無良教育歌Bô-liông kàu-io̍k koa

無良教育歌	Bô-liông kàu-io̍k koa
1 南北二路好朋友， 嚨喉大聲共恁咻， 敢有聽見人喝救， 彼陣學生面憂憂。	1. Lâm-pak jī lō͘ hó pêng-iú, Nâ-âu tōa-siaⁿ kā lín hiu, Kám ū thiaⁿ-kìⁿ lâng hoah-kiù, Hit tīn ha̍k-seng bīn-iu-iu.
2. 殖民洗腦教育部， 毋做好人欲做奴， 是非顛倒刁意故， 講來講去為前途。	2. Si̍t-bîn sé-náu Kàu-io̍k-pō͘, m̄ chò hólâng beh chò lô͘, sī-hui tian-tò tiau-ì-kò͘, kóng lâi kóng khì ūi chiân-tô͘.
3. 盍教攏是中國屎， 祖先叫啥伊安排， 黨國政府若無敗， 囝孫準備做奴才。	3. Khah kà lóng sī Tiong-kok sái, chó͘-sian kiò siáⁿ i an-pâi, tóng-kok chèng-hú nā bô pāi, kiáⁿ-sun chún-pī chò lô͘-châi.
4. 你我公媽隨人祀， 毋通牽對咱遮來， 一爿一國無治代， 歷史證據通人知。	4. Lí góa kong má sûi lâng chhāi, m̄-thang khan tùi lán chia lâi, Chi̍t pêng chi̍t kok bô tī tāi, Le̍k-sú chèng-kì thong lâng chai.
5. 部長惡質硬欲捒， 叫咱囝孫就愛讀， 思想控制無頭殼， 雙手雙跤攏總縛。	5. Pō͘-tióⁿ ok-chit ngē beh sak, kiò lán kiáⁿ-sun tō ài tha̍k, su-sióng khòng-chè bô thâu-khak, siang chhiú siang kha lóng chóng pa̍k.
6. 彼是人民的靠岸， 到今看甲真畏寒， 跤尾手冷咇咇掣， 是欲按怎來反盤？	6. He sī jîn-bîn e khò-hōaⁿ, kàu taⁿ khòaⁿ kah chin ùi-kôaⁿ, kha bóe chhiú léng phi̍h-phi̍h-chhoah, sī beh án-chóaⁿ lâi péng pôaⁿ?
7. 記者嘛逢掠起來， 實情毋敢予人知， 賊仔政府性袂改， 拆食落腹伊上愛。	7. Kì-chiá mā hông lia̍h khí-lâi, si̍t-chêng m̄ káⁿ hō͘ lâng chai, chha̍t-á chèng-hú sèng bē kái, thiah chia̍h lo̍h pak i siōng ài.
8. 民主自由假若屎， 叫咱乖乖做奴才， 委屈冤枉囥腹內， 思想改造才應該。	8. Bîn-chú chū-iû ké nā sái, kiò lán koai-koai chò lô͘-châi, úi-khut oan-óng khǹg pak-lāi, su-sióng kái-chō chiah eng-kai.
9. 影片傳到佇網路， 咱的學生攏食塗， 看是按怎來讚助， 向望政府天都烏。	9. Iáⁿ-phìⁿ thoân kàu tī bāng-lō͘, lán e ha̍k-seng lóng chia̍h tô͘, Khòaⁿ sī án-chóaⁿ lâi chàn-chō͘, Ǹg-bāng chèng-hú thiⁿ to o͘.
10. 網路頂懸來討論， 相招教部來出巡， 守護學生毋甘睏， 為咱台灣好囝孫。	10. Bāng-lō͘ téng hiân lâi thó-lūn, sio chio Kàupō͘ lâi chhut-sûn, siú-hō͘ ha̍k-seng m̄-kam khùn, ūi lán Tâi-oân hó kiáⁿ-sun.
11. 王仔曉波真哭爸， 講是意識的問題， 牽拖阿婆油炸粿， 袂輸痟狗吹狗螺。	11. Ông-á Hiáu-pho chin khàu-pē, kóng sī ì-sek ê būn-tê, khan-thoa a-pô iû-tsia̍h-kué, bē-su siáu-káu chhoe káu-lê.
12. 伊的心肝有夠硬， 台灣就愛做阿西， 欲姦欲拍閣欲提， 世界無人遮連回。	12. I ê sim-koaⁿ ū kàu ngē, Tâi-oân to ài chò a-se, beh kàn beh phah koh beh the̍h, sè-kài bô lâng chia liân-hôe.
13. 政客佬仔算計， 吳仔思華死人皮， 管恁按怎譙佮詈， 猶原逐工好睏暝。	13. Chèng-kheh láu-á gâu sǹg-kè, Gô͘ á Su-hôa sí-lâng phôe, koán lin án-chóaⁿ kiāu kap le, iû-goân ta̍k kang hó khùn mê.
