寫”民報論壇”感想

<<寫”民報論壇”感想>>

Ui 舊年2014底開始佇民報論壇寫評論，其中有欲超過十篇是用台語寫e，這是ka-ti 生命e kha跡。雖bong，可能袂影響tioh goa濟人，但是文章e生命 的確 khah 長。用khah懸e標準來看，hoan-se hia e 文章koh無法度算是評論。總--是，人無想hiah濟，對任何不公不義e代誌，寫幾字贊聲是合該然。Na是時間允準，咱to 來做。是lah，有時我有giau-gi過寫這欲創啥？時間成本kam有值？這我無答案。咱to 來當作是kati人生e工課，替ka-ti 來修行。

寫che 主要有幾e 目地，第一：予koh-khah濟人了解政治議題kap現況，當然ai看有台語e人，ia者是有興趣e人才會來看。算是咱欲創造 1 e無仝koh 少人看e閱讀文本，內底的確有khng 寡我e意念kap想法。永過，咱台語攏是teh寫詩，寫散文，寫文學評論，寫小說，khah少寫生活，政治事項。怪奇e是，選ki e時，thang人 long leh 用台語poah感情，有影當作台語是草紙仝款，用了to tàn-hiat-ka̍k。第二：表達ka-ti e想法，磨筆，文字化予ka-ti e 思路koh-khah 明，用筆尖tu破這au臭e政治烏布，這才是現代台灣需要e。Ma是欲tiam靜革命，文字革命，網路革命e力量。通人long出來hoah聲，au政府袂倒？騙siau--e？第三：是hoo台文koh-khah見光，了解台語應該攏會使佇逐種議題來hoah聲，anni台語才有法度救，傳落去。需要有看e人，需要有寫e人，需要有分張e人。

網路應該是振救台語文siong重要e 一步棋，未來資訊欲oa靠紙本，是死路，咱欲死thong hainn e 台語愈免講。Soo-pai，咱真看重有民報電子論壇chit e平台，na無ka咱刊e時，咱嘛真掛意。捌寫批去ka講，m-koh，人無ai ka 咱回應。當然Facebook，ma是 1 項重要e 媒體工具。予咱歡喜e是，有人真認真ka咱來讀，koh捌有無sek-sai e朋友回覆指教，koh有陳豐惠姐佇教師研習營，教『當代e台語傳播』時，有提出來討論，這是咱向前行e力頭。有人讀咱e物件，表示咱袂毋是孤單e。

一開始提筆寫七字仔是欲練台文，聲韻，寫詩是欲寫歷史，寫日記是khioh gin-a 時e記持，寫論壇是為欲戰鬥母語e權力。koh有是展現母語會使用佇濟濟無仝e所在，母語欲活落去，應該是ui身軀邊e日常事項來講起，記錄。欲講文學性chit點，咱可能功夫koh無到。

領嘉義文學獎e時，咱著獎發言，捌講過欲繼續寫，甚至寫散文kah小說來展現台語e sui kap 文學。咱chit 2冬，有讀chiah濟台文chheh，內底khah濟是詩，散文kap評論。定定感覺台文一定陷佇悲情歷史，古早生活e 空間，毋是真chiah自由，ah真ma是事實。咱to 想 寫寡無仝e物件才是。Tam-poh-a寫作e感想記錄，留予後日chiah koh 來比較chit路行來e景緻有siann無仝，是講，咱to ai堅持。

2015/9/16寫

2015/9/17完

黃健庭繼承宋省長：母語殺手

<<黃健庭繼承宋省長：母語殺手>>

國民黨殖民洗腦教育，自以前kàu chìn iáu-goân 無斷過，而且是愈來愈大膽。咱台灣人有覺醒 ê mā是少數，少年á可能比例khah濟，總--是，伊濟濟數已經袂曉講ka-tī ê母語ah。講這ē-sái去了解國民黨霸權án-chóaⁿ禁母語，剝削母語ê教育權。現今koh m̄知悔改，軟塗深掘，kan-taⁿ選舉時chiah會làu 2-3句，欺騙社會，國民黨有影是看台灣人無目地，欲壓咱一世人做伊ê奴才。

筆者佇民報寫chiâⁿ濟有關政治人物對台語(母語)教育的感想kap看法，寫好寫bái lóng是為tio̍h 欲tháu氣hoah聲，無，欲死ê時無人知，心情put-lih-á沉重。M̄知會有gōa濟人看見，koh會出來tàu贊聲。人數是1 ê指標；語言ê歲壽。

