.jpg)
https://www.linkedin.com/in/masatu19810322/
這是我的履歷。我是佇電子業有15-6冬的經歷。
咱對總經理的工課路早就聽過，有影是一个傳奇！
首先，咱真正想欲共這心得寫做是揣頭路的自我紹介，看有法度得著總經理的注目無 XD。
英特爾元老Andrew grove《葛洛夫給你的一對一指導》，咱想吳總毋知是毋有受過Andy親自的指導，不過咱相信伊應該有佮這冊讀熟。為啥物？請看第18章【女性在職場上的挑戰】。
吳總是過去捌做過intel總經理。捌家己組過電腦的人，捌斟酌個人電腦發展的人，就知intel佇過去是電子業一粒一的霸主，無人會使振動著。
目前佇公信電子做總經理。公信電子目前有leh做汽車電子，tòa巷仔內就知是ADAS，先進駕駛輔助系統。拆白講就是自動駕駛，欲自動駕駛就愛用雷達。這毋是咱目前佇恩智浦（NXP）leh做的sio-siāng！咱佇電子業嘛有15冬的經歷neh，佇鴻海6冬，恩智浦9冬外…
頂懸有一寡是非正式自我推銷。總經理若無細膩影--著，共當作笑詼就好。筆者開頭一寡紹介主要是咱佇電子業的經驗，說明總經理行來毋是運氣二字就會使chhìn-chhái講會有理路。這汽車電子IC以咱所理解是接sòa十冬的明星，咱mā通想像吳總閣會使佇人生另一場挑戰留落來真gió-toh的成績。咱真期待即工真緊就會來。
而且即擺是佇咱台灣的公司。
身為仝款厝內第六的gín-á，仝款細漢厝內淹大水 ，搶救家產的狀況( 這是事實，請參考杜信龍第11屆台南文學獎作品《告別》)，笑看人生的困境，面對…等等。這自傳予咱讀起來有真深的鼓舞，見識咱進前毋知影的過去。這毋是褒唆，是真正欽佩。
以下，正式心得內容。
逐擺看著類似創業成功的冊，咱就會想著兩个人。
一个是《與成功有約》的作者史蒂芬柯維，另一人就是寫《如何衡量你的人生》 克雷頓‧克里斯汀生。
真緊翻到冊尾的備忘錄，更加應證咱所想的，成功的路有寡鋩角，一部份是會有相thàng的。可能過頭簡單，人soah無法度堅持。成功後，有時翻頭過來思考咱的人生到底是leh無閒啥物，會使留落來啥物…。
當然成功的定義，每一人攏無仝。
甚至人每一个階段，嘛無定著仝款。
內底有袂少重點，會使予食人頭路，有成長心態的人來讀，會有真大的利益。
一般人攏有「現狀謬誤」(status quo bias) 的想法，予過去的想法；經驗；教育縳死死。窮實，是家己嚇驚家己，毋敢hoah出去。
吳總冊內講無偌濟家庭教育的代誌，不二過，我真相信父母留予伊的「文化資產」真大，會使予伊按呢笑看人生的困境，一關挑戰閣一關。誠意建議，出後一本冊就愛加添寡，留後代，予父母的文化資產閣湠--落-去。
按呢，未來拍電影免驚無文本！
好，咱小寡摘吳總有講著工課場重點，咱筆記有列五點，每一點咱過去攏有真深的經驗。
1）成長心態，自我學習予才調提懸。
2）佮人好好仔鬥陣，對你人生的成長有幫chān。
3）免khioh人的歹聽話掛佇心內。
4）愛會曉自我表達。
5）等待穩定，回歸生命本質。
第一點，成長心態，自我學習予才調提懸。
死執的心態是工課場上無形的殺手。主動積極是成功第一信條。INTEL 16冬的經驗掠外，閣一開始足十全的內訓在咱看是足欣羨的。是講，假始公司無提供你這訓練 （p135），抑是公司完全攏無訓練，你敢著戇戇等？
在咱的經驗，真濟攏是家己爭取的，甚至是家己開錢去學習，買冊閱讀是上基本款。好佳哉的是，愈來愈濟網路資源降底學習戶碇。學習是上好的自我投資。嘛因為咱人可能有一寡時間的制限，毋但時間成本顧慮，有時真正是愛開寡學習「成本」，知識稅來提懸學習效率，確定咱的方向無têng-tâⁿ去。愈早共方向扞好，成功機率愈懸。這佮電子業搶規格製定，加入IEEE協會設定遊戲規則，仝款的道理。
第二點，佮人好好仔鬥陣，對你人生的成長有幫chān。
即點咱過去經驗真無好。即幾冬來，咱改善袂少。主要是咱的癖就是較自目，有一寡同情心 （Sympathy），煞少同理（Empathy），無法度看透頭家的語言，佮公司的核心價值觀衝突…等等。按呢的因端，咱死做活做，得著的股票就是比人少，甚至看同事升官，家己閣佇原地bo̍k-bo̍k-siû。
後來家己嘛是透過閱讀，辭頭路，去山裡流浪半冬，家己ta̍uh-ta̍uh-á揣著咱的破拍（phòa-phah），認捌欠點，決心改變，落尾才了了仔改善起來。
第三點，免khioh人的歹聽話掛佇心內。
因為競爭，就有利劍劍的言語你來我去。力頭無chun-chat，心臟較無力，輕者，phak佇塗跤閣會使閃chhèng-chí；重者，包袱仔款款leh，轉去食家己，無閣有才調揣著好頭路，人生路chhé落來，無法度重新開始。這攏是咱看過的例。
愛心智訓練。失敗是常態，愛佮時間做朋友！
咱上佮意的數學公式就是複利公式。這毋但用佇投資，嘛通用佇各種奇巧（skill）。
