台江浪詩--楊青矗先仔

2014/10/4 葉石濤文學館

<<台江浪詩--楊青矗先仔>>

今仔日去聽大師楊青矗先仔ê演講，題目是台江浪詩，以伊ê<<唐詩三百首>>這本冊選五首來分享。

先仔ê囡仔詩是我一開始自我學台文時接觸--ê。過去是佇圖書館借冊兼放伊ê CD讀，足心適。我所了解，佇台文教育用語音，提倡母語閣家己發明注意拼音予學校老師來教，伊應該是第一ê。

i 本身對台灣這份土地ê感情有深深ê愛，對國民黨無情對待台灣人是怨恨。先仔對母語ê推sak佇陳水扁做總統時，應該是有上大ê發揮。當然彼時阿扁做總統，伊可能嘛得阿扁ê支持，這是我佇讀伊ê冊內底時ê感覺。

一開始踏頭話，伊講起白色恐怖時，國民黨按怎欺壓台灣人，雄雄聲音有淡薄仔變低，目眶墘一滴目屎sûi落來，我確定hiah絕對不是單純ê流目油。可能伊家己想起予chiah可惡賊仔政府ê迫害

除了唸詩外，i 有講紹介府城七鯤鯓ê演變，四草，陸耳門港，烏水溝，講咱ê祖先可能攏是偷渡客…

話後我有幾個問題私底下向伊請教。(記憶有限，對話內容應該是無精差偌濟，日後想起，閣cha-來補充) 我足驚我ê問題是不適合ê，不禮貌--ê，過程中，心內是驚惶--ê，先仔可能之前中風過，身體無講蓋好。講tse，我有幾點對葉石濤文學館有幾點無siaⁿ爽快，日後才來講。先講問題內容。

Má-sa：老師ê冊是注音來發音，現此時是流行羅馬字，你ê看法是？

楊：我ê冊內底嘛有羅馬字對照注音拼音。學習者抑是老師攏會使參考來學習。

Má-sa：這可能是我疏忽。不而過，冊內底老師應該是以注音拼音做根本。

Má-sa：你講台灣文學是寫土地--ê，阮是毋是愛用台文來寫，比例講，漢羅濫糝寫？

楊：以文字來講，只要是寫土地--ê，就是台灣文學。毋管你是用日文，英文，漢文(我：應該指華文，漢已經毋是一種民族，是一ê集合名詞)，有寫台灣ê土地情感，歷史，文化，hiah攏是台灣文學。親像吳濁流戰前戰後，攏是用日文寫足濟，伊ê物件嘛是台灣文學。(真可惜，無加問落去，台文正字問題，寡台文，確實是無字，致使有ê學者，家己創新字。我想欲加問是毋是會造成困擾？敢講老師同意漢文佮注音濫糝作伙寫？ )

Má-sa：毋過你寫ê小說是用華文(北京語)，對語言部份，你按怎解釋，有啥看法？

楊：這看人在行習慣用ê語言矣。

Má-sa：按呢，用華文寫，無用台語文寫，讀ê人是用北京話ê思考方式來看待，漸漸台語嘛是死。

楊：這平常就愛講台語--ah。學校教育嘛愛教…

Má-sa：教育這主要愛靠政府--ah

楊：政府就無效--lì，過去我就是按呢，我不服，所以我才來編一套chiah ê冊。