台語文ê消滅

<<台語文ê消滅>>

台語文ê是m̄是會ta̍uh-ta̍uh-á消滅看四周圍ê朋友講話，電視節目，甚至是網路就會知知。身為台灣人，台文就是我ê母語，看見án-ne，煞有tām-po̍h-á悲哀。

為何最近捷運『巨蛋站』ê台語講法會提起來講？到尾，煞變做中文，台文佮客文攏唸仝款，kah奇！Tse m̄是hōo平常時少少講母語ê人，當做台文無美感，無文學(pún-tsiânn泛指台語，客語佮濟濟原住民語，tī chiah咱先指台語)，叫是台語是有限制--ê。當然啦，台語有文，白音，我無反對講用 kī-tàn來唸，因為這是合理--ah，mā是上簡單ê方式，只要大家ē-tàng來接受。不而過--ah，m̄捌受過台語教育ê人可能當作是uá靠北京語，煞，用伊個人本位主義，扭曲殖民者ê語言，認為台文無膏，無夠suí氣，認為台語干焦是一種"方言"，限制足濟，袂輸綴北京語烏白唸仝款。其實m̄是án-ne。那是欲追--leh問，為何是中文先講，後來是台文，英文…然後是其它ê語言--leh，siánn是前siánn是後，為siánn-mih m̄是台文先講？這m̄是ka-kī先看輕ka-kī？

過去台文學者杜建坊佇2011-7-28佇網誌就提出「圓拱埕」uân-kong-tiânn ê講法，而且是有所本--ê。好奇ê是，捷運公司到底是去問佗一位台文專家？台文界無算大，應該是攏熟似--ê。是ka-kī無才調ia̍h-sī貧惰？koh有面冊朋友葉慈提出「圓舞台」ê講法。敢講有較bái聽？台文敢有影對人袂tio̍h？抑是ka-kī無自信，是過去殖民教育khau洗，現今煞背骨笑ka-kī母親ê話？

政府推sak 母語ê責任，是無法度來閃避- - ê。台南市市長賴清德佇舊年講2014年推動英文是第二官方語言，這mā是怪奇，對台文是欲佇tī -tah？那看無伊開始講英文？雖罔賴市長演說攏台文無問題，伊敢會寫台文，台羅文章？有siánn推sak台文ê教育政策？敢講無知影台南市ê台文教育人才數目是全國第一--ê。有比其它地區hiah好ê環境提倡台文，煞gōng-gōng tàn佇hiah放草生菇！今仔日，準講賴市長出門攏講北京語，伊有法度會當佇府城繼續做市長？相信伊知影，台文對伊來講是siōng強，siōng堅定ê武器。

前教育部長蔣偉寧本底答應佇國中課程規定ài修台文課，煞換吳思華了後顛倒跳票。講siánn-mih無合課程方向，hōo學生仔加愈濟選擇ê機會。照tsit款思考，為何規氣佮國文(北京語)課變選修，m̄是較好？為何欺負ka-kī ê母語。siōng合理ê想法就是殖民者消減弱勢語言者發聲ê機會。雖罔攏是講好聽話，你若是欲修課，袂kā你阻擋，煞m̄知影佇台灣tsit ê病態教育方針下，學習敢是自由--矣？若是以民族ê角度看，無政府相thíng kah幫贊，無疑誤，無是欲放hōo倒，放hōo死絕。

落尾，向望政府可能是了然--矣，行入街頭抗爭是早晚ê代誌。向望民報未來mā會使支持用台文書寫， sì-kè來放送，tse kap是一ê多元，開放ê平台。