台灣語言教育ê笑詼

教育部tsit個月10號，召開課程審議會審議大會，經過1工ê討論，落尾iû-guân 無kā文言文ê pha數降低，維持45%-55%。目前「國文」古文教育佔hiah懸ê，可能除了中國kap台灣，應該tshuē無幾ê國家ah。

咱回顧自細漢kàu大學，lóng有文言文ê教育。出社會了，才發現佇學校學文言文根本是浪費時間。咱m̄是講he無好，問題是敢有需要開hiah濟時間去學習？Tse是真現實ê問題，愈免講內容濟濟是kap現在社會，國際教育體制脫線--ê。

教育應該愛訓練學生思考，邏輯思維。總--是，íng-kuè ê教育lóng是「死背」，一寡讀冊人忠孝道義，仁愛…ê大道理。是講，咱看hiah支持「文言文」ê人tiānn-tiānn m̄是án-ne，tse敢m̄是真奇怪？Thang理解tsit款教育是注定失敗--ê。咱結論可能hē了siōng緊，不而過，以工具性ê角度來看，國際上除了中國大陸lia̍h外，可能tshun台灣教hiah濟「古文」ah。提荷蘭做例，kan-tann四分一有學習古文(拉丁文kap希臘文)，學科除了語言kap數學lia̍h外，濟濟是kōo英文leh上課。

咱tiānn-tiānn講愛國際化，賴清德前台南市市長koh kā英文訂做官方語言，學校ê老師、政府公務人員敢有法度kō͘英文來書寫kap溝通？伊ê相關ê政策敢有kap咱平常時ê生活有實際ê效果？Tse thang留hōo讀者思考。Koh，看新任行政院長賴清德上任了，隨通知欲修正「客家基本法」，kā客家語言列為國家語言，咱心內的確歡喜mā真心悶。歡喜ê是佇欠缺「台灣學」ê體制內，有法律ê保護，母語khah袂hông看輕，總--是，內底應該愛有對應ê教育政策才tio̍h，無是空殼niâ。心悶ê是，佇台灣佔siōng多數ê台語族群直直無相關ê政府單位來看顧，hām「台語電視台」to無，án-ne是欲講siánn-mih「語言平等」--leh？

有人講是愛維護中華民族ê文化，實際上he是殖民教育ê手段niâ。教育ê內容kap土地無直接關係，作者mā仝款，是án-tsuánn無愛教育台灣人咱家己ê台灣文學leh？講到底，in是會維護家己統治ê霸權kap文言沙文主義。咱到kann m̄捌聽過Nobel文學獎有人leh寫文言文--ê，講調降「文言文」ê pha數會hōo中文程度降低leh愈無理路。咱平日時ê對話敢有用「文言文」溝通？平日nā用tīng-kui會有人感覺你是siáu --ê，有寡作家可能會摘1-2句文言文來，tsng-thānn文學美觀。總是，he是讀冊人ê奇巧，無法度引起大眾仝同ê心聲。

Hô-hòng「國文」無應該hōo「中文」霸佔，咱長期欠缺ê母語教育soah少人討論，莫怪「中華民國」，「中華台北」chit款不三不四ê名號永遠無才調tàn-tho-kak。佇討論「文言文」kap「白話文」ê爭論ê時，nā無講tio̍h台灣文學ê主體性kap母語教育，che討論lóng永遠是殖民教育ê kiōng-huān。

2017/9/8

2017/9/11補