無寫袂使得？

 咱mā m̄是專職寫作，本職是leh做科技業，所寫ê題材koh是偏文學類。因為án-ne，無直接ê連結，欲寫作éng-éng ài開真濟時間，mā需要真濟時間來閱讀。​

​

這村上春樹ê冊就捌講伊án-chóaⁿ培養伊ê寫作慣勢，三十gōa冬來逐工lóng維持仝款ê作息，逐工寫固定ê字數…等等，講這是一場體力ê考驗。​

​

咱看真濟台文前輩出冊，éng-éng mā是到欲退休ê時，創造變少，出冊ê意願mā變少，（當然有例外，蕭平治老師就是），hō͘咱感覺真拍損，mā點出出版ê困難kap寫作ê喟力欲維持無hiah簡單。​

​

當然lah，應該講任何語言寫作lóng仝款，母語koh-khah困難niâ。​

​

現此時，咱來講欲寫mi̍h-kiāⁿ ê時，欲有好好á ê時間靜落來坐佇冊桌前寫是無啥可能eh。Gín-á知影我tī厝--lìn，就ē不時叫阿爸，欲橫心當作無聽著，mā是無可能。​

​

Chín閱讀kap寫作百分之99 lóng是坐車、半暝、bâ-bū-kng進前完成，寫作m̄是真khin-khó ê代誌。咱八月有一个講座題目〈母語寫作是人生上好ê投資〉，照理講，咱資歷koh真淺，人請去演講he是咱pn̄g文學獎ê名，就親像村上因為文學獎提著作家ê門票仝（歹勢，我m̄是欲kap伊做對照，叫是家己gōa厲害。）。題目是咱定--ê，mā真心án-ne想。總--是，世間無hit lō免開時間免喟力就有好ê成果。​

​

耐性kap龜毛是寫作人ài有特徵。​

​

可惜真兩項lóng無，逐pái欲寫lóng是有靈感來，幾字phiat phiat leh就完成。講án-ne，確實無負責任，咱本底就是寫欲敨氣eh，請諒情。是講靈感無可能直直來，寫一半koh m̄願án-ne放伊soah，chŏaⁿ 潦落去，逼家己寫。阮某講我leh寫mi̍h-kiāⁿ ê時，人變kah真神經，害伊mā tio̍h-che，睏眠chia̍h-si̍t lóng chiâu變調。​

​

龜毛leh？這項我愈無。通常人放屎了，kha-chhng會洗hō͘清氣，用衛生紙chhit ta。我知這種例m̄是真好，歹勢，無koh khah好ê例ah。我一篇寫了，就像腹內ê怨tháu了，完全無想欲koh看，袂輸是斷往來ê友情。雖bóng會校正一、二擺，錯字mā是真濟，字句mā tiāⁿ-tiāⁿ袂順，lô-chip無通ê問題。​

​

咱mā讀過袂少教人án-chóaⁿ寫、án-chóaⁿ讀ê冊。落尾，mā是hō͘家己ê貧惰拍敗。向捌看過我ê文章ê人，講一聲歹勢，hō͘ lín感覺真chha̍k-ba̍k。​

​

為啥物無愛停起來，khah規氣？應該是我話無講soah，bē使得，可能我koh有tām-po̍h-á喟力，相信母語寫作是人生上好ê投資。寫好寫m̄好，是需要練習，甚至是tiau-kang練習，che lóng m̄是一冬二冬ê代誌。​

​

為啥物無愛停起來，khah規氣？聽著gín-á koh leh叫阿爸，我想che mā是真大ê原因。​

​

2021/3/12​

​

〈投資冊單〉

 #整理冊櫃整理人生

〈投資冊單〉

咱40ah，咱趁放假ê時緊kā一寡代誌整理，回顧，kap重新規劃，是欲為tio̍h人生後半場40歲。​

​

咱真濟過去做無夠好--ê，欠缺自律，欠缺知識lóng盡量徹底反省。人ê喟力總是有限。現此時，思考是siōng好ê時陣。​

​

退休，是咱這年假思考siōng濟ê代誌。咱2020年前陣á mā開袂少工思考，過去學校無人教，咱人koh pîn-tōaⁿ，無hit lō意識，致使才慢開始致意金錢chit項代誌。​

​

這三本冊《金錢超思考》，《慢慢致富》、《當代財經大師的理財通識課》是仝一人寫--ê，手法真簡單，無困難ê數學，是siâⁿ好ê理財基礎智識。真拄好，chia三本綠角都lóng推薦寫序。咱māán-ne重新檢查收入、支出、所有ê保險，計算投資風險kap可能退休ê年歲。​

​

Khêng-si̍t，這lóng是基本數學niâ，mā開咱袂少時間來回測度，siōng重要ê是自我要求。A̍h nā講tio̍h自我要求，另外三本冊《有錢人想的和你不一樣》、《為什麼他們擁有億萬財富》、《有錢人與你的差距，不只是錢》，就thang解釋siáⁿ是自我要求。咱若欲一本讀，讀《有錢人想的和你不一樣》就好ah。​

