陳定南ê母語角度

咱koh ùi 權力ê角度來看「教育發展」kap「文化政策」，佇逐家包括政治lâu-á leh hoah「正義轉型」，「多元文化」，窮實lóng saⁿ-kap tī-teh，內底是chiâⁿ濟人毋願看清ê事實，koh是kap「政治利益」袂當講kiam毋願piak-khang ê saⁿ-kak關係！

Che thang論述目前siōng hang ê 台語電視台議題，為何lín有我無？人口比例kap正義差hiah濟！拆白講，in lóng知平等是siáⁿ，台語人口是第一koân，為siáⁿ-mih boǎi做？

經費絕對毋是問題，問題是無合in「政治利益」，che管thài國民黨kap民進黨lóng仝款，因為「台語人」太濟leh，nā台灣意識hō͘起來，á是一下仔chhiàng koân，in無法度想像kap控制。所致，怪lín sioⁿ過「激進」，koh制造「符號」（code）爭論，符合「中華民國」體制之下慣習無理性ê思考。

Koh 加佇國際化、資本主義思維、經濟環境混亂、長期殖民教育等等，hō͘咱無重視「本土語言/文化」。Chhan-chhiūⁿ進前課綱問題lóng kap母語教育lóng應該kap作伙來理解。

一般kap無台灣意識--è，tō像未來欲選總統ê賴清德講ê，欲kā英文做「官方語言」，蔡英文講ê「新南向政策」。我毋是欲pān-phoe in ê意識DNA，是欲講「愈在地化愈國際化」ê正確性。是講哭爸，正確性koh kho͘轉來頭前講ê「政治利益」。舉1 ê例比較，原住民台視kap原住民保留地議題，佗1項kap好做？輕可？我想某種程度原住民保留地議題kap台語教育是仝款--ê，牽涉ê層面過頭闊koh深。當然，闊kap深是欲講政治利益，毋是測度正義ê單位！

我koh想，「台語人hiah濟」lóng是講有正規教育tùi民進黨chit款「本土政黨」毋是khah有利leh？是án-chóaⁿ毋是做？除了「政治利益/正確性」lia̍h外，ē-tàng解釋ê是「台語人hiah濟」chit ê假設應該是無存在--ê。Sì-kho͘-ûi-á看看leh，mài 看kāng-koah--ê，正港有影。  可惜咱目前無1位政治人物有陳定南ê氣魄，講若無實現母語教育伊是台灣ê罪人。了然ê是，有誠濟王永慶欲將母語「六輕化」。