世界嘛毋是為你leh轉se̍h，莫過頭自我中心。同事抑是頭家mā仝款無閒leh過活，求生存，無啥可能閒kah leh計較你的心情指數低懸。
所致，袂人一句話khioh佇心肝頭khǹg kah臭酸。
咱會使做的就是提升家己的價值。共hia的話，變做咱向前的光！可參考中村修二《我的思考，我的光》，是真好的見證。
「不招人忌是庸才 」。當時仔，別人目孔刺嘛免致意，免驚惶。彼是咱有才調的干證。總--是，咱著顧謙，嘛著liōng-siōng ê時，牽挽別人。這才是雙贏。協同合作是未來的軟功夫。靠家己拍天下，家己糊牛屎的機率較懸。
MR3003 High-Performance 77 GHz Radar Transceiver。這應該是世界第一粒共所有的汽車電達收發機元件整合佇一粒IC的產品。目前市面上，伊上chhèng！我本人就有參與著。
過去二冬，就是舞即粒。位良率45%到85%以上，這計算機算一下，就知成本省偌濟。
總--是，咱無好好佮頂頭表明咱的功績。因為歹勢、無閒甲無法度思考、無夠主動…等等因端。等到promote起哩的是別人，咱才leh起毛bái。
第四點，就是愛自我表達！
真濟人喙講投資，欠缺投資的教育掠外，愛聽明牌掠外，éng-éng袂記上重要的一項---現此時的頭路！
《財務自由--提早過你真正想過的生活》即本冊第八章--善用正職工作。若我是編輯，定著共即章徙來頭二章。
咱毋通共天地顛去，是非烏白舞，-100加100變200，看無問題的本質。直直予被動收入、第二專長chia的名詞se̍h kah頭殼轉袂過來，落尾家己的本份煞守袂牢。
假始有功績，就大聲講出來，白紙烏字寫落來，年尾KPI / ORK 回顧就好通比評。對頭家來講，伊嘛免佇心肝頭ioh抑是問，主管下跤手人鬥陣會較快活。
若有開會，定著愛提問，而且是愛有邏輯，問系統的問題，毋是為著問leh問。通常透過問問題，對方抑是頭家就知你的層次到佗位。咱的同事就是因為按呢hong promote。頭家有好印象，比死做落尾代誌不時出箠(chhôe)，效益懸太濟ah。
歹勢就是佮家己的未來對敵。共退休的時間延長！
咱大一就揣教授討外口公司的頭路做，老師號做咱是大四生欲畢業ah。後來，真正替咱允--著！彼嘛是一間外商公司，HITACHI電子 (敦化北路，宏國大樓)。咱會記第一工，standup meeting愛自我紹介，咱毋知影愛準備。咱竟然是講華語。
別人攏講英文。干焦我講華語。
別人攏講英文。干焦我講華語。
別人攏講英文。干焦我講華語。
這予咱真刺激。彼時咱才大一讀半學期nia。嘛是有這機會提早認捌產業，後來，咱佇英文有真大的練習動機。
確實有寡人毋敢講英文，毋是袂曉講，講無好。是毋敢佇會議頂講，毋敢佇頭家面頭前講。咱嘛有這毛病。
佇鴻海食頭路時，閣有一擺上台報告，看著副總來，過頭緊張。第一句話，就先「sorry, I am kind of nervers now」。報告了，副總評論算袂bái，總--是，伊要求後擺不淮上台就家己承認緊張！
不淮上台就家己承認緊張！
你無講無人知。你會使假做袂緊張。假袂成，緊張人看嘛知，不過人嘛袂同情你。講這氣勢就失一半，家己先軟跤！後壁無人會共你信tauh-tauh。
後來，開會進前，咱攏先suh大氣，共可能的問題準備好勢，練習足濟擺，做好心理建設，才入去會議內。
會議毋但愛準備十全的內容，家己的心智訓練嘛不止仔重要。
另一點是，情緒智商的問題。這佮第三點嘛有牽連。總--是，自我表達干焦是溝通奇巧一部份niâ。欲有好的表達嘛毋是開會時、拍考績時才需要。平素時就愛。人脈好的人，情緒控制，自我表達應該袂差去佗位。
第五點，回歸生命本質。
吳總講現此時毋是為錢leh做。退休、自由這詞已經著愛重新定義。
每一人狀況攏無仝，定義嘛會無sio-siāng。到某物崁站時，有人是追求生命的意義佮貢獻，親像陳樹菊，親像唐鳳。
世俗一般來講財務、健康、人際、佮興趣這四項平勻牽扯 ( equilibrium ; a state of balance )才是圓滿。
假始咱真緊共冊閣掀一擺，用這四要素分拆，定著會去連署Hollywood緊來拍電影。
落尾，我會使復製啥？這是我讀了想欲問家己的。
窮實看人家的自傳，有時會想像一下，設使家己過伊的生活的時，會按怎表現？ 真憢疑佇彼在當時的困境會當有仝款的成就 (上無，我無才調唱歌)，顛倒是有極大的可能是行袂出來的。家己的友情支援，人脈嘛無像吳總仝款。
這毋是看家己無，毋是獨獨欣慕。
是對家己講不斷的學習，成功是粒積的佮注心。
照吳總的心法，拍拚、熱情，堅心…Follow one course until succeed (focus)，拍你袂倒，會予咱變閣較強的成長心態。
有一日，咱會有家己的成功。
以上感動。
沒有留言:
張貼留言