​

另外一本《花掉的錢都會自己流回來》予咱理解「投資」ê概念，簡單ê道理無簡單，án-chóaⁿ用錢比《金錢超思考》講koh-khah幼路，mā真推薦。​

​

Chia ê冊是基本概念，今，40歲重新學起。接sóa落來，就有法度認捌án-chóaⁿ實際操作。​

​

另《上流老人》chit本冊是日本人寫--ê，就ká-ná是寫予退休生活ê《斷捨離》，khah óa心靈層次方面。40歲離退休koh真遠，我想應該ài佇投資理財khah積極khah tio̍h。總--是，有時錢項歹控制，咱tio̍h ài控制kap理解咱ê心靈。​

​

欲較早退休、成做自由人敢有hiah簡單？​

​

這ài實際操作kap學習，咱koh知綠角推薦另外一个人寫ê三本冊《定期定值投資策略》、《智慧型資產配置》、《投資金律》，chit三本真燒頭殼。​

​

總--是，錢敢有hiah好趁？​

​

“你開佇玻瑰ê時間有gōa濟，伊就開gōa súi” 。--小王子。​

​

咱40ah，chín開始好好裁，應該有法度栽出一蕊真súi ê玫瑰。​

​

寫che mā真向望，想欲做社會運動ê熱情ê TG人，趁錢渡三頓lia̍h外，知影chia ê知識kap常識。​

​

Nā有心適，mā真歡迎saⁿ-kap研究。​

​

整理冊櫃時，簡單幾字記錄，khêng-si̍t lóng khǹg tī塗kha，ǹg-bāng以後有法度換一間khah大間ê冊房來tūn chia ê冊。XD 。

〈台語作家-陳金順〉

 #整理冊櫃整理人生

有時作者kap伊ê作品有時差真濟，這tī台語作家身上ká-ná較少leh發生。​

​

咱第一pái kap金順兄應該是2014年台文戰線會員大會，hit年開放m̄是會員ê人參加，咱才有機會koh再進一步接觸。​

​

Khêng-si̍t，咱mā對金順兄真hòⁿ-hiân，真想欲認捌伊。​

​

因為伊退我ê稿足足連續退4-5 pái！​

​

咱真厚面皮，愈退我愈ài寫。（好佳哉，hit時雜務無hiah濟，咱才有時間繼續mî-nōa。）​

​

咱感覺伊ê人做代誌有伊ê堅持，袂chhìn-chhái，烏白是非有真明ê界線。​

​

早tī見面ê時，我就差不多kā伊ê作品收集完，mā lóng讀了。這是咱對作者一貫ê作法。Ùi伊寫作ê記錄，就知無輸一般華語作家ah。可貴ê是，ka-tī辦雜誌，taⁿ 寫作投稿lóng m̄捌hioh。前陣á開講，講欲繼續讀學分班ê代誌，咱心肝leh想，伊真正是勇kha馬！​

​

咱tī體育場遇tio̍h伊比 tī台語場koh-khah捷。咱想tio̍h村上春樹，欲做作家有影ài規律，練身體kap練筆仝款ài致意。路，才行ē久久長長，m̄是欲ùn豆油。Chit點thang好hō͘咱學習kap思考。​

​

母語長長久久，需要koh-khah濟人參與，mā需要作家生產koh-khah濟作品。​

​

好ê作品是ài時間粒積--ê。

〈台語作家-張春凰〉

 #整理冊櫃整理人生

咱捌寫過一篇文〈無台語兒童文學，敢有台語ê未來？〉@教會公報 3438 期，思考台語ê傳承。​

​

佇厝--lìn，咱lóng kā gín-á講台語，in台語mā真gâu講比大人khah gâu，是講無教伊華語，伊soah mā講kah siah-siah叫，án-ne去上幼稚園恐驚ē kā台語全放袂記。​

​

Lóng看chit二、三冬台語繪本愈來愈濟，敢有法度延續落去，有影ài靠父母lah。父母有意識，án-ne就會有需求，出版社mā才會出版khah濟ê母語冊。​

​

所致，做人父做人母，公媽--ê，hō͘咱ko͘-chiâⁿ一下，趁新年將紅包減三-四百換一本台語冊予gín-á kap孫á，我想真是真好ê投資才tio̍h。​

​

無，食老無人kap咱講母語。​

​

張春凰老師應該是我知影上推sak kā世界文學翻譯做台語ê人，利用共筆集合眾人ê力量出版袂少ê gín-á故事。另外一个團體是5%計劃。​

​

咱捌看伊冊後預備欲翻ê清單不止仔濟，落尾，m̄知敢有翻完無，咱無siáⁿ清楚，nā有友志知è，才tàu相報，勞力。​

​

翻譯是一門學問，目前lán khah leh做ah，我想是真phah-sńg ê代誌。Khêng-si̍t，翻譯ē-tàng kā台語sak koh-khah遠leh。​

