即擺讀冊心得，是網路讀墨電子冊，a̍h-to無法度買著冊。總是，有一个機會逼家己行向時代的趨勢，去慣勢使用電子冊。
這本冊主人家是阮毋知影--ê。過去阮知「台灣史懷哲」的名，是用佇謝緯醫生身上。
若是台灣盲人教育，就是甘為霖。這攏是佮阮的知識箍仔，大台南地區宣教相關。
這本冊永過，捌有另外2本，冊皮有排頭相，無仝風格。阮露天òaⁿ納錢，所致，猶未提著冊XD，無法度比較。
上尾即本，冊皮是無人頭相，tng-teh手術的相。
你我to知，冊有寫，陳醫師捌手術過眼癌的病人。
有時閣看較眼科無ti-tāi的症頭，外科手術無算啥--lah。
A̍h-nā講外科醫師袂曉開刀，會hŏng笑--死。
選舉是人求--ê，毋是講hŏng逼--ê。
退選是真知家己的性地佮彼時黨國的漚臭。
另一本是繪本，是教會公報社出--ê。有閒才閣來掀。
這自傳，阮筆記有列四點。
1. 歷史背景，戰前戰後
2. 行醫生活，宗教啟啟蒙，大愛
3. 求學過程，學習力
4. 人生的看法
第一點，寫著袂少日本，黨國時代的背景，無論是美國大空襲、台灣人日本兵、二二八歷史、國民黨的選舉文化，這攏佮阮過往的閱讀真bâ。
第二點，第三點，有影精彩。按怎位老爸彼句「考試三十二名，你掠做排名落後壁愈好？」到「考牢，就去讀。」這做老爸的心情，阮真理解。
時代背景加上家庭經濟，欲讀冊錢欲是佗位借？
彼時政府mā無通借！今，有影是進步--ah。
離家去外口讀冊，老爸彼句「萬事細膩，厝內代免掛礙，厝內人濟會互相鬥相仝。」這句嘛是阮老爸捌對阮講過的話。
自傳毋但是寫家己，嘛是數念老爸。
後—來，備辦「慕光盲人重建中心」，這大愛嘛榮光老爸。
信教mā是老爸袂khiàn-sńg，沓沓仔接受基督教。阮看來，陳醫師有一个真好的老爸來引chhōa，做好模樣。斟酌伊的人生路，信教無論是做醫生的過程，抑是家己面對病痛，抑是家己查某囝過往，伊攏共一切好歹代歸予上帝，有信心去面對。
第三點，學習力。伊毋但定定參加國外會議、進修、學習上新的技術，閣會發明、改善工具予閣較濟得著利益。咱刁工去專利局揣，有影揣有！
第四點：人生的看法「成做一个人，生命干焦有使用權，無所有權。」
阮teh想長老教會的「 莿帕互火燒」 的記號。咱著有這克艱難的信！
1982年高俊明牧師佇坐監時寫一首詩〈 莿帕互火燒〉：
莿帕互火燒，燒到真厲害，總是無燒去，猶原的倚在；
炎火一下過，伊就閣發芽，春天一下到，伊就閣開花。
莿芭互火燒，總是無燒去，聖徒受苦楚，猶原無餒志；
炎火一下過，伊就閣發芽，春天一下到，伊就閣開花。
莿芭互火燒，總是無燒去，教會受迫害，反轉愈興起；
炎火一下過，伊就閣發芽，春天一下到，伊就閣開花。
咱著愛勇敢，為主來前進，苦難若愈大，咱著愈堅信；
炎火一下過，伊就閣發芽，春天一下到，伊就閣開花。
有基督的信靠、領chhōa，拚勢向善，利益散兇人，消除世間的無平等。
陳醫師的囝婿林逸民醫師，今，猶原佇仝一个所在看顧患者。這自傳猶未完結。
阿門。
施義勝，嘛是盲者。冊內有講著這人。
阮箍仔內朋友有一寡，其中施仔俊州是咱好朋友，好老師。伊捌寫一首〈白紙〉詩，講施義勝毋捌筆無水--ah，koh直直寫，連寫七工才知。寫出來--ê是白紙。
沒有留言:
張貼留言