心得--《蒙格之道》

 

這本冊主要是2014到2022的股東會談話

老實講，無咱心肝想--ê有較濟「教育」。

當然大部份liù kah袂當koh liù ê老人話，少人會做足十全。

親像，**耐心等待，延遲享樂，降低期望值，予復利效應較久長--leh，是毋是會當活較久leh掠外，家己ê心理，自律攏愛有一定的修練。

這部份，已經有袂少冊有講著--ah。

有另一部份，蒙格有隱隱仔講著，伊的好額袂少是運氣。活了久，忍會牢，機會來ê時，掠予牢。「濟濟人按呢拍拚，猶原是普通人，就是現實。」，所致，降低期待，粒積好的成果，若活了久，凡勢有一寡袂bái ê成績。

按怎看清是機會，這koh牽涉著人ê才調ah。這才調是學校少leh教--ê，靠經驗、靠自我學習。這mā是「能力圈」。Gâu人真清楚家己幾兩重，啥物會做--得，啥物袂做，風險大細家己有一支尺測度，親像忍受50% ê損失。

內底上kài好一建議我想是針對「結婚對象」。講是人生上大ê投資，這百面無人會反對。

做生意誠實，做著ê代誌，繼續做著ê代誌。這是蒙格直直講--ê。

總是，佇投資中國方面，soah真oh看伊對中國無老實有啥意見。

佇中國侵佔別人ê智慧財權，伊顛倒講過去逐家攏án-ne，講伊無研究。袂輸看著中國就變é-káu。

認定中國有大市場，盡說中國好話，但不民主ê部份soah直直o-ló，講中國免言論自由mā會使刺激經濟。

這講法凡勢會使用得彼時中國ê時代背景，總--是，今，敢講會通？

抑是蒙格感覺中國人民無需要，是臭賤--ê。

對伊ê回答，伊講：「我完全無致意無平等。」

這句話以咱人來講敢是「著--ê」 ？

無，巴菲特，比爾蓋茲是按呢欲做慈善？

伊koh講：「愛學習佮中國做朋友，佮無全體制的國家好鬥陣。」

問著烏克蘭hŏng露西亞入侵，講無啥見解，講雙方攏有核武。

較拜託leh，早佇1994年，烏克蘭早to同意銷毀核武，koh加入《不擴散核武器條約》。

蒙格做一个投資人，有影gâu閃議題，這mā是伊認為著ê代誌。

確實，活khah chiah濟歲，hiah-nī成功ê投資人，講ê話人人信tauh-tauh。

就是按呢，阮感覺無爽快，不安。

啥是做「著」ê代誌？套伊家己ê話「有寡代誌咱掠準講咱知，實際上咱攏毋知。」

這心得，毋是tiau-kang掠話骨，去khau-sé一个老人。

阮毋是歧視好額人，毋是tu̍h-lān人好額。

是講伊一句話攏是khōng金khōng銀khōng璇石。

講彼中國一定強ê話，實在袂予人孝孤--得。

全資本主義，完全商人心態這若無佇民主體制內，敢有可能成功？

約翰．伯格捌講真感謝伊出世佇美國。我想蒙格若信輪迴，應該愛知出世佇中國ê機率真懸才著。

這點，定著無佇伊ê風險評估內。

緊去買別个國家ê石油，家己ê先莫開採。一个會反對開筊間ê人，怎會去認同一个獨裁ê國家？

我想蒙格有一般人ê問題，「別人囡仔死袂了」。

是講，這是股東會言論，銅sián味定著ài臭！