<<帖á>>
彼日收著1張ùi台北寄來ê批，頂頭ê字我會認--chi̍t。心肝頭起滾絞，手起chhoah，有寡怨妒。講是批，其實1張喜帖--a。
想bōe到，伊iû-goân有照約束，寄來hō͘
我。分手六、七冬ah。彼時是咱koh是大學生，談戀愛是gōa-ná純情--ê。Hiông-hiông想起第1
pài約會chhōe你看poe-lêng-ki起飛，阮ê心跳chhan-chhiūⁿ
poe-lêng-ki起飛時，沖向天ê pān勢，tóng-tòng-tóng-tòng，強欲ùi胸khàm跳出來，m̄敢正面看你，chiâⁿ
sè-jī用目尾gán
1下，你ê笑容是我看過siōng
súi ê 1 幅圖，彼時才知變愛ná-ē hia-nih甜。雙手假無意順勢將你ê so͘ 腰攬抱，tī
poe-lêng-ki iân-jìn（引擎）聲推sak，勇氣十足，喙tú喙，原來he就是la-chi̍h ê滋味。到taⁿ，ia̍h-sī
hia-nih 甜，我頭殼有寡hîn。Ài- io，你欲嫁人ah。死鴨子硬喙phé，想欲講祝福soah吐bōe出1句1字，『日思夜夢，khah夢tō是你1人』，情傷難醫，有影chiâⁿ苦。Taⁿ，火燒ko͘-liâu，講有siáⁿ路用。
我暫時無拍算hia kín拍開，在來無心理準備，驚拍開了後看見你ê笑容。尤其是加1 ê cha-po͘人khiā
tī你身邊，拜託leh，初戀滋味鹹酸甜，m̄是放bōe開，心內ia̍h-sī有滿滿祝福ê話，總是心內…haih，phái
tháu lah。Siàu想將鬥陣ê回憶kian-tàng，期限無限制。講bóng講，想bóng想，現此時ê你，已經m̄是過去ê你，你曾經愛過ê
我，mā
m̄是現此時ê我。彼時咱lóng少年，單純soah無合現實社會ê模樣，人總是會成長。
想起彼ê約束，mā好笑。Lán分手有影是chiâⁿ理性。交往3冬，鬥陣ê模式其實已經是足熟似ah。Put-jî-kò，tī我欲畢業ê時彼此soah茫茫看無未來，驚惶心悶出社會後ê變化。Lán是差1年ê學長學妹關係，你知影我ài參與政治社會運動，我想你mā驚我總有1 kang 會舞出tāi-chì，
hō͘ 你來煩惱。你想ê是平穩ê日子，而且hit時我koh
tiû-tû beh出國讀冊。所致，chē-chē困擾kap因端才會行到分手ê
khám站，可能mā是lán對lán
ê感情無自信，haih，我mā無才調安你ê心。少年ê你我竟然ē-sái理性選擇分開，結束一段感情。顛倒約束講未來siáng嫁娶
tō ài寄帖á hō͘ 對方。以現準三不五時出現ê社會新聞來看，lán ê愛情學分有影有修了成功！
喜帖á是咱約束hō͘彼此祝福ê信號，kā對方通知1--ê，m̄管有欲來參加，心內絕對是百分之一百願意hō͘ 對方祝福。Sui-bōng，濟濟因緣斷了後，lóng無交插ah，朋友情原在，kám
m̄是？咱lóng了解這件代是講hō͘人解脫niâ。少年懵懂，愛情ê想像總是虛幻，加上lán教育是假道假義，害lán無知影mā無了解經營情感世界，chiah會tiāⁿ-tiāⁿ來受傷。 Lán只好笑說，拍斷手骨顛倒勇，無過去che經驗，lán人m̄知ka-tī有hia濟欠點，m̄知，欲如何改？
Ha，你ài感謝我ho͘h，心內put-li̍h-á臭屁，欲比較。無hit時ê我，你可能mā
袂有現在ê你。Ah，cha-po͘人
chhú 1 支喙niâ。確實我也為1段感情改了chiâⁿ
chē，he是為著你，愛情m̄管有無結果，過程總值人懷念，hō͘人成長。Sui-bōng
開chē年時間行出來，過去記持漸霧，我mā無才調lia̍h。是講lia̍h欲chhòng-sáⁿ，kám有khah
chóa？
提批彼支手是bōe chhoah-ah。將批拆開，你ê笑容有影koh是hiah-nih
sùi，我mā對你笑。看頂頭ê日期竟然是5冬前ê
11月24號，到底是郵便士舞têng-tâⁿ去，ia̍h-sī你tiau故意ê安排--ê？
總是你有守lán ê約束。
2015/5/16寫
2015/5/18
改