14. 學生代表林冠華， 青春少年用命跋， 欲將烏箱摃予破， 犧牲家己受拖磨。	14. Ha̍k-seng tāi-piáu Lîm koan-Hôa, Chheng-chhun siàu-liân ēng miā poa̍h, beh chiong o͘ siuⁿ kòng ho͘ phòa, hi-seng ka-kī siū thoa-bôa.
15. 若是閣有一口氣， 堅持原則有是非， 通人聽甲心齊碎， 想欲作伙伴相隨。	15. Nā-sī koh ū chi̍t kháu khùi, Kian-chhî goân-chek ū sū-hui, thong lâng thiaⁿ kah sim chiâu chhùi, siūⁿ beh chò-hóe phōaⁿ sio-sûi.
16. 無恥政客真奸鬼， 白紙𪐞烏講食虧， 一支喙舌直直屁， 當作學生大kong 槌。	16. Bô thí chèng-kheh chin kan-kúi, Pe̍h chóa tò͘ o͘ kóng chia̍h-khui, chi̍t ki chhùi chi̍h ti̍t-ti̍t phùi, Tòng-chò ha̍k-seng tōa kong thûi.
17. 冠華按呢做伊去， 通人掠狂哮袂離， 激烈抗爭隨時起， 大人囝仔攏知機。	17. Koan-hôa án-ne chò i khì, Thong lâng lia̍h kông háu bē lī, Kek-lia̍t khòng-cheng sû-isî khí, Tōa-lâng gín-á lóng chai ki.
18. 虛情假仙賊頭面， 張伊袂爽轉目仁， 予人掠包無承認， 卸世卸眾人看輕。	18. Hi-chêng ké sian chha̍t-thâu bīn, Tiang i bē sóng choán ba̍k jîn, Hō͘ lâng lia̍h-pau bô sêng-jīn, Sià-sì-sià-chèng lâng khòaⁿ khin.
19. 學生無奈唱悲歌， 部長拗蠻若鱸鰻， 啥人害怹外口蹛， 婊囝叫做吳思華。	19. Ha̍k-seng bû-nāi chhiùⁿ pi-koa, Pō͘-tiúⁿ au ban ná lô͘-môa, Siáⁿ-lâng hāi in gōa-kháu tòa, Piáu-kiáⁿ kiò-chò Gô͘ Su-Hôa.
20. 學生理路有影好， 思華知影疶屎膏， 毋敢會議驚會倒， 串揣阿九賴賴趖。	20. Ha̍k-seng lí-lō͘ ū-iáⁿ hó, Su-Hôa chai-iáⁿ chhoah sái ko, m̄ káⁿ hōe-gī kiaⁿ ē tò, chhoàn chhōe A-káu lōa-lōa-sô.
21. 飼你袂輸食了米， 阿九吩咐ài堅持， 升官名單攏有你， 放心亂改免僥疑。	21. Chhī lí bē-su chia̍h liáu bí, A-káu hoan-hù ài kian-chhî, Seng-koaⁿ miâ-toaⁿ lóng ū lí, Hòng-sim loān kái bián giâu-gî.
22. 學生堅持無欲散， 要求委員ê名單， 歷史真相攏總換， 思想改造會畏寒。	22. Ha̍k-seng kian-chhî bô beh sòaⁿ, Iau-kiû úi-goân ê miâ-toaⁿ, Le̍k-sú chin-siòng lóng chóng ōaⁿ, Su-sióng kái-chō ē ùi-kôaⁿ.
23. 名單機密有限制， 若是公開有問題， 毋管按怎共伊罵， 攏是絕招激蠻皮。	23. Miâ-toaⁿ ki-bi̍t ū hān-chè, Nā sī kong khai ū būn tê, M̄-koán án-chóaⁿ kā i mē, Lóng sī cho̍at-chiau kek bân-phôe.
24. 冊本干焦改幾字， 絕對毋是共人欺， 毋管啥人無滿意， 多謝指教莫插伊。	24. Chheh-pún kan-taⁿ kái kúi jī, Choa̍t-tùi m̄ sī kā lâng khi, M̄-koán siáⁿ-lâng bô boán-ì, To-siā chí-kàu mài chhah i.
25. 會熱袂熱差一字， 意思無仝著知機， 欺騙社會若放屁， 這款道理世界奇。	25. Ē jia̍t bē jia̍t chha chi̍t jī, Ì-sù bô kâng tio̍h chai-ki, Khi-phiàn siā-hōe ná pàng-phùi, Chit khoán tō-lí sè-kài kî.
26. 面皮厚厚擋誠久， 奸鬼手段老師父， 問伊啥吶烏白舞， 講話跳針直直驢。	26. Bīn-phôe kāu kāu tòng chiâⁿ kú, kan-kúi chhiú-tōaⁿ lāu sai-hū, mn̄g i siâⁿ-ná o͘-pe̍h bú, kóng-ōe thiàu-chiam ti̍t-ti̍t lû
27. 王仔曉波做主委， 支那糞埽攪規堆， 痟狗看人就 仝吠， 學生聽了四淋垂。	27. Ông á Hiáu-pho chò chú-úi, Chi-ná pùn-sò͘ kiáu kui tui, Siáu-káu khòaⁿ lâng tō kâng pūi, ha̍k-seng thiaⁿ liáu sì-lâm-sôe.
