青紅燈之戀

<<青紅燈之戀>>

彼時讀冊真樂暢，閒奅姼仔真不良，讀甲落第第一強，講話有影無正常。

雙叉路口來相拄，堂堂男人來曲痀，娘仔憂悶目眵眵，險險著來歸地府。

發生車禍真不幸，小姐毋通沖紅燈，金銀財寶無路用，買袂轉來彼早前。

娘仔腰束奶真凸，我心亂傱若干樂，皮膚幼白想欲啄，一見鐘情若中毒。

後壁胡蠅是規堆，若是鬱卒想袂開，聽我幾句展喙水，你老講我上是非。

生做標緻人人愛，生活苦悶我上知，千萬毋通囥心內，消敨悲情予我來。

毋通一時煞衝碰，雙叉路口直直傱，害我嘛綴咧浪，胡蠅虼蚻攏掠狂。

小名虼蚻就是我，想欲為你唱歌，你ê心病m̄通拖，相信真情火袂化。

雙叉路口說分明，代誌咱就講予清，汽車機車來做證，咱ê感情熱冷冰。

交通死亡是誠濟，撞死保險無定賠，一銑五厘真歹提，你兜父母哭連回。

紅顏命短是笑詼，嫁我消災無問題，烏白將軍隨抽退，做伙展翼雙雙飛。

欲衝紅燈是何因，敢無看我做人真，我講ê話著愛信，一字重欲千萬斤。

遵守規則上蓋讚，較等青燈手我牽，毋是我guâ話畫難，細膩行路會犁田。

美人生命我來顧，上天落海塗塗塗，甘願為你身來渡，拜請拜請主耶穌。

即ê故事到遮止，這是大學ê記持，欲等紅燈ê趣味，你若相信才有奇。

平素做人愛笑面，閒閒食飽激五仁，出門平安上要緊，聽我唸歌頭殼眩。

2016/3/2