台東縣長黃健庭佇11號國中小校長會議講：『台灣發展本土語言是錯誤的教育政策，他強調，本土語言是家庭教育的一環，卻讓台東原本就不多的教育資源再遭到瓜分，結果本土語言與英語都學不好，放眼國際也欠缺競爭力。在現狀下，每筆預算都彌足珍貴。』

這款縣長有影是國家ê敗害，m̄捌字koh無衛生。第一：目前ê教育有需要改進ê所在，m̄ tō去改善soah顛倒牽拖。第二：目前ê母語教育是長期國民黨霸權ê關係，ka-tī soah袂歹勢，koh再剝削原住民母語教育，這是siáⁿ-mi̍h道理？Koh sak hō͘ 家長？有影無做1 ê縣長ê格。第三：除了殖民政權，無人願意放sak ka-tī ê 母語去學別人ê語言，而且目前本土語言課程kap英語，甚至kap中文根本無teh比，佗位來ê資源相搶，實在得tio̍h國民黨真傳，白賊kap烏西(按：判刑6個月)。第四：濟濟研究指出學好ka-tī ê母語對學第二外語並無衝突，甚至有幫贊。黃縣長kám有請教語言學者？Iā是趁機會欲施展壓力hō͘ hia ê 校長mài 放資源hō͘ 本土語言教育。語言平等權已經m̄是新ê訴求，國外已經濟濟有立法去保存，咱政府官員soah 當作伊pùn-sò。

Koh 再看黃健庭2013年佇1 kái 活動所講ê話，『台東縣是一個多元文化族群的地方，在全縣不到23萬人，就包括閩南、客家、7個原住民族群、外省及新住民，擁有多元的族群，可以說是台東的特色與驕傲，也是族群融合展現最佳的縣市，語言是文化的根，尤其根據專家學者的調查，全世界語言每年約以5％的比例在流失，因此，我們必須要尊重、欣賞別人的文化，並更加重視自己語言及文化的傳承。』 這的確是政客雙面手法，taⁿ，siáu鬼á殼thǹg –tiàu，現出原形niâ。無，tō kín khì khòaⁿ i-seⁿ。

馬英九，郝龍斌，洪秀柱，宋楚瑜kap朱立倫佗1位，選舉時無講台語？Poa̍h感情騙選票是政客熟手ê招數。其中洪秀柱佇2009年koh thâi台語認證預算，現準伊koh leh講台語ah，phóng屎抹面無知臭，為tio̍h權力kap利益，認人做pē mā 會做tit。這種政策手法來看，he是in有策略性欲長期洗腦，taⁿ，已經kàu最後1里路niâ。是講，lán ka-tī kám有知覺母語ê重要性？願意加講母語，學習母語寫作？無，lóng是hoah心酸，koh是1篇遺書。

筆者有寫過一篇文章<語言平等法才是轉型正義第一步>，親像國內無chit款法，是欲án-chóaⁿ保護咱ê文化kap財產？國民黨霸佔咱ê土地成做in ê黨產，這in koh無滿足！看身邊ê朋友講母語ê人實在有少，會曉寫--ê 欲無幾ê。國民黨早tio̍h算好好ah，無母語，tō無民族意識，án-ne，任何人袂koh質疑in 非法佔領，統治，袂koh giâu-gî過去二二八事件，白色恐怖等等慘忍手段。因為講hia 『本土語言』是粗俗，sông，下賤 ê象徵。對土地 ê 感情薄，m̄知 ka-tī tō 是主人。Hām講話tō無公平正義，其它ê權力 koh 愈免講。

