阿母化去的春天 詩寫陳新吉
轉來故鄉的時，彼拄好是春天
豬哥仔坪 的景致猶原我的青春煞罩烏雲
阿母的驚惶不時來探望
直直相窗仔外恐怖的記持
是毋是會閣行轉來搶走伊的幸福
我輕輕仔共叫，伊猶原守佇遐
目屎已經流焦，視線停佇彼白閃閃
無人敢眼的日頭光
油通通的罪罫洗袂清一路陪伴
受酷刑的自白催死才欲發穎的夢想
袂赴款好的心肝無才調抵抗橫霸的踳踏
一巡閣一巡傷痕是故鄉流落來的記印
內底有阿母的目屎，洗清一身軀的孤𣮈
哼一首閣一首熟似的聲韻敁破無奈何的束縛
祈禱的時，字運嘛著愛借過
予我心實在呵咾，呵咾無聲的疼痛
衰敗的齒槽逐暝洩漏難友的控拆
拖一支強欲斷水的筆解除𪜶的掛礙
五--月，玉山頂的雪水攙濫寡悲情
歷史的細節恬恬行入去我對𪜶承諾
鐵窗內翕死的青春不時趖轉來相借問
借問雙手攝襉佮額頭滿滿皺痕的阿母
敢有發見phàng見 的囝兒已經轉來
轉來的時，春天毋知怎樣煞逐工起烏陰
捌行去日月潭結束家己的自卑
怨恨看見闊莽莽的天一下仔就擱淺
故鄉麗斗的景致共我搝--轉-來
頓悟袂當重寫的劫數總有相離的一工
親像青狂的西北雨落了，向望就綴咧來
沿山稜仔線揣著安搭靈魂的敆縫
天地寄付予人袂記的色水
我靜靜仔看，斟酌我老--去的跤步
位驚惶不安行轉來故鄉的思戀
荒--去的青春閣縛纏黃酸的判決書
聖歌的音符閣再響起，共記持的疼篩--過
正義位額仔頭穿迵來穿迵過
「閣有故事猶未寫落來--啊」
無停的筆尾大大閣再試探上深落的烏空
死神請你借過，讓一步
欲講彼年濟濟台灣的阿母𪜶的春天化--去
等我寫完就閣會轉來阮阿母的身軀邊
註：陳新吉白色恐怖政治受難者，故鄉是南投縣魚池鄉日月潭水社豬哥仔坪草凹仔（lok-á）。1963年23歲當兵時被捕。因年輕時，參加好友的飯局，正值開創人生、事業起步的青年，被控涉入叛亂案件，判刑五年。等伊轉來的時，伊阿母早就起痟，精神失常袂捌得伊。《馬鞍藤的春天》是伊的回憶錄。臨終前，猶原拚勢咧寫受難友志的事蹟。
2021/06/18-20 @南投文學獎落選 @教會3663期
沒有留言:
張貼留言