<<Hi-lo 佮阿美>>
彼工，我心刁工掠坦橫。車to沓沓仔開走，Hi-lo煞覆佇 iân-jín-kuà。目睭仁烏烏內底chhan-chhiūⁿ 含目屎，欲流欲滴…
請你原諒--ah，Hi-lo！
佇體育場練走10公里，照慣例一定愛去食一碗牛肉湯配肉噪飯，補充體力。這工誠特別，因為Hi-lo e出現。Hi-lo是一隻我從來毋捌看過e狗，名是我號e。有人看狗烏著叫『小黑』，狗白to叫『小白』，無就是『皮皮』，lcuky…
我想人有菜市仔名，ham7狗仔嘛有菜市仔名，可憐e是狗仔無法度起來反對。不二過，伊嘛需要一段時間熟似了解你到底是咧叫啥。
Hi-lo
是英文Hero e意思。狗仔毛烏sim3-sim3 kha 發光，耳仔尖尖，尾仔翹懸懸無轉踅，看起來是誠純e台灣土狗仔！我頭殼內想起先住民朋友tsua狗去拍山豬e形影，足有霸氣。這就是我叫伊Hi-lo e原故。尾仔，我甲發現這隻狗是母e，莫怪無人掠！若是公e，凡勢佇即款hiah寒e天氣，to hong5 掠去定補。
我行過去牽車準備來轉，伊對我笑笑，搖尾仔。一下子to跳入機車跤踏坐leh！ 眼神親像leh共我講，”行kóng，無閣tshái佇hiah 創啥！”
Hngh!
當作我是計程車nih。
看一下錶仔，時間冗冗。騎車載伊去旁仔公園仔，想講看伊e反應。Hi-lo應該捌坐過車，看伊足享受風瀳過來e感覺。我煞想起細漢時陣小飛俠彼條歌。『飛啊，飛啊，小飛俠…』一落車，Hi-lo嘛誠歡喜，chhan-chhiūⁿ欲來第一擺旅行e囝仔。雄雄，一聲狗聲，然後兩聲，三聲…我看見頭前差不多有二三十隻野狗對阮衝來！局勢無啥偌好，無拄好，明仔載新聞報紙to報一人命一狗命死佇公園內底。
Hi-lo翹懸懸尾仔垂落來，倒反頭衝去跤踏仔，目神看我，袂輸講“緊凝--leh，阿娘-ôe“。我想，即隻狗嘛無啥會當保護主人，chhoa伊轉可能是加了米nia7-nia7。我將彼陣狗仔趕走，予in袂當接近Hi-lo。可能Hi-lo嘛看在眼內，想講chit e 人若會chiah 猛。尾溜開始恢覆伊活力，對我思奶共我唚。可能嘛共我會一下，日頭赤炎炎，隨人顧生命—lah。
詳細掠伊看，乖乖袂啥e共吠，嘛無皮膚病現象，應該無痟狗病。心內煞淡薄仔躇躊，可能想起過去細漢時予賊仔毒死彼隻烏仔。我用跤欲共伊搡，伊to是毋落去，煞用坐變用phak--lah！有一種死to是無愛走e趨勢。
敢是拄才食牛肉湯身軀有牛肉味，想講對tsit箍有通食，在你按怎趕，我就是毋走！看Hi-lo嘛是袂瘦，皮膚算是袂bái，頷頸頂無狗鍊仔，應該是無人飼，心頭按算一咧，若是無gâu吠，應該to好辨，厝壁隔壁較袂有問題，厝內人嘛免煩惱予人投。等一下欲去成功大學行一巡，無，先chhōa Hi-lo來踅踅-leh。
Hi-lo其實算大隻，我看袂出來伊幾歲。規e跤踏攏予伊佔去，ham7我e跤欲踏to困難。我足驚佇轉彎踅角時，無細膩，伊順勢飛出去。無閣，伊看起來免驚，閣將我e跤當作帎頭phak hia 睏。我想這到底是啥物情形！
Oeh,
人客ah到位--ah。我若親像司機，毋過我載e是一隻狗。
我停好車，Hi-lo若好笑神，看見成大e學生囡仔leh共弄，尾仔幌袂煞，人人歡喜to共摸頭陪伊chhit-thô，予伊物件食。學生囡仔當作我是伊e主人，彼當時煞雄雄感覺有淡薄仔風神，有hiah乖e狗仔，有人緣。
