欲相戰毋是用喙喝--ê，愛兵力推演，時間空間變數，甚至是國際因素。遮个物件是會使用科學來驗證--ê，這毋是拍電影，毋是拍電動，閣愈毋是辦公家伙仔。
《阿共打來怎麼辦？》結論：根本無可能，除非咱家己先投降！
投降是指元首投降加上超過一定人數支持投降閣四箍圍仔國家攏無插手！
這三點因素仝一个時間點發生敢有可能？
咱教育過往欠缺國際觀，攏是大中國的思維，無海島想像，工程教育干焦是公式死背，加上新聞媒體素養欠缺，對敵的心理戰、資訊戰摻入來，莫講一般人民，高知識份仔mā攏認為中國拍來，咱穩死，無人會插咱！
是講，為啥一定愛人來救？為啥咱無法度自強？咱敢定著無贏面？
最近俄克蘭咧拍烏克蘭，世界各國已經開始有leh o͘-ián ，經濟制裁，武器贊後等等，上主要是世界各國看著伊人民對家己國家的愛，無放棄家己的土地！
問你家己一个問題？阿共仔拍來，你敢會投降？你敢有綠卡？欲走去佗位，跳烏水溝？
無錯，烏克蘭佮進前香港事件對咱台灣上大的啟示就是愛自強，認清共產黨。假使閣有人想欲投降，放棄民主自由的生活，是家己想袂開閣欲拖別人落地嶽。
你敢會曉用Google看台灣佮烏克蘭的差別，地理，經濟，甚至是武器的精差？
伊敢有台積電？伊敢有烏水溝？伊敢有逐冬向米國買軍事裝備？啥是第一島鏈？等等。
經濟永遠是第一考量。有錢才會使講話大聲，買武器，甚至買地。無者，阿共是按怎欲一帶一路？換一个角度看，米國敢會賣高端武器予阿共仔？是按怎，米國買予咱，伊會氣phut-phut，中國國民黨會來擋？甚至欲擋咱打造潛艇？
阿共仔欲拍？敢有遐好食睏？
是啦，「料敵從寬」。所致即本冊一開始就位一寡網路定定lā ê謠言，總共8 種。內底濟濟是hiâu-siáu的笑詼，冊內的數字推導是真拄真的數學，成本考量嘛是重要因素，相信讀者讀了應該會使分辨這無分無會的文章。
咱舉幾个例，前站仔高雄燈會無人機予人刁工擾亂，所致表演有一寡重耽。
咱對無線通訊有tām-po̍h-á理解。
無線電確實真簡單受別人蓋台，就是利用khah大力頭的功率去共對方khàm布袋，予伊袂振袂動。
有人講阿共仔嘛會派一大陣無人機來，看這新聞，你共想咱一般民眾集體直播凡勢就攏摔摔落來矣。
閣免論，無可能控制hiah遠的路途，載hiah重的武器，除非有Elon Musk大力贊助STARLINK衛星，而且解決負載( 無論是資料，重量)的問題，…這閣無干涉著準度佮成本。
這咱做工程的經驗，這種戰法無啥可能。咱toa佇戰機航道e-kha，顛倒是阿共仔三不五時飛來，咱戰機愛飛起共閘，這才是傷害。長期對咱心理，駕駛人員的消磨，硬體的消磨才是嚴重。
用空降部隊，咱大樓遐密，地理閣無熟，是欲跳來自殺？讀者會使去查過去國慶神龍跳傘小組敢有人受傷？愈免講，阿共仔欲來敢免紮武器？抑是號做少林武功蓋天下，台灣人攏是軟仔，查埔攏袂hiúnn？
閣有講坐漁船佔西南方地勢較低的所在，先莫論載武器載人食水深，你若位鹽份地帶到嘉義的水路，佗位毋是滿滿的蚵架？
假始咱有影對地理，經濟的影響捎無摠，信任阿共仔攏較好，咱台灣較䆀。讀者就去掀2016的新聞，咱雄三飛彈誤傷咱漁船。
看予斟酌，這雄三飛彈是咱家己做--ê，是位左營拍到澎湖，Google圖尺測一下，140公里外，彼閣毋是雄三的極限neh！