民報：語言平等法才是轉型正義第一步

民報：蔡英文推sak「台灣學」有影ia̍h-sī無影？

民報：Ùi柯文哲看台語發展ê悲慘

民報：中國sông報

民報：賴清德，請支持母語教育

民報：爭取台灣語文教育權tī 11/29日

民報：Hō͘咱台語教育，m̄是hō͘咱chhi-pho

民報：台語正音，正港台灣人？

民報：台語文ê消滅

空白e紙

<<空白e紙>>

毋是刁工thun-tah伊純情e軀體

1字1字溫柔chhiah入去幼白e面皮

聽講古早原住民e風俗

彼是1 e gin-a成做大人e 證明

若是會使我嘛想欲寫佇khong e 天

寫予眾人看

He 是一片闊bóng-bóng e圖紙

可惜我peh袂hiah懸

若是會使我嘛想欲寫佇透光e 海

寫予眾人看

He 是一片厚tut-tut e圖紙

可惜我siû袂hiah遠

干焦1張1張寫

深深刻

按呢總有一工

寫予你e批

你會看見

看見我大人e證明

2015/9/14

咱就愛做家己

<<咱就愛做家己>>

啥若大樓直直起，到底是發生啥物代誌

阮細漢的記持攏總走無去

阿，彼囉水牛佮白翎絲走去佗位bih

日頭親像佮我咧相辭

無，怎樣逐工攏是烏陰天

政府徵收講欲予咱一筆錢

無欲答應閣袂使得

若是反抗，怪手直接駛來挖地基

用命共拚伊毋插你活抑死

目睭發火攏是錢，啥物(mih)人生道義

彼攏是伊選舉時喙瀾水

雖罔政府橫霸若精牲

四跤落地就欲共人欺

定是咱傷軟食才會按呢生

一時奢颺（tshia-iann），彼攏真虛微

啊，咱想做家己

共土地傳予囝兒一世紀

閣再百百年

認真拍拚莫失志

正義到尾會出頭天

毋通靠勢就來無細膩

出賣家己，爸母的記憶

阿咱就愛做家己

共土地傳予囝兒一世紀

閣再百百年

2015/9/13

時間控制

通人一日kanta 24 小時，有koa”成功”人士long出chheh koh 有演講講伊是an-chhoann成功，an chhoann利用時間。利用時間確實是一門學問，有e人是講kah 一日袂輸睏無3，4 點鐘，he不是正常人過e生活。尾a，身體出問題e時，koh 再出chheh講伊是an-chhoann對抗癌症，he 的確是精神錯亂。讀chheh e人有時陷佇hit_lo 人講e絕招撇步，soah 無看見人是an-chhoa行出--來-e，有時人是開偌濟時間，偌濟錯誤改正koh有giam-nge e自我管理，紀律discipline。咱有讀過幾a 本chheh leh 講che。嘛實驗過，成功是有撇步e。當然，方向ai確定清楚，選擇hoo好，放感情，無顧一切e堅持。是講，濟濟noa_thau，現實因素，尾a，習慣總是會斷去。若講咱無成功人士e範，有影是無志氣。Ai 講每1 e人 long有伊家己e選擇kap生活，koh再為ka-ti解脫。an-ne，講人活了khah開活，毋知有影無？

欲結婚ah，時間e分配用想—e，有影會驚。咱毋是好額人，ai 工作，逐工搬家kau 高雄上班。一透早to出門，佳哉會當準時下班，不過，暗時到厝ma 七點ah。搬車時，有利用時間讀chheh 想寡寫作e 素材。Che 算算leh，一工嘛欲11點鐘過ah，若加一工睏眠6點鐘，koh chhun 7 點鐘。Che 七點鐘，ai 完成kah 厝內相處時間，粗算2 點鐘，hoo家己e時間4點鐘，內底有讀寫時間3點鐘，kap體能訓練1 點鐘，koh有其它li-li-khok-khok—e。講an-ne，毋是kai完整，咱野外e活動，peh山，koh無算入去。序大人身體無講kai 好，kha頭hu想嘛知以後che 會食力，嘛是咱無法度閃避e。佇傳統社會，序大人e健康咱定著ai開時間kah伊照顧。人定講序大人身體勇健，是囝兒e幸福，koh免講去未來醫療健保資源e問題，che 算是hoo咱做1 e 啟示ai 顧好咱ka-ti e身體。

做電子業欲八，九冬，嘛知覺未來經濟無siann樂觀，欲拚死拚活趁大錢是愈來愈少，嘛袂合現代e經濟模式。定講ai chhoe 出路，總是，毋hia簡單，欠才情，無方向long是重要因素。目前會使過活，買厝chhoa某是祖公媽有保pi，運氣好。 Ah 若是以後，誠害，咱koh leh思考方向。有向望會使做1份咱真心感覺有價值無iau死e工課，事業。講bong講，有影難，嘛是咱無才調，iah是年歲有ah，毋敢衝。咱ai檢討。

有2本chheh，咱有深記在心。一本是『斷，捨，離』，翻台語應該叫，放sak，斷根斷心，離緣。咱佇日常生活定定有chit款 e例。Hit 時看了chit本 chheh，毋知hiat 掉偌濟mih-KIANN。省--e，毋是kanta空間nia，koh有心靈上解脫是無塊講e。“有限“ chit種想法，咱khah定khng心內，siann-MIH先做，後來做，甚至是放予去，咱to ai想hoo清楚。另1本是『下班後e八點鐘(無確定)』，che 咱有記佇心內，不過，堅持是上大e問題。是講，未來結婚了後，koh毋知會an-chhoann演變。

寫che，可能嘛是咱人可能毋是欲追求”成功” e名，是欲hoo 家已對家己e未來，一生有khah好e交代。算是檢討，ma是提進前做準備未來e事工。 2015/9/11