔日開始，ǹg-bāng將阮(guán)變成作咱(lán)，che才是台灣ê希望kap未來。台灣人，加油！