替高中生贊聲!

課綱微調座談會會後中一中學生發表抗議聲明。（圖／翻攝自YouTube）

<<替高中生贊聲!>>

最近歷史課綱問題，舞khah tsiânn大，hām高中生tō欲出來抗議。咱是歡喜mā是煩惱。歡喜ê是現此時ê學生gín-á比咱有出脫，煩惱ê是，中國國民黨原在毋願意放棄in“大中國”ê思維，愈來愈軟塗深掘，洗腦教育強勢欲來執行。Siōng好是國中生mā作伙來抗議，按呢才有夠力！筆者是這兩冬才開始走揣家己母語-- ê，mā開始了解咱台灣，咱土地發生ê tāi-tsì，歷史，濟濟資訊是靠家己讀--來ê，hia ê物件是過去政府tiau故意毋願教hōo咱。佳哉ê是，有濟濟民間團體kap學者ê拍拚，為咱台灣保留家己ê記持，熟似家己ê家園土地。無了解土地歷史，咱若會對這ê小島有感情？若有，我tō承認鹿茸是耳空生出來ê毛！

對in hia ê人確實毋願認同台灣，甚至對台灣ê感情po̍h khah若紙。台灣對in來講只是有通liô，有通thio，有通享受，有通控制別人ê所在。將咱ê喙舌割斷，學主人ê話，學主人烏白鬥ê歷史，家己照鏡看見ê是主人ê面模-á。思想中毒，腦神經tsa̍h-tsí無法度思考是非，想ê是in欲hōo咱做ê tāi-tsì--乖乖聽話、莫反抗。佳哉ê是，有濟濟民主前輩佇頭前相tshuā抗爭，1-su̍t-su̍t-á 思想ê小草ê猶袂hōo鏨根，put-li̍h-á屈強--ê-lah。咱是袂使tshìn-tshìn-tshái-tshái投降，世代正義追求毋是1、2工好hiân心適ê旅程，是1場實實在在ê革命。

過去，民主前輩講是leh iā火種，現準1場火是會使燒偌大，偌iānn，偌猛，我確實毋敢siunn過樂觀。咱歲數uá中年-ê kap老1輩-ê，tō ài相thīn，he是in ê未來，毋通將囝孫ê末來出賣--去。反省過去咱受ê教育kap現實社會做比較，hia教ê物件有偌濟有路用？In所講ê是欲培養啥物款ê人？中國人，台灣人，對利益看重ê人，對環境土地會有關懷ê人，乖乖納稅對政府無giâu無gî ê人…？社會欲按怎會進步，需要啥物款ê人，創造啥款ê價值，活tiàm二十一世紀ê你我敢毋捌好好想看māi leh？

是lah，佇台灣平均1冬讀無3本冊，看--ê，聽--ê攏是皂烏漆白ê新聞，演藝界oo-lóo-bo̍k-tsè ê情愛世界，政客oo-se食錢，靠勢hiau-pai橫霸ê面腔，欲有logic理性ê思考確實有影難。在中國國民黨ê思考，in確實有厲害，咱正常善良人無法度tuè會起in ê 奸鬼小人步數。咱看母語悽慘落魄ê過往tō知知ê-lah，借問讀者你tau koh有偌濟gín-á序小有才調kap序大用母語開講phò-tāu ê boo？甚至，讀者你tī厝li̍h mā啥時間用母語。這毋是咱ê問題kap過錯，是政治強逼環境來改變，習慣改變，思想改變，尾a，行為改變。現準kann-tann靠寡有知覺這件tāi-tsì ê嚴重性ê人kap有熱情ê人來推sak niâ。會當拖偌久，無人知，是毋是有koh khah濟人會來覺醒，嘛無人知。咱毋是拚命佇眾人面頭前祈求pho̍k-á siann，顛倒是tī孤獨ê烏暗揣1寡對會起家己ê快樂niâ-tiānn。好，koh看轉來，教育部ê做法to是過去kā母語tai頭仝款。欲抗議在你抗議，反正你尾á嘛是ài聽我ê，加加hōo lín罵幾工niâ，過幾日，有新ê新聞，事件，逐家攏袂記了了。台灣人kài無tòng-thâu，無流血死人ê革命，攏看現現，無效lah，中國國民黨繼續放外外lah！無錯，馬英九做總統ê最後1冬，伊做ê事工絕對會愈來愈恐怖，咱無法度完全來防備kap收煞，對伊來講he是伊ê使命，咱suah著災。是講，絕對袂使來放棄hōo伊好食睏！台灣人欲出頭天？ài靠這陣少年á，拜託--ê，替即陣少年á贊聲，毋通koh再hōo伊接受咱過去ê洗腦教育，毋通阻止少年á來自由成長進步。

2015/6/11