你想，咱兵力武器敢有遐䆀，阿共仔看袂毋知影這新聞？
好，濟濟嫌開錢買武器，講彼無路用。凊彩查一下，米國頂一任總統阿普仔買偌濟武器予咱？
11擺！
內底的武器正是對付阿共仔上好的物，內底魚雷，就是欲予冊無講著咱台灣的潛艇計劃。
武器清單大部份是公開的，讀者若會像拍電動仝款做去做家私比較，阿共仔敢袂，甚至認真看待？咱一个一个拍入去youtube，攏有袂少幼路的紹介，相信正常人的對敵應該嘛真清楚。
潛艇計劃嘛是公開的，按算未來8隻，2025年第一隻交貨。這嘛是國際支援鬥kīng--ê。這已經毋是單純的國際經濟問題ah。
另一方向是信任台灣，無信任共產黨的野心。
讀者假始像我tuà佇台南軍機場附近，頂頭是航道，你定著共294-295頁好好思考一下。
地圖拍開頭殼小pháng一下，北爿欲拍台灣，愛面對日本，美國。南爿假始無米國航母佇南海，閣假始台灣空軍海軍無防著中國的潛艇突破巴士海峽走入去太平洋，對米國造成極大危機。
閣查一下國防部資料即時軍事動態，咱平素時就會使查，先練一下，假使相戰嘛有一寡憑信。查落去，你就知阿共仔偌捷飛來西南方空域。是按怎是西南方？是按怎是反潛機？ （ps：飛機種類愛小寡知影，無，可能無法度理解這冊的軍事調派）
位西南方是心理戰、消磨咱飛龍機硬體、人的體力考量掠外，主要是欲演練若欲突破第一島鏈防線進入太平洋，核動能潛艇才會使予美國著生驚。
總是，目前阿共仔硬軟體閣差米國真大碼。
位這理路就會使理解國產潛艇的重要！
啥人擋真可能就是三跤仔，阿共仔的傀儡仔。
咱讀這冊真心適，哪讀哪網路揣較有事實證明的網站，新聞。親像2021年菲律賓軍方嘛有防空飛彈。
阿共仔敢捌突破第一島鏈，有啦。敢是伊有影厲害？無影啦。
查一下2016新聞，「遼寧艦遭日潛艇跟蹤」。你就知，低路人攏看現現，無愛共你將軍niā-niā。阿共仔欲試探別人，別人敢攏戇--ê，袂khiā佇伊後壁看伊leh變啥báng，到底有guā才情！
這讀者會使去讀書館借《獵殺U-571》看過癮（giàn）一下。
寫到這，咱記持上深ê戰爭危脅是1996年台海危機，是講時空背景無仝，這代誌毋是講無可能會有，機率相對低真濟。這冊《阿共打來怎麼辦？》講了真明, 要咱摘冊內重點。
最近讀另一本冊《反智》，冊片頂的金句「毋願說理ê人是偏執，袂曉說理ê人是戇愚，毋敢說理ê人是奴隸」「理性毋是出世就有--ê，理智需要鍛鍊」。這就是現代公民需要ê教育，未來世界無法度欠缺--ê。
米國確實緊張，米國最近派人來台灣，敢是食飽傷閒？看香港、烏克蘭，中國肺炎，甚至33大停電…，咱敢看家己衰尾，戇甲袂peh癢，相信小粉紅仔的話？
最後，咱目前教召新制已經上路矣。面對這世界變化，獨裁嘛仝款進化。讀者感覺這改變是毋是應當順時機leh，心智的磨練是欲抵抗資訊戰心理戰，後備軍人定期訓練敢會使減？欲預防戰爭就是備戰，趁錢買武器，訓練戰術…等等。
以上加話補充。
咱有lim過、買過。不而過，毋知影這公司的故事。
感謝這擺讀冊心得。
因為閱讀，咱閣較理解這奶牛市場，咱定定lim的攏是濟濟牛隻tsham-lām
ê奶。
因為這，咱會做一个負責任ê消費者，為咱想欲啥款的世界投一票！
這sui-bóng毋是干焦我會使做，總是，是逐个人至少做會到的。