我開始煩惱，我真正欲共伊chhōa轉去飼？我欲去masaloft頂懸講代誌，差不多愛半點鐘。心裡按算，好，假使等仔落來，Hi-lo猶原閣佇chiah等我，親像電影演e忠犬小八，我to共伊chhōa轉來。假使無，我想以Hi-lo chiah溫純e狗仔性，有人抑是成大e學生凡勢to掠轉去飼，絕對比體育場hi 邊e環境較好。按怎，我嘛較放心。
等我落來時，Hi-lo已經無底看--loh。我拄才閣空思夢想講真正有忠犬小八e可能性，笑家己真正有譀古兼癮頭。行到牽車e所在，目睭tìnn大蕊，煞雄雄楞去，伊早佇車跤踏hiah
phak 好好咧等我！
好啦，先chhōa轉來一禮拜看覓--leh。不過，愛先去看一下醫生，若是有身，我無to替人chhōa 某兼飼囡仔！想想咧，嘛是驚驚。現實面，一個月chhū食e錢，開時間共in耍，洗盪，放屎尿…。Che心內一定愛有覺悟才是。
查某人e婦產科to無捌，閣無捌入去過。想袂到e是第一擺看婦產科是chhōa狗仔，若是護家聯盟這款無知識e團體看見，敢會講我對狗仔按怎。
hi位小姐嘛是穿佮病院護士欲仝欲仝，毋知影是毋是嘛愛叫伊護士抑是啥。我誠拍勢問店員，我想欲看Hi-lo是毋是有身，是毋是最近有性行為。護士小姐問我是不是第一擺來，閣提單仔予我填，問我佮Hi-lo e關係。無照鏡，我攏知我e面已經紅起來。毋知影，護士小姐有發現無，若有，伊一定感覺足怪奇。
足緊，to入去治療室，醫生交代共HI-lo抱起li佇台仔頂，一位查埔護士一手掠兩隻跤，to就Hi-lo扛起來，Hi-lo嘛誠乖，無吠嘛無咬人。醫生講欲照超音波，佇伊身軀抹青藍色e膏，開始檢查。醫生講目前是看起來是無，毋閣攏有一二禮拜e空縫檢查袂出來。問醫生，敢講無法度檢查Hi-lo最近有性行為無？醫生笑笑講無法，袂輸咧笑我咧講ham3古。Hngh，電影毋to是按ni演—e。
行夠這e坎站，to決心欲chhoa Hi-lo 轉去。伊看起來嘛誠歡喜，我揀幾罐仔狗仔罐頭，想欲予伊食一下粗飽。伊e喙瀾已經是㴙㴙滴。
我心內猶原有淡poh8仔顧慮，因為厝內人是毋是會來反對。
機車騎咧一直想，停紅青燈也想。雄雄發覺有人跟蹤我…
伊已經對我一陣仔，目神無啥和氣，親像看歹人仝款，想欲共我拆食落腹。我欲共瞪轉去，一定是機車後壁彼塊台灣獨立e擋塗板仔e原故。我調工騎入去巷仔口，放慢速度，聽候伊！
我停好車，伊果然對過來嘛停車，我手頭安全帽無放手，隨時欲來應戰。我想Hi-lo嘛是仝款，假使伊閣緊走去bih，我嘛袂怪伊，按今仔日透早經驗來看，我嘛料想會到。無打緊，交予我！
伊是一位歐巴嗓，停車好勢，無行ua來。一叫一聲“阿美，阿美…“。紲落來，我規e人煞軟跤。Hi-lo走若飛，跳去伊e胸坎！
這聲我完全了解，伊一定號做我偷牽狗。我共伊解釋一陣嘛共今仔日發生e代誌講予聽，ham拄才看醫生e放據予看，伊才相信我。
歐巴桑看出我失落e表情，講欲晚時相約佇體育場將Hi-lo交還伊，Hi-lo會使先chhoa7伊四界chit-tho5一下。
心內毋知影有一點仔失落感，現準時到底是欲叫伊Hi-lo抑是阿美咧。Hi-lo嘛足乖歐巴桑無叫伊行，伊嘛袂傱leh行。Hi-lo佇我身軀邊若走若跳，伊應該無知影暗時阮to欲來分開。
彼暝，我心刁工掠坦橫。車to沓沓仔開走，Hi-lo煞覆佇 iân-jín-kuà。目睭仁烏烏內底chhan-chhiūⁿ 含目屎，欲流欲滴…
請你原諒--ah，Hi-lo！
.JPG)
