火燒百合花-予柯旗化
<<火燒百合花>>
佇日本時代出世
行過錯亂ê時代交接
走閃過二二八烏暗屠殺
煞閃袂過白色ê罩霧
你ê名，印有故鄉彼片土地
In當作是反抗ê天命
無影無跡激起in拗蠻ê死豬仔性，橫霸
將你青春嗽甲慘白
拳頭母不時唯薄板ê身軀招呼
若毋是厝內某囝ê牽掛
那有法度渡過火燒ê日子
若毋是欲見證故鄉山坪頂ê百合花，陪伴風姨舞跳
那有法度忍受thún踏你ê人生
無，是全規家伙人ê人生
細漢查某仔喂你寫ê批信，拆破老母ê不得已ê隱瞞
無想欲予in閣有出跤出手ê藉口
「台灣一定會獨立，為著迎接這工，所以我才活咧」
17冬籠仔內生活，即句話
為母親，為某囝忍耐，堅持
雖然無法度親自掖種佇子弟教育
一本新英文法，顛倒流傳造福
予偌濟知識份子行出國際
今仔日，有偌濟學生囡仔閣知影你
這段歷史，你所受ê苦難
誰人知，誰人毋甘
你無一句怨嘆煞微微笑
你ê笑容敢是說你已經做完你該做ê代誌
2014
/ 9 /12
沒有留言:
張貼留言