這冊非常適合三種人來讀。第一是想欲創業ê人。第二是想做社會運動ê人。當然閣有想欲揣出家己佇某物所在有絕對的影響力，去改變ê人。
獨獨讀fiction文類可能會離社會時代愈來愈遠，獨獨有理念無實際成績佮應用可能會離人類愈來愈遠。
這創辦人龔建嘉的理念，位衝破軍方體制，為著動物福利，生產者（奶牛生產者）ê生存，消費者食品安全，通路鋪排，長期經營…。每一段故事攏是非常好ê創業分析。
以《成功有約》內底法則來看，主動積極，以終為始，雙贏思維，知彼解己，統合綜效…是正港的實際者！
頭章位「善良」ê心開始，尾章共土地的連結揣轉來。每一个階段攏是一个正向ê循環。咱向望「鮮乳坊」會使愈做愈大，愈來愈有影響力去改變其它ê通路佮其它奶牛牧場ê思維。
既然投資一箍，就有4.05箍的社會影響力，這比咱投資、捐獻閣較有路用。無thīn有影是無理性ê行為！
現此時欲做社會運動毋但愛趁錢極加愛長久。這才是「金錢活水」，社會ê良善嘛會按呢ê因端改變。
金錢無重要？按呢就免去集資、共父母調頭寸，tsông錢去應付現金周轉ê問題。
創辦人龔建嘉本身嘛有參與一寡創業訓練，包括後來同學加入嘛是不斷去學習企業經營ê鋩角，這「改變」ê意志是不斷ê增強，嘛無放棄，目標清楚。
斟酌讀伊ê讀冊過程一路攏是主動學習，願意學毋驚lap-sap，綴教授四界去巡牧場，哪看哪學。專業加上過去挵開軍方體制ê信心，這造就「鮮乳坊」ê品牌是唯一伊會通做的，別人做袂來！搝長來看，這就是市場精差。
因為市場精差，消費者才有興趣去理解差佇佗位，這佮APPLE的迷眾（fans）有欲仝欲仝ê意思，有一批固定ê消費族群。而且這族群是有真大意願去改變，接收閣較好ê未來。
這市場毋是「紅海」，靠低數thâi kah流血流滴。因此，消費者、生產者，通路攏是同齊贏，攏變做戰友。
佇創業ê過程，咱讀著人脈積累真重要。想欲完成啥，世界攏會共你鬥相共。無主動學習，教授無可能願意tshuā伊四界走。袂顧謙，過去ê同學林曉灣袂來做伊ê「 媽祖婆」；無誠意，郭哲佑袂來做業務，「理念掠外，物件嘛著愛賣出去！」
揣適當ê人，做適當ê代誌。機會是予準備好ê人。
業務毛逐自薦，展開通路。有遠見的牧場提早做自動化，數位管理，世代交接、數位思維，不斷改善，企業OKR經營…。咱看著ê是一大陣ê人做改變、創業。
當然，佇這創業ê過程嘛有受著別人ê反背，心肝頭ê良善毋捌化--去。
毋通欲改變世界進前，予世界改變。一般人親像我，就定定予世界去定義矣。
即本冊讀了，定著愛重新思考為這社會，咱是毋是做寡啥代誌。
人生的過程是不斷的粒積，創業、人脈、社會ê公平佮正義…等等。
假始「鮮乳坊」ê「良善」會繼續粒積，繼續改變落去，按呢有一工所有ê奶牛場對待動物ê方式攏全改變，生產ê方法、通路攏全改變，這是「百面--ê」。終其尾，世界嘛會改變。
這有影是無動刀銃ê革命，真紳士ê社會運動！
這冊名毋像創業ê冊，卻是真好ê見本。
上路尾，回應冊名「做一件干焦你會當做ê代誌」，心肝頭嘛向望親像台語運動有即款ê想法。體制沓沓仔毋是會用提來做藉口矣。凡勢有時是咱閣無夠致意；凡勢有時是咱看袂清現此時社會需求是啥；凡勢有時是咱用無著時ê思想咧看未來。
這冊予咱思考真濟，真濟啟蒙。
以上。
《宮前町九十番地》kap《勿忘台灣-落花夢》是父仔囝的自傳，其中囝張超英是口述，由陳柔縉執筆。
