過往咱mā袂少李筱峰老師ê自傳，上主要ê是228相關，對咱影響足大。後來咱閣去買228口述歷史的套冊，mā影響咱有袂少詩是寫予228受難者佮家屬。
咱捌看著受難者羅天賀的相片起哮出來，後來寫一首詩，想袂到6冬後予伊的孫仔看著，唸予in老母聽，就是羅天賀的查某囝。落後，這姨--仔人無爽快蹛院，閣錄影片給我說多謝。
講這，是欲展現李老師的事工是足重要的代誌，予chia的家屬知影in的父母、兄弟姐妹，阿公佇阿媽…毋是in做歹代誌才hŏng關hŏng銃殺。
予人掩歁的歷史，咱就愛予人見光。認捌歷史，咱才有法度行向未來。
家庭背景佮環境，筱峰老師啟蒙真早。咱嘛是讀台南二中，這算是咱啟蒙的開頭。彼時袂少老師，尤其是物理、數學老師共咱講袂少二二八的代誌。我會記，就是按呢我才去買一本《醜陋的中國人》來讀。
另二件佇求學時期印象上深的事1996台海危機，阮拄會準備高中聯考，佮大學一年時陳水扁的選前之夜。
這三本冊，有寡歷史咱是無經歷著，無參與著，總--是，透過往過的閱讀，咱真清楚咱未來定著毋是欲中國共產黨彼路--ê。
這社會欲覺醒有影真困難，無論是靠教育，抑是政治手路，抑是個人。
這冊內mā點醒袂少點，教育體制、歷史的牽扯無論，個人家庭經濟等等。
教育體制佮歷史靠體制內外互相搝搦，這毋是一工二工的代誌。何況長期中國的遺毒深深佇頭殼內。
個人經濟，像咱父母是佇社會較低層，予咱食飽，有受教育，會揣著一份好頭路就真好矣。我無法度想像咱會使一个人欲顧家閣欲顧國家大事。這點佇教授的冊內，咱mā看著咱長期的憢疑。
咱出社會了，有較冗剩的氣力佮金錢，重新共一寡過去毋捌的歷史，抑是想欲做的代誌沓沓仔補起來。這應該袂算傷晏。
加上咱仝款mā是做人老爸，對in的未來mā是真煩惱。設使咱若愈早讀較濟歷史，抑是國際的分析，咱定著袂生囝，定著袂結婚矣。咱完全理解筱峰老師獨獨生一个的因端。
咱真佩服筱峰的經歷，佮面對彼个時期的勇氣。
冊一開始，就位家己的族譜揣起，窮實，咱mā捌做過仝款的代誌。我猶會記，彼敢若是看網路的文章，講會使去區公所申請直系的戶口名簿。
這个簡單的行動，予我感覺真無仝，無法度形容。就親像老師講的，若是這直系血親任何人無去，就無今仔日的我。
過往父權社會，忽略母權。咱厝mā是按呢。生囝定著愛生有lān-pha才欲煞。
這觀念應該愈來愈薄矣。上無，咱袂閣按呢想。
咱真佮意筱峰老師摘一寡朋友抑是師長的話。其中是韋政通老師的話（236頁）。
呼籲咱欲做現代人，愛成做獨立自主的個人 。
傳統的輕個人，重家族的倫理，無合時代，嘛無法度予咱應付這時代的變化 。儒家彼套kan-taⁿ (干焦)適合好過的人。
咱三本讀了，上注意的是，有佗一本冊咱毋知，咱毋捌讀過。這嘛是筱峰老師伊位中華民國教育跨入西方的思想體系。 這也是他大量閱讀的結果佮思考的過程。
他摘Huxley的話， 大部分的無知攏會使克服--ê， 咱之所以無知，是因為咱無想欲知影。
無想欲去知影，是因為咱hŏng關傷久矣。咱認為會飛的鳥是一種病 。
所致，老師不斷有講著一个心理學家作者的冊叫做《逃避自由 》。
面對退學，重組家己的人生。這段我mā真佮意。就算是家庭會使予伊足強的支持，家己mā愛有足堅強的心理素質。這是一般人少有的。
內鬥（p278，中）。咱定聽講台灣人放尿攪砂袂做堆。這毋但佇政治箍仔，台語箍仔嘛袂少。咱真有感覺。
二元對立的看法定定是咱思考的邏輯，毋是層次--ê，毋是階段--ê。 攏是一步就欲hoa̍h到位，選一个人就欲反盤，獨立建國。
這敢有可能，符合現實？
冊內講袂少李登輝佮蔡英文的手路。
嘛點醒有公職才是抗爭之本。設使咱攏無去選公職，認為公職的人攏是lap-sap的，會烏西，看輕in，咱政治敢會出gâu人，改變社會leh？
總是，體制內和體之外的運動，有時候愛互相的體諒和做掩護。上重要的是，是以國家的利益，毋是個人，抑是黨的利益來設想。
最後，咱想閣講一點咱感覺足深的，就是人的改變。
筱峰老師有講，看歷史袂使看獨獨一个歷史時段，嘛無可能kan-taⁿ看某一事件，愛位背景，因端開始揣，閣有伊本身牽扯的結果，影響，甚至未來。
林義雄講的，「莫看我一時，愛看我一生。」 李登輝講的，「我毋是我的我。」
歷史會講話。李筱峰老師的回憶錄有影精彩。
受教。
（ps：原來林佳怡是李筱峰老師的學生！看冊才知。）
以上1960字
