四常的罪惡佮正義的裁決

四常的罪惡佮正義的裁決 (一) 你開銃的時，敢有nih目？ 我無辜的翁婿猶袂食飽 甚至拳頭母袂赴捏絚向你舂落 你開銃的時，心肝囥佇佗位？ (二) 佇參加戰爭的時，心肝已經攏交出來矣 阮無反抗的力頭 上級的口令毋是人性的定準 袂赴爭論這錯誤的血統 我真歹勢，請赦免我這無可能赦免的罪過 審判？我已經判家己無期徒刑 無臭潲的戰事毋是我通解的 我應該佮其它少年朋友去讀冊去奅姼仔 毋是陷佇烏煙密siám-siám的地獄 該死的人毋是你翁，毋是我 是… (三) 地獄？你毋是上帝 是你推捒地獄的隔界來遮 你敢會驚惶？抑是這干焦是收集人頭的遊戲 你睏會入眠？有夢著你上愛的人無？ 銃子的重量硩扁你的青春 閣有我的幸福 你敢是上帝？ (四) 毋是。請諒情我的錯誤 我的錯誤是生做露西亞的皇帝的奴隸 有人會親像審判我仝款審判伊無 斯當時的光景是一場惡夢 驚惶替我開銃 嘛奪走我的靈魂 我無話閣講矣 (五) 墓就佇後花園。伊上愛的所在 祈禱會使平和結束 地獄的召集令成做一只一只的銀紙 願你平和有一工轉去見著你的親人 啥人愛擔即个罪？ 來問天頂的上帝 若閣一擺，你會按怎做? 你毋免是獨裁的奴隸 記：烏克蘭頭件戰爭罪審判，一位叫Vadim Shishimarin的露西亞阿兵哥予烏克蘭法庭判無期徒刑。