看這冊面，雖bóng是新版，人像猶原phiau-phiat kah驚死無人，目前ê出版品敢揣有tsiah-nī性個ê寫真！作者年koh列出來，背景是好額家族，捌見證二二八、白色恐怖，算是家己雙手起家，有做官koh無行入國民桶，掛心台灣，替台灣佇國際行銷、交陪做外交…等等。這有影值咱去深探，深探這人ê一生，koh有伊所予後代ê價值是啥。
Íng-íng咱看自傳lóng是看一寡商業人士親像許文龍、張忠謀、郭台銘…，政治人物記象中干焦李登輝，無就是一寡散iā-iā ê白色恐怖、二二八口述史。著，koh有《活出意義來》ê Viktor.E.Frank，有寫《安妮日記》ê Annelies Marie Frank，佇烏暗ê政治時代，按怎活出家己ê向望、價值。
看自傳，有幾點咱吸引咱，歷史、政治，作者背景ê牽連，咱會當位內底理解時代佮咱現此時做對照，看是毋是有啥ē-tàng khioh siánn起來用。
khîng-si̍t，自傳就是另類ê人生成長 " 四物仔湯" 。
佮商業冊、個人成長類ê冊比，自傳ê述事結構嘛較有活跳，不而過，千萬毋通當事是主人家家己褒ê事蹟nā-niā。看人in面對人生困境時，in所展現ê意志，in ê家庭背景mā thìng-hó做gín-á教養ê參考，工課上ê進kap退，人kap人ê進退做實際案例分析，內底定著會當學袂少物…等等。
咱先sak開歷史這層，看現實物質方面。掠另tsit本《有錢人跟你想的不一樣》冊名做引，是我想欲位張超英家族的自傳知影in家族為何會當hiah有名望，按怎好額、按怎比人較出脫。
毋是咱世俗。是講就是愛讀這才知袂"世俗" ，避開世俗ê陷阱，避開人生思考ê暗窟。
有錢才大聲，這句佮人生成功無絕對因果關係。何況成功無定著佮"錢"有牽連，總--是，錢會用解決人生80% ê代誌。這無科學ê統計數字在咱有限的經歷來看有真大ê信靠。
佇即本口述者的人生傳奇確實佮家族資產有定著的相關，無者，老爸無法度位二二八事件走脫出來，留彼本《勿忘台灣-落花夢》。張超英冊內嘛寫著姐姐ê同學看著41台的卡車載滿滿死體，這二二八屠殺的事實。相對張秀哲ê「好運」，聽好知影彼時時代的烏暗，有偌濟人無法度閃避這災厄。
先插一句，蔡英文總統講小蔣「反共」ê因端，所以共這旗仔盤來插！咱毋知是毋是愛去呵咾伊為大局，抑是戇甲袂扒癢，一間中正廟已經phut袂好勢ah，koh一間漚sái-ha̍k。
對照張超英位老爸ê經歷真清楚國民桶ê歷史，無家族致蔭敢有法度渡過這白死殺ê時期。老爸革命性格轉變做「活死人」，連in即款背景攏無法度改變。一般人敢有法度？無的確，張超英提早看清未來ê行向。伊才通佇自序留彼句「我上驕傲ê是，我自頭尾攏無加入國民桶！」
因為家族資產，才有認捌彼當時ê菁英人脈關係，這無形的文化資產，嘛造成張超英ê外交手腕真gió-toh。這嘛著父母對教育有認捌，知培養，囝兒閣袂學歹。看張秀哲父仔囝ê癖佮痟，無行歪落尾嘛有真予人感念，對咱來看有影真厲害。
因為家族資產，才通認捌媠某，龍交龍，鳳交鳳，隱痀交侗戇。這某嘛毋是tshìn-tshái tshuā會著，仝款有受高等教育的顏千鶴，對張超英的事業有絕對ê幫tsān。佇伊去米國kap日本做工課時，嘛足thīn張超英，而且佮伊有真鬥貼ê台灣意識。無一个khiàng-kha某，張敢有法度注心對台灣ê貢獻？
