Kap lú-tông-sū ê
pì-bi̍t
Hit
chiah ka-choa̍h hiông-hiông chông chhut lâi. Î-cheng kiaⁿ kah peh khit lih í-á
tōa siaⁿ ai.
「Beh án-chóaⁿ?」
Góa
bô-ì-bô-ì kóng:「phah hō͘ sí ah.」
「Ǎ-ah, i koh hiah sè-chiah neh.」
「Bô leh?Kám kóng lí beh kā chhī nih? Chhī
khah pûi leh chiah kā thâi sí?Chhan-chhiūⁿ lán tùi-thāi hia sì-kha cheng-siⁿ?Án-ne
khah chho͘-chhân neh, 1 kha hō͘ lo̍h khah kui-khì lah.」
「Nā sī ē-tàng ê ōe, góa ē án-ne chò. In-ūi I
koh m̄-chai che sè-kài ê bí-hó.」
「Bí-hó? Ka-choa̍h kám ū ba̍k-chiu thang
khòaⁿ? I m̄-sī khò hiah 2 ki chhiu lâi kám-èng khoân-kéng ê piàn-hòa?」
「Ū o͘h, i ê ba̍k-chiu kài lī-hāi,ē-tàng
khòaⁿ 360 tō͘ neh, tī o͘-àm ê só͘-chāi mā ē-sái siu-chi̍p kng-chú ê chu-sìn lâi
hêng-tōng neh.」
「Bô ah, lí sī tī toh-ūi chai-iáⁿ che--è?」
「Góa chin koan-sim tē-kiû jīm-hô 1 chióng
seng-bu̍t ah, lóng ē khì liáu-kái in ê seng-oa̍h hong-sek. Bô chhiūⁿ lí kan-taⁿ
siōⁿ beh kā in thâi sí.」
「Bô, góa lia̍h khit lâi hō͘ lí chhī hó ah.
Sī kóng lí beh chhī i siáⁿ? Jî-chhiáⁿ lí ài khó-lū in niû-si̍t phòe-kip ê
būn-tê? Lí nā bô sî-kan ê ōe, i kám ē iau-sí.」
「Che lí hòng-sim, i bô chiah mā koh ē oa̍h
liáu chiâⁿ hó. Chiū sǹg lí kā thâu liàm tiāu i chì-chió koh ē oa̍h 9 kang kah
sí. Ka-choa̍h tī khióng-liông sî-tāi tō oa̍h kàu chit-má.」
Góa
si̍t-chāi bô siōⁿ beh koh thó-lūn lo̍h-khì. Siōⁿ tio̍h gún chiah jīn-chin leh
tâm-lūn ài chhiò ā ài chhiò. Che phàng sī Iûⁿ-á-chheⁿ ê lóng ū ê te̍k-teng.Tùi
tāi-chì lóng chin jīn-chin khòaⁿ-thāi, chò-lâng sioⁿ kòe giâm-siok.
「Góa kóng kóng--è niâ, kín kā thâi--sí,bô i tō beh cháu khì bih ah.」
Sì-kè
chhiau-chhōe hit chiah ka-choa̍h ê iáⁿ-jiah. Siòng hó hó 1 kha kā làm--lo̍h-khì.
「Hó, hō͘ lí chai-iáⁿ góa ê-á chhēng kúi hō è！」
「Phah！Sí--ah」Ka-choa̍h lâu thng koh lâu chiap
khòaⁿ lâi sī tōa pak-tó͘ ê khóaⁿ.
Î-cheng
iōng hit lō m̄ chai sī seng-bu̍t ha̍k-ka ê gán-sîn á sī hit lō hu̍t-chó͘ kiù-sè
ê chêng-hoâi lâi khòaⁿ góa ê hêng-ûi, ū-iáⁿ chho͘-chhân！
「Mài koài--góa, góa sī siū lâng chí-sī--ê.」Góa án-ne tùi ka-choa̍h kóng.
Góa leh
khang siōⁿ hoān-sè ka-choa̍h ê lêng-hûn tī thiⁿ-téng leh chhiò.
「Gún chit cho̍k koh thang thòaⁿ chiok kú è.
Khòaⁿ lín jîn-lūi koh thang hiau-pai gōa kú！」
Góa
hoâi-gî lí chin-chiàⁿ siōⁿ beh chhī ka-choa̍h neh. Tō chhan-chhiūⁿ lán chit-má
ê koan-hē kāng-khoán.
「Góa bô ài chhap lí ah！」Tō
án-ne Î-cheng lâu 1 kù ōe, pàng góa kap hit chiah ka-choa̍h ê si-thé.
Î-cheng
bô tiuⁿ-tî ùi góa kha-chiah-phiaⁿ pa--lo̍h-khì,góa chiah chai he sī 1
ê bāng. Put-kò, ū-iáⁿ i kiò góa khah kín chhú-lí i toh-kha ka-choa̍h ê si-thé.
Hāi góa 1 sî hun bē cheng hiān-si̍t kap hi-hoàn.
「He m̄ tō sí ah, lí ka-tī chhú-lí-lí to hó
ah.」
I óa
lâi góa ê hīⁿ-khang-piⁿ bî-bî-á chhiò.
「Pài-thok lah. Lēng kang chiah pò-siông lí
lah. Lí chai ê lah.」
Góa
si̍t-chāi bô hoat-tō͘ lím-siū i sai-nai ê siâⁿ-lāng. Góa chhan-chhiūⁿ hit chiah
ka-choa̍h mā thang chiap-siu i sin-khu múi 1 lia̍p sè-pau ê tiô-thiàu, koh thàu-lâu
1 chiòng chiok te̍k-sû ê phang-bī kap góa bī kah m̄-chai tang-lâm-sai-pak. Góa chai-chai
i ê àm-sī. Chóng-sī, khòaⁿ tio̍h hit chiah ka-choa̍h ū chi̍t-tiám-á put-an.
Pō͘-peng
gún lóng bē khì mn̄g tùi-hong ka-têng ê tāi-chì. Góa í-keng siōⁿ bē khit-lâi sī
án-chóaⁿ tàu chò-hóe ah. Tī chêng-kám ê sè-kài bô siáⁿ tāi-chì kóng ē cheng-chhó
ê.
Sī kóng
khòaⁿ tio̍h hit chiah ka-choa̍h kap hit ê kî-koài ê bāng, góa khai-sí kám-kak
góa bē-su sī Î-cheng chhī ê 1 chiah ka-choa̍h. Tē 3 chiá ê tē-ūi sī chiok pháiⁿ
chām tn̄g è, bē-su sī thâi bē sí ê ka-choa̍h, múi 1 chiah lóng sûi-sî ē hông
hi-seng, sí liáu koh sûi koh oa̍h khit lâi.
Góa
thâu-khak lāi ti̍t-ti̍t tiong-hok Î-cheng kóng beh chhī ka-choa̍h ê bīn-iông
kap kiò góa kín kā thâi sí ê chhùi-hêng. Thau-chia̍h eng-kai ài khì gián-kiú
ka-choa̍h seng-oa̍h ê tiat-ha̍k chiah sī.
2017/7/16
siá, tī hóe-chhia téng
2017/7/26
tēng kó
