<消失ê中國白蟻？>
過一暝，心情iû-goân袂得過，根本睏袂去。現此時，全國大部份ê選民，候選人lóng歡喜選舉ê結果，總--是，我看無有sáⁿ thang歡喜。面對未來ê挑戰，一湧koh一湧chhîⁿ--過-來，咱人民tō ài有心理準備，蔡英文kap 伊ê執政團體有準備好--bōe？人民千萬m̄-thang siáu想選1 ê 總統tō ē-sái 改變國民黨過去對台灣主權ê耍弄，官商結構是無hiah簡單來phah破--ê。咱m̄是追求一時ê勝利，是長久台灣政治ê安穩kap未來成做台灣人是台灣ê國家chit款ê向望。當然整體選舉ê結果是人民所向望--ê，不而過，千萬m̄-thang ka 國民黨看soe-siâu，看貓á無點，in ê黨產kap中國白蟻不斷leh 侵蛀台灣每1 ê 所在。現此時，無人看破，無人願意承認，甚至閃避，為tio̍h選舉，為tio̍h選票，tō chôaⁿ-á消音，無聲無說。選舉無講真話，選後--leh？這是目前台灣政治，台灣選舉ê悲哀！人民ê素質，目光短淺che是咱知識份子siōng煩惱ê代誌。
台聯kap 打狗南都基進側翼聯盟落選，這是代表siáⁿ-mi̍h？台灣人iû-goân hō͘人掩khàm，mā是可能自主性逃避，閃避siōng基本ê問題，中國。對ka-kī ê危機iû-goân無法度看清。當然主流媒體ê禁聲，壓迫kap過去基礎教育ê洗腦thún-ta̍h，一時三刻欲出頭，m̄是hiah-nih簡單，chit陣少年人soah 有認捌che tō是咱台灣人生成運命ê臭賤，卑微，ka chit ê重擔擔--起-來，tō ài一步一步phah-piàⁿ求咱所向望ê新共和。人人講台灣已經變天囉，過去，阿扁仔做總統，咱mā是án-ne講，2000年選前hit 暝 蔡振南先生唱「台灣是咱母親ê名」，現此時--leh？周子瑜，1 ê 16 歲ê查某gín- á hông壓迫，親像ISIS唸稿，講歹勢會失禮，因為gia̍h中華民國ê國旗，咱台灣人敢有影hiah臭賤，甚至he 是中華民國殖民流亡政府ê旗á，這咱lóng袂心酸，艱苦？若án-ne，未來台灣主權--leh？
立委選舉辯論，有生目chiu ê 人lóng ē-sái看出基進側翼陳奕齊大聲講出中國白蟻ê問題，國民黨黨產ê問題，che是真真正正做 1 ê 第三勢力應該講ê話。總--是，無人應答，甚至感覺好笑。若是台灣ê門戶無顧tiâu是欲án-chóaⁿ顧厝內？這是siōng簡單ê道理，kám m̄是？為何目chiu 假做無khòaⁿ，筆者我無法度thang 理解。佗 chit 位ē-sái用ka-kī ê母語大聲講咱ê心悶kap不安，無為選票，kan-ta為tio̍h咱ê理想。Chit款ê結果mā是代表母語族群ê弱勢，人m̄-願接受多元社會族群。蔡英文欲推sak「台灣學」，台灣母語咱tō看伊如何kā基礎教育做好，無，四冬後，絕對是koh 1 pái 反盤。
「國民黨無倒，台灣tō袂好」，che是基本，台灣欲好siōng低ê要求，che是歷史教訓，m̄是政治niâ。國民黨應當無資格來參與台灣政治，in ài先替過去台灣大大細細ê政治事件所犯ê罪過來謝罪，清除無合理ê黨產，chiah koh用謙卑贖罪ê心來參與，無，台灣無可能行入1 ê現代化kap有主權ê國家。Che是台灣人民ài有siōng基本ê認捌。欲七十冬ê殖民，教育洗腦，咱無資格樂觀，kan-tan chhuì-khí 根咬--leh，繼續做永遠ê在野黨，人民最後一道防線。無chiah，台灣如何成為親像歐洲hit 款ê國家，做一世人ê奴才？
綠--ê過半，萬項代誌以後lóng無問題？這是gōng人講--ê。舊年台南市議會mā是過半，結果--leh？選出國民黨ê議長？這代表sáⁿ？民進黨ê基層已經ta̍uh-ta̍uh-á 國民黨化，uì政策來看已經開始oá靠中國--ah。咱憑siáⁿ-mih，放心hō͘ 民進黨執政？這m̄-tō是第三勢力ê產生，m̄-tō
是日頭花運動ê由來，m̄- tō 是歷史課綱反洗腦運動ê源頭？不而過，社會運動ê頭人，soah無願承受中國是siōng大ê 問題，國民黨是siōng大ê問題。Che是為siáⁿ-mih，因為腹內hit ê中華民國ê毒洗無chhing-khì，m̄願承受過去所受ê教育是完全m̄-tio̍h--ê。人ai講chit款ê想法siuⁿ過偏激，無理性，事實上，是ka-kī ê 決心無夠koh完全認捌現此時台灣局勢ê困境。無承認是欲án-chóaⁿ改善--leh？
今á日，寫che m̄是欲「造神」，m̄是為選輸哭哀悲，是煩惱民進黨未來ê中國政策，第三勢力(時代力量)對中國白蟻議題有看假做無看，有聽假做無聽，án-ne，chit場選舉人民iû-goân是輸kah脫褲！koh 有--leh，總統ài等到520 chih上任，馬英九政府欲án-chóaⁿ烏白創，新科立委lín準備án-chóaⁿ 做？咱定講2016年絕對是困苦ê 1 冬，你kap 我tō看hō͘ chim-chiok！台聯基進側翼ê落選所代表ê是siáⁿ-mih？背後ê理路，看無ê人真緊-tō看會清，想會明。咱chiah 向望時間是khiā佇台灣人民chit pêng，等待koh-khah濟人覺醒。中國白蟻袂無緣無故消失，溫水煮水雞he tō是目前台灣ê狀況，咱m̄願看清niâ。
2016/1/18