有家族資產，就會當親像張家父子ê傳奇？
99.9%做袂來，嘛揣袂著矣！
這命運百百款，張家父子利用家族予in ê文化資產，佇彼个時代行出in人生的意義。我想這才是重點。這位陳柔縉ê話來講，歷史ē-tàng是真個人代誌，位歷史學習生死。
位死倒頭講，家族資產就變一點仔無重要。張超英有一身真靈通的外交才調，伊所欲做的就是單純予台灣佇國際有一个好出路，這自傳就像伊講的---一个禮物，予後代，予社會，予國家。
這是一个無形ê文化資產，我想這才是上珍貴的。財富到某種程度，較濟攏是負擔，較輸提來去做有意思、趣味的代誌。作者才會怨嘆講原來駛飛龍機無困難，應該閣較早來學！
內底「一碗麵」的故事已經敨開作者對金錢的癡騃（tshi-gâi），咱相信這是予伊認捌珍惜按怎開錢才是上重要ê代誌。
有錢，咱敢會願意佮政治牽作伙？「痟」 想家己有才調去改變社會？
我想這一種福氣可能嘛帶寡一種運氣，主要是作者家己不斷問家己想欲過啥款的人生，欲留啥落來予這世間。
凡勢是家族對學習比一般人自我要求，主動積極學習外來語（日文、中文、英文），才通有後來的機運，愈拍拚愈好運。張超英有講Hampson太太教伊民主思想，言論自由和新聞自由（1956），予伊足向望做記者。咱咧想張超英伊老爸 （1982過往）這時若知伊咧學這，毋知是毋是會阻止伊袂？伊是毋是有想起老爸二二八悲情的過去？抑是顛倒加強伊對「自由民主」的向望？老爸對這片土地ê向望已經佇血脈內流動矣。
伊佇1958年進入新聞局，Hampson的牽教是主因。
張嘛真清楚彼時的台灣是烏暗，講實的就是國民桶ê粗殘，無出國袂使即。這種意識若無見過勢面，無家族經歷，真僫有--ê。
伊對家己的未來方向嘛攏真清楚，佇新聞局內磨練家己講話ê奇巧，粒積人脈，這是第二點咱上致意的所在。
這敢是自細漢看阿公做生意，阿公有意無意訓練伊，伊無意中看厝內人來人去生意喙水，商場遏手霸（at-tshiú-pà）所學習ê才調。
阿媽教伊做人毋通傷計較，佇新聞局拍片著獎煞無伊名份，落尾指派伊去學全套的知識！伊佇1985年電影製作創業，無過去這經驗，這創業的機率莫講低，失敗率嘛會真大。做人毋通傷計較，失去的毋是真正失去，得著的凡勢是咱想像袂到的。
「買股票，絕對不買販賣軍火武器公司的股票。」這句話嘛是Hampson講ê。這「反戰」的思想，咱咧想嘛是張咧做(新聞)外交時極力推sak台灣佇國際另一个主因。1978年中美斷美，爭取應變的時間，李登輝佇日本知名度拍開…等等。位反戰思維到民主深化ê過程，中央蔣氏強權了了仔和平轉型，這敢是張心肝頭所想--ê？
冊腰彼句，「我是台灣人，台灣人應該做ê，我攏會去做，你無講，我嘛會做。」
「咱假使欲離開世界時，敢會後悔家己無較拚勢？」這是張退休時，重新欲接公務進前，問家己ê。
看張經歷這無仝ê政治時期，對照現此時ê政治，咱到底會做啥？有人用「自媒體」平台去放大社會議題，去影響風向。這應該是張想攏毋捌想過的新聞手段。台灣確是佇國際名聲愈來愈大，總--是，民主是脆弱--ê，無，蔡袂去gia̍h蔣「反共」ê旗！
張是恬恬做，無所求恬恬做。這自傳咱是做個人人生價值ê探討。以上。
