量其約佇2021年，11-12月開始聽《大人學》，彼時咱差不多逐工聽，一聽就牢。彼時，就想咱若較早知影這，現此時無定遇著的困難就較少ah。
內底濟濟的實務知識攏是會使直接用佇工課場、百百款的人際關係佮學習等等。這講是實務煞學校較少leh教，甚至是無致意。
阮個性死執的因端，造成學習的過程閣拄出社會時袂少撞突。這攏佇聽pubcast時，學習袂少，有真濟開破。
後來，阮嘛是收集in過去出過的冊。甚至in mā講過代誌列一寡「原則」去執行、遵守。總—是，這需要時間、練習，甚至是愛修正合家己的條件抑是環境。
即本新出的冊內容，有9成外攏是pubcast的內容。每一字一句攏真簡省，有力草，論述完整oh愛人來補添。
以阮個人上有感覺的兩个詞就是「冗剩」佮 「局」。
有冗剩，生活抑是工課就有加真順心，會使做你想欲做的代誌，做一个自由人。
通人攏欲時間佮金錢的冗剩。是講，按怎才通冗剩--leh？
有一个穩定的穡頭、月給，知影投資家己，予家己逐工、逐冬閣較進步。這嘛是需要時間的復利。
理解家己，認捌家己的缺點，無法度修正就避免，知影家己會按怎死，就閃。放低家己的自尊原學習、佮人好鬥陣，喙水愛有應對毋通chhì-giâ-giâ 。加一个朋友較好加一个對敵。人脈是真好的撬仔，捌一个人有時較好你追求閣較gió-toh的才調。
做正確的選擇，勇敢去挑戰，鯽仔魚釣大鮘這是無對等的凸性「反脆弱」特性。咱éng-éng驚惶，心肝頭搬歌仔戲內底攏是負面的後果。窮實，真濟攏袂發生。就算無法度達成想欲欲的成果，損失攏袂khài大，這失敗的過程學著的物件閣較趁。
這攏是看咱用啥角度來看。時間khiú長，咱就會法度kā這沓沓滴滴的代誌連起來。這攏是看咱的態度，咱如何去激去酵咱的動機。
建立一个系統，去維護去改善。這系統是一个工具，多元的心智工具予你去對應生活抑是工課上的問題。
斟酌共想，咱人遇著的問題模式袂超過100種。內底牽涉的「局」，嘛是有一定的規則抑是理路。
這理路看通，代誌欲處理就會順序。
台語話「有局」是有趣味，心適的意思。
人生欲過了會siak-phāⁿ、爽快、自由，就愛理解「開局」、「造局」、「布局」佮咱人「格」。這也是這本冊的四大部份。
阮有限的經驗這四大部份若欲練，無定是照步來。有時是開局先，有時是造局，無定佗一个愛先做。阮35歲偌才知覺阮功夫地基無在，雖bóng免挖起來，總是紅毛塗愛重鞏。
相信思考，敢改變。這句講的就是態度。
思考的系統若好，啥物a-sa-puh-luh的問題mā攏袂phah咱袂倒。
這2-3冬，讀若袂管理的冊。聽大人學的pubcast，怙1.5倍速度聽算是復習，mā親像替頭殼寫入原則。
橋水基金創辦人Ray Dalio捌寫一本冊《原則》阮真佮意。
阮mā刁工根據過去的經驗包括閱讀抑是親身的體驗列一寡「原則」，目前41條。阮kā印出來貼佇浴間、大門，電腦銀幕前佮khǹg佇皮包仔，通好提醒家己。毋敢講家己做會到百分之一百，上無，應該袂比昨日的我較毋成大人才是。
1 ☆大量閱讀，閣有輸出。☆
2 ☆內化知識，實際行動。☆
3 ☆列表清單，定期巡查。☆
4 ☆專案管理，一人公司。☆
5 ☆不斷改善，正面循環。☆
6 ☆本質優先，簡單生活。☆
7 ☆刁工練習，成做慣勢。☆
8 ☆相信思維，勇敢改變。☆
9 ☆時間分配，協同合作。☆
10 ☆情緒穩定，高效決策。☆
11 ☆運動健身，定期捐血。☆
12 ☆原始飲食，加啉茶水。☆
13 ☆毋驚犯錯，風險管理。☆
14 ☆知識連結，多方應用。☆
15 ☆貢獻社會，利益別人。☆
16 ☆耐心等待，堅韌磨練。☆
17 ☆科技輔助，多工效應。☆
18 ☆定定試驗，隨時調整。☆
19 ☆不求完美，穩定成長。☆
20 ☆快樂分張，回饋分析。☆
21 ☆享受孤獨，沓沓進步。☆
22 ☆歡喜分張，楦闊人脈。☆
23 ☆正向轉念，認知改觀。☆
24 ☆記錄回顧，調修模式。☆
25 ☆掠尾揣頭，倒踏順序。☆
26 ☆分割項目，先有成果。☆
27 ☆統整連結，拍通底層。☆
28 ☆氣力管理，八二原則。☆
29 ☆規律原則，自由人生。☆
30 ☆順逆複盤，加乘效用。☆
31 ☆繼續累積，時間複利。☆
32 ☆察覺意識，更新大腦。☆
33 ☆利用工具，三觀五覆。☆
34 ☆了解規則，拍破規則。☆
35 ☆建構系統，頭著尾是。 ☆
36 ☆增加體驗，享受人生。 ☆
37 ☆注心一項，看迵全局。 ☆
38 ☆自我覺察，重新連結。 ☆
39 ☆預先規劃，分批執行。 ☆
40 ☆放低自尊，開喙問人。 ☆
41 ☆少閣更好，簡省有力。 ☆