​

為siáⁿ-mi̍h SIRI bē-tàng講台語？Google bē-tàng翻譯台語？​

​

成做一个工程師來講，這代誌是kín-choa̍h-bān ê代誌，因為有市場tī hia，準講台灣台語死亡chit件代誌應該mā是會發生，欲成做作家ê人千萬m̄-thang看翻譯無。​

​

咱買tio̍h chia ê冊mā是機緣，m̄是欲展po。是koh-khah展現éng-kòe台語出版真oh，現此時是siōng好ê時陣。​

​

咱tō緊tàu相thīn，hō͘作者寫koh-khah濟，翻kah濟作品。向望，每一个gín-á lóng ē-hiáu講母語。

〈台語作家-周定邦〉

〈台語作家-周定邦〉​

#整理冊櫃整理人生​

Kap定邦兄熟sāi ê故事khah濟，在咱看來是奇人，欲40歲才入去台灣文灣館食頭路。無為別項，為台語，為唸歌。​

​

另外伊koh ē-tàng tī體制內做母語運動，這是我感覺伊siōng厲害ê所在，嶄然kap大部份（母語）教師作家、母語學者作家無仝。即點koh thang hō͘ 想欲行即條路koh驚iau--死ê後進thang好參考。​

​

咱是佇2014年世界母語日佇政人冊局就看tio̍h伊本人，人講話真正氣，不時喟力十足，論堅持，做代誌規劃，袂死執是咱多年來ê觀察。​

​

Nā kā無出版翻譯ê劇本、所編ê台語冊、無出版ê唸歌算入來，伊創作ê路m̄捌停，這就是咱心肝頭做一个「作家」ê形象。​

​

創作多元，詩mài論，咱mā讀過伊ê小說，koh有戲劇，布袋戲，koh有少人創作ê七字歌á，hām gín-á唸謠mā有。​

​

Nā讀過定邦兄ê作品，才知家己台語有gōa低路。​

​

有人講正範無正範，用字無重要…等等ê理由來nôa家己ê欠點，這khêng-si̍t已經失去語言ê人格ah。Chit點hō͘有心欲學台語ê人thang好思考。​

​

2017年咱捌kap定邦兄學月琴，咱khah不成材，無法度學好，感覺真歹勢。Koh 2018年參與100 phō͘唸歌筆錄，咱負責一部份，mā是舞kah li-li-lak-lak，佳哉伊kap凱--哥收尾。Mā期待接sóa另外80 phō͘唸歌筆錄ē-tàng sūn-sī完成。​

​

定邦兄第二人生講欲為唸歌，伊mā出版4套歌仔冊ah，一本比一本khah精彩。​

​

前陣á聽講出版m̄是講真順利，會曉寫歌á kap唸歌á全台灣應該算無10个人ah，這條路無好行，定邦兄soah堅定行--落-去。向望伊thang chhōe tio̍h好êsai-á thang kā唸歌thn̂g--落-來。

〈台語作家-陳正雄〉

 咱tī2014年熟sāi chiâⁿ濟台語人，後來才知是正雄兄用台文筆會名義佇葉石濤開袂少台語講座，咱才有這機會。​

​

正雄兄人重心思，重感情，總是，有時tiāⁿ-tiāⁿ放袂開，soah家己激氣。是苦命詩人。這話是咱相信有某種交陪才敢講。​

​

向望伊心情khah tháu--ê，詩人平常時講話，免帶詩意，有話就講，m̄-thang向望別人有詩情thang理解對方ê心情kap想法，意象留予詩就好。​

​

正雄寫ê詩不時leh tio̍h獎，結構能力是咱做袂到--ê。非常適合想欲寫詩ê人來讀。​

​

咱知影伊想欲交hō͘主流出版社出散文、小說集，咱mā萬分期待。

真拍損，有一寡in-toaⁿ，chôaⁿ放掉！對咱一个愛母語，愛讀冊ê人，koh是好朋友有講袂出喙ê不甘願。

真心向望伊ē-tàng繼續寫，千萬m̄-thang停。

〈台語作家-蕭平治〉

 咱蕭老師出ê冊除了上新2本是前衛出--ê，我看其它ê有錢無tàng買。​

​

咱福氣kap蕭老師熟似，才thang有法度the̍h tio̍h chiah好ê寶。​

​

一冬見二、三擺，逐pái見面lóng真歡喜，歡喜這序大疼惜咱。網路頂不時看老師發表新文章，lóng是為tio̍h beh kā失落ê台語辭khioh轉來，比咱khah拚勢，咱敢理由mài寫khah濟作品？​

​

準講暫時為生活三頓，寫作ê趣味kap向望mābē-tàng chhìn-chhái放牢才tio̍h，這是咱講hō͘家己聽--ê。​

​

有人問m̄知影欲寫siáⁿ，在我想是真怪奇ê問題，敢講m̄捌好好過生活。​

​

看咱蕭老師，家己做老師chôaⁿ家己寫教材，koh用散文解釋諺語，為家族寫史記。