向高手學習，借伊的眼界修正家己思考ê破拍。
這是咱讀這本冊上大的感想。
阮的讀冊範圍佮一般人比算是有較大，總--是，佮作者來比ná鼻屎大niā-niā。
厝內有幾本真有名ê冊，《西方憑什麼》、《槍砲、病菌與鋼鐵》、《自由的窄廊》…甚至chia作者的其它冊咱mā捌讀過。總--是，工夫無到作者有chiah厲害的見解。
欲像作者按呢，阮的智商上無愛有伊平方才會用--tit。
閣像伊所講讀冊會使予家己成長，總--是ah，恐驚mā是佇一條e̍h-chiⁿ-chiⁿ ê摸奶巷內nǹg-chǹg、kún-lèng。
阮mā向望未來免閣開袂傷時間佇理財、個人工課場頂ê技巧，甚至是煩惱政治，煩惱選舉選毋著人。
按呢阮就通開較濟時間佇人文方面，就親像這冊第一部份所講ê通識素養。
第一部份掠外，內底講袂少國際、經濟佮政治，尤其是佮中國相關。
這阮真有感覺今年讀過《晶片戰爭》、《紅色賭盤》。
位WTO結構、2008年經濟崩盤、、美中貿易戰之間的局勢，中國一帶一路ê心機分析了真好，阮mā完全認同。
阮ê業務自佇鴻海上班就真理解這中國愛抄人物件，啥物偷--ê上緊，這是文化，欲改變是真oh。冊內所講著wimax，阮正正是國內第一批人接ODM業務—ê，彼當時，拄著經濟崩盤，全世界急欲有一个殺手級ê產品到市場刺激經濟，無待LTE規格定落來，就衝leh行。落尾，mā是死。
LTE出來後，手機仔硬體mā愈來愈好，後來網路效應才愈來愈顯明，價值膨漲緊，人人才趕欲搶市場。
這後來演變做晶片戰爭，中美貿易戰，資訊戰…等等的頭前戲。
當然，阮可能過頭簡省，阮無欲出論文騙點數。
總—是，一路行過來，阮的經驗就是毋通佮中國kap作伙。
正常人是袂放棄的民主。講咱是仝「民族」，拜仝「媽祖」，這攏是情緒、白chiáⁿ無味ê笑詼話，毋值去議論。
Koh講一件代誌，阮佇目前ê公司已經10冬外。早期佇某部門做的晶片有九成的客戶是華為，後來，阮看pān-sè無啥tùi-tâng，就佇2018年10月轉組。
這毋是阮gâu，是求生存ê反射動作。
晶片有後門。美國免人提醒。
你若去讀《競合策略》，冊內就有舉日本用安全晶片鎖牢有認證的卡帶，成功阻止競爭者。Mā利用安全晶片，去判斷人客較佮意佗一種方案，成功搶生意。
WTO無功用，中國做生意閣袂信用--tit，koh想欲做大老。一帶一路四界欲佔人地、搶人水。欲行向太平洋，南海著先愛過第一島鏈。
這是咱台灣的好地理？歹八字？
閱讀是備戰ê必要條件。
咱防衛式民主ê認知、法條閣無夠利。親像「外國人代理法」，無法度有效驚走一寡saⁿ-kha-á。資訊安全部份，竟然無去針對中國，一个欲共台灣拆食落腹ê國家！
甚至咱ê思維批判mā無夠。
像郭台銘講伊做總統GDP變雙倍，是按怎鴻海ê股價攏是死豬仔價？
中美貿易ê因端濟濟台商毋是轉來台灣，無，就是去東南亞。
2005年許文龍hō͘中國逼，一寡高階幹部hŏng掠，伊才公開主張兩岸一家親，o-ló反分裂國家法。
2009年群創併購奇美電。阮會記阮部門大頭家引郭台銘ê話，「許文龍kan-taⁿ ē-hiáng釣魚佮giú bâi-óo-lín。」
這講起來真諷刺。
郭台銘ê人文素養不如許文龍。
講著林志鈴ê優雅，伊出喙就叫人穿較少--leh。
這讀冊心得毋是tiau-kang oat來講這人品。是leh想咱當時才會使有較正常ê候選人，咱會當好好仔思考解決問題ê方法佮方向。
行向「彼岸」。
以上
沒有留言:
張貼留言