咱最近有leh使用python，來追縱股票行情。這基本上是leh練coding功夫。
前站仔，有去上綠角的課，伊的excel表嘛真好用。不而過，有幾支股票，咱欲欲加加袂入。
伊紹介老夫子使用iqy的方法，咱試半工外，才想著這原始網頁設計已經改變，內底的iqy內容無符合咱資料使用，這佮python crawl遇著的情形真仝。
總是，咱閣發現愈簡單的方法是掠股票的價數！就是使用excel的預設功能。免幾秒就設定好勢好勢。是講，無上市的上櫃股票掠袂著。
咱bat寫過一篇文章〈無台語兒童文學，敢有台語e未來〉 ，彼時是2017年。現此時，咱來看這局勢是愈來愈好，台語出版這2-3冬以來，尤其是台語繪本koh-khah大出。予咱買袂赴，直直iā錢。
這thang講是國家語言平等法過了ê效應？我無確定。會當確定ê是這是母語人siōng好ê時機。問題是機會來ah，咱敢準備好ah？
出冊是簡單，mài賠錢是第一考量。目前時勢好，出版ê意願增加，是講敢有法度回收？Thang好成做後1
pái出版ê力頭？雖bóng是小眾市場，敢無法度hùn闊閱讀者，mài
kan-taⁿ束縳tī「母語人」？
人人tiāⁿ-tio̍h
lóng是母語人，可能是久無講ah，可能是記持拍交落，可能是阿公阿媽ê話…，敢袂使重新來定義家己ê母語？Mài
hō͘「母語」束縳咱ê學習，mài束縛消費者，mài束縛市場，mài束縛任何予語言成長ê機會？
任何一種語言出版品，lóng
tio̍h考慮編輯、美編，通路行銷…等等。冊已經歹銷ah，更加愛顧慮chia
ê精差，無，欲án-chóaⁿ生存落去？這觀念佇華語冊出版是常識。Tī母語出版soah是新--ê
。
咱看最近李江却出ê繪本《暗mi-moo》、《Tsiâ偷食菜頭粿》、《來𨑨迌》，前衛出版社ê翻譯兒童文學《小王子》、《你無聽--過ê格林童話》。每一本冊lóng
mā是設計過，而且koh有QR
code聲音唸讀。本文好歹是基本要求--ê
ah。假使講文本好，冊皮、美編soah袂去siâⁿ人買，袂看kháu--chit，敢m̄是真枉屈？咱真知袂少母語人出版ê困境，資金無夠。落尾去申請補助、去比地方作家作品集。總--是，以1个真嚴格ê讀者來看，冊皮外觀就先phah-chhèng
ah。咱m̄是講chit條路m̄好。總是，應該愛tòe
tio̍h時代進步才好，提懸母語出版ê質。相對上，母語人數應該會提懸才是。
多元化題材ê文類是咱tiāⁿ-tio̍h真濟動物唸謠。此時soah少人會記。彼m̄-nā是語言失去連結，hām土地ê連結mā斷--去。《台灣動物來唱歌》這冊ē-tàng做未來gín-á繪本siōng懸ê標準。母語kap音樂結合，實際影片干證，tau-tah
ê文本圖畫。予阮tau兩个kiáⁿ聽kap看就giàn，koh會逐工唱leh。
無台語兒童文學，敢有台語ê未來？今，台語路ta̍uh-ta̍uh-á順，tio̍h鼓舞創作者勇敢koh行--落-去。Hō͘咱未來會有愈來愈濟品質好ê台語文本thang好讀，咱就繼續thin落去！做1个老爸，mā期待有koh-khah濟母語繪本冊紹介koh-khah濟動物，甚至是植物ŏ͘。相信chit工真緊就會來！
2021/9/2 @教會公報3637期
