《療心圖書館》 心得

 《療心圖書館》 心得

這是一本教父母重新學習按怎學習，教父母按怎教囡仔學習、按怎獨立學習的冊。

冊是真好的工具，無論是大人抑是囡仔。

咱真欽佩館長，毋但職務上做袂少超出伊應該做的工課，閣成造一葩火chhiō路，予袂少囡仔揣著方向，陪伴囡仔予in揣著一个信任的所在，內底會使揣著算袂盡會使陪伴in的冊。

咱對圖書館的印象袂少，國小的圖書室差一點仔hŏng關佇內底，大學聯考了閣去圖書館做志工，大學圖書館有四間嘛攏有咱的影跡，甚至咱閣捌佇袂少冊後壁的借冊卡留名…，閣有這馬不時揣囡仔去圖書館揣繪本…。圖書館對阮的成長是佔足大的因素。佇彼个小小的空間感受遐濟知識、資訊的衝擊，感覺家己原來是一粒沙，世界遐爾仔大。

家庭的因端，父母的教育因端，阮的學習路--lih éng-éng比別人較食力，慢一跤步。資源的欠缺、家庭文化資產的欠缺咱體會會著。

這問題大概9成以上圖書館會使牽扯勻平，減少一寡資訊的水平懸低。總—是，就像作者所講的，這需要人來chhōa。需要一个大人來chhōa領，予囡仔熟似圖書館是一个安全的所在，會使揣著解決問題的知識、方法，甚至揣著信任大人的所在。

學習定著有系統，有方法。一間遐大的圖書館按怎使用？按怎揣著家己想欲讀的冊？按怎揣著一本解決生活困難的冊，抑是百百款的箍仔的資訊等等。這攏需要有人來教，需要時間的練習。

這館長作者本人，用心經營地方，推廣閱讀，予在地子弟閣較簡單hoa̍h過這戶碇，囡仔袂閣歹勢，袂閣毋知影按怎去學習。這講是一點點仔的善意，定著影響袂少囡仔的未來。

至少，咱做學生的過程內，毋捌遇過即款的大人。

真少人的工課會使做家己興趣的，抑是是揣有意義的所在。意義加加是飼家爾爾。

作者的確毋但予人欽佩，嘛欣羨。

咱凡勢無才調像館長按呢，總是，阮會使替囡仔打造一个好的閱讀環境，做囡仔的模範，chhōa囡仔去圖書館，陪伴囡仔作伙閱讀，予囡仔知影按怎利用遮的資源，成做伊一生的知識來源佮倚靠的工具。

冊無跤，咱有。

咱會使家己去揣答案，這才調就是獨立的證明。

愛會記，有時咱大人嘛需要人來引𤆬，毋但是囡仔。

佇猶未讀一本冊時，獨獨看冊名真簡單會看tâⁿ去，定定是咱主動去學習，去讀才真正了解彼冊的內容。

這嘛是愈來愈濟線頂導讀課程，說書的podcast。閱讀予咱愈來愈濟的可能，用無仝的視野、角度去看代誌。咱袂閣予家己的自尊佮有限的思維束縛，袂轉大人。

成做一个老爸，阮欲做一个閱讀者、學習者、寫作者，做囡仔的鏡。

這定著是阮予in一生上好的禮物。