Hǒng 拍交落ê詩人

傳統m̄是1項 ē-tàng繼承ê遺產，ká-sú你nā欲得，tō愛hē功夫。Siáⁿ-mih是傳統？伊ài有歷史內涵ê意識。欲有意識ài先有歷史認捌，m̄-nā kan-taⁿ看過去，mā思考未來。Che是超脫時間、空間ê制限，mā是kah時間、空間kap作伙ê意識。--艾略特 (T.S. Eliot, 1888~1965)

咱的確有濟濟疑問。咱tō愛行--落-去，為欲cháu-chhōe chia ê答案。

傳統？咱社會éng-éng lóng袂去好好思考傳統對咱ê記持情感，koh愈袂講袂去進行思考kap反省。落尾，tian-tó歹ê傳統留一堆，好ê袂赴tn̂g--落-來，直直造成「傳統」kap「現代」ê對立kap phì-siùⁿ。不管古蹟保存，母語復振kap宗教傳統…等等咱lóng thang看tio̍h，「資本家」用hit lō「經濟」ê nôa-thâu維護in ê正當性。Che是in無理解ê「傳統」ê內涵，窮實是1種權力者ê手段，hiau-hēng ê是濟濟人m̄願去tháu ê結。

古早唸歌是生活ê 1 部份，講是生活ê趣味á好，gī-niū，甚至是藝術，文化精神kap教育來源，che nā了解hō͘你袂當袂承認--chit。Siáⁿ-mih是唸歌？He是我2014 hit年世界母語日佇台南政大冊局我拄著周定邦兄才知--ê。Hit時我mā拄leh開始寫台文，一開始就是寫七字仔鬥句，寫ê時lóng真自然，he是因為細漢tō捌聽過，soah m̄知he tō是唸歌。Tī 2016年捌去kap定邦兄學琴幾個月，落尾去荷蘭做khang-khòe半冬，2017年轉來koh繼續。我寫讀台文chit四冬來lóng無停，七字仔mā仝款，創作方面有leh寫khah短篇ê歌仔，我kan-taⁿ hèng niâ，會唱袂唱--è，hoān-sè koh lóng ài si-á-geh--chi̍t-ē。Tī學「說唱」ê過程，咱認捌chiâⁿ濟歌á仙，mā愈認捌定邦兄。定邦兄捌策劃2014年出版ê《台灣民間文學有聲書》，che是有影真大ê本等。Chit套冊內底lóng是過去真有名ê唸歌sian kap當代--ê，咱毋免佇chia 1个á 1个點名，在咱說唱巢內，che絕對袂koh有ê「經典」ah。Khioh-khí過去日人時代出版ê歌謠、七字仔kap諺語lia̍h gōa，che有影是台語文學出版ê大代誌。「大代誌」che有人tiāⁿ-tio̍h會看無目地，che咱真知，mā袂致意。Chit khàm店好食無？無食過人，siōng愛評論。Chia ê文本tō是siōng好ê例。

我真認同頂懸艾略特所講ê話。佇chia來驗證，內底編輯用字漢羅對照、註解lóng真完整，而且koh有聲音來配。咱nā欲學習，甚至欲做文學研究á是語言學研究lóng ē-sái。Koh有ê是內底濟濟真gió-toh ê台語詞，咱nā直直kō͘ hit lō「華語」借詞，敢袂失去台語語格？Á是tiau-ì-kò͘選擇性ê「傳統」？Mā thang講濟濟人心內ê「傳統」tō是舊ê老ê。總--是，舊kap老是人主觀用「時間點」來講，soah m̄知佇綴任何物件無了解前進，窮實，chia ê物件lóng是新--ê。所致，咱無意識，tiau-ì-kò͘直直kā家己ê寶tàn-thó-kak，phah交落。

詩人？定意koh是siáⁿ？我寫4冬ê詩，時間無算長。有時寫寫leh，the̍h月琴唸chi̍t-ē-á歌，看咱ê現代詩á是七字仔，koh對照chia ê唸歌sian，lóng會憢疑咱敢是詩人？天差地leh。歌仔仙有gōa濟人有編歌ê法度，即興編歌隨唱，唱thàu聽眾ê心聲，kā 生活lóng溶入去歌聲。咱想像時光背景倒轉，chia ê歌詩kám m̄是in詩人siōng好ê kan-chèng？是án-chóaⁿ加「現代」ê詩tō是詩，長篇七字仔袂當是史詩á是小說？講hia舞弄文仔奇巧ê才是詩人？

咱欲kā 交落ê khioh--轉-來，kā歷史ê空縫that--khí-lâi，koh ài jiok時代ê變遷，有影thiám，尤其佇chit條少人行ê路。定邦兄koh策劃1本《歌詩傳奇-台灣唸歌傳人身影採集》今年6--月出版，份量無比《台灣民間文學有聲書》khah大，精差是有濟濟古早唸歌背景ê紹介kap進前出現過ê歌á sian ê歷史增補。總--是，內底koh是一寡你知我知ê人影。Chia ê「遺產」，到底有gōa濟人願意hē功夫khioh，hō͘ in新ê生命，跳脫人tùi「傳統」ê井底思維leh？

2017/9/16