28. 叫咱恬恬攏莫吵， 支那歷史加減加， 管恁袂爽怎樣罵， 堅心繼續扶膦脬。	28. Kiò lán tiām-tiām lóng mài chhá, Chi-ná le̍k-sú ke-kiám ka, Koán lín bē sóng cháiⁿ-iūⁿ mā, Kian-sim kè-sio̍k phô͘ lān-pha.
29. 專業袂合無干礙， 一切作怹去主裁， 講是逐家中國派， 台灣歷史毋免知。	29. Choan-gia̍p bē ha̍p bô kan-gāi, It-chhè chò in khì chú-chhâi, Kóng sī tāi-ke Tiong-kok phài, Tâi-oân le̍k-sú m̄-bián chai.
30. 乞食兵仔歹作伙， 癩哥垃圾愛烏西， 思想改造欲統制， 禁止母語第一個。	30. Khit-chia̍h peng-á pháiⁿ chò-hóe, Thài-ko lap-sap ài o͘-se, Su-sióng kái-chō beh thóng-chè, Kìm-chí bó-gí tē it ê.
31. 光復名義佔人地， 二八事件誠連回， 死萬偌人夭壽濟， 掩蓋事實無講che。	31. Kong-ho̍k bêng-gī chiàm lâng tē, Jī-pat sū-kiāⁿ chiâⁿ liân-hôe, sí bān gōa lâng iau-siū chē, Am-khàm sū-si̍t bô kóng che.
32. 這種代誌攏無寫， 佔人家伙做大爺， 法院怹開保狗命， 眾人共肏姦伊娘。	32. Chit chióng tāi-chì lóng bô siá, Chiàm lâng ke-hóe chò tōa-iâ, Hoat-īⁿ in khui pó káu miā, Chèng-lâng kā chhoh kàn-i-niâ.
33. 講到彼暗的情勢， 衝入教部無幾ê， 要求新本都愛退， 毒害囝孫出問題。	33. Kóng kàu hit àm ê chêng-sè, Chhiong-ji̍p Kà-pō͘ bô kúi ê, Iau-kiû sin pún to ài thè, to̍k-hāi kiáⁿ-sun chhut būn-tê.
34. 規个過程通公開，毋通痟想濫糝來， 橫霸獨裁一定敗， 臭賤漚步人人知。	34. Kui ê kòe-thêng thang kong-khai, m̄ thang siáu siūⁿ lām-sám lâi, hoâiⁿ-pà to̍k-chhâi it-tēng pāi, chhàu-chiān àu-pō͘ lâng-lâng chai.
35. 誰知警察無是非， 袂輸親像拄著鬼， 看見學生直直推， 台灣囝仔真克虧。	35. Siáⁿ chai kéng-chhat bô sī-hui, Bē-su chhin-chhiūⁿ tú tio̍h kúi, Khòaⁿ-kìⁿ ha̍k-seng ti̍t-ti̍t thui, Tâi-oân kiáⁿ á chin khek-khui.
36. 學生理性攏真乖， 警察心肝有影橫， 硬拖硬𨂾腫歪歪， 攏總掠去籠仔關。	36. Ha̍k-seng lí-sèng lóng chin koai, Kéng-chhat sim-koaⁿ ū-iáⁿ hoâiⁿ, Ngē thoa ngē làm chéng-oaiⁿ-oaiⁿ, Lóng-chóng lia̍h khì láng á koaiⁿ.
37. 學校教官來關心， 其實心肝若烏熊， 威脅監視就愛忍， 意志消磨大海沉。	37. Ha̍k-hāu kàu-koaⁿ lâi koan-sim, Kî-si̍t sim-koaⁿ nā o͘-hîm, Ui-hia̍p kàm-sī tō ài lím, Ì-chì siau-mô͘ tōa-hái tîm.
38. 老師恬恬分隔界 白色恐怖閣再來， 目屎干焦吞腹內， 相攬相抱聲聲哀。	38. Lāu-su tiām-tiām hun keh-kài, pe̍h-sek khióng-pò͘ koh chài lâi, ba̍k-sái kan-taⁿ thun pak-lāi, Sio lám saⁿ phō siaⁿ siaⁿ ai.
39. 向時烏道閣來亂， 社會議論攏共漩， 精牲白狗毋是款， 咱ê國家叫台灣。	39. Hiòng-sî o͘-tō koh lâi loān, Siā-hōe gī-lūn lóng kiōng soān, Cheng-seⁿ pe̍h-káu m̄-sī khoán, Lán ê kok-ka kiò Tâi-oân.
40. 歌仔暫時寫幾逝， 閣唸曷是無奈何， 毋願結果來講破， 看見學生受折磨。 2015/8/5-11	40. Koa-á chiām-sî siá kúi chōa, Koh liām a̍h-sī bô-ta-ôa, M̄-goān kiat-kó lâi kóng phòa, Khòaⁿ-kìⁿ ha̍k-seng siū chiat-bôa.