心得 - 張忠謀的自傳

 

張忠謀55歲（1986）創辦台積電。台積電佇2023年佔股市28%。市面上的台積電晶片製造的全球市佔率>55%，其中有超過8成(更高？）佇台灣生產。

阿共仔欲拍，就是愛佮世界5成的國家對敵，這閣無包括其它下游供應鏈佮其它海運、連帶經濟效益等等。

按呢敢無靠chhio？

有人講這是「矽盾」（siliconshield），予阿共仔毋敢拍咱，美國保護咱的因端，這有影是台灣的驕傲佮傳奇，予咱袂無承認--tit。

https://www.eetasia.com/global-top-10-foundries-total-revenue-up-6-in-3q-2022/?fbclid=IwAR2_8pVS8-xHY3jEM-DtSoAtlqPkNuBvsDo6JWybaeodAj5sp8VwDMn73GM

有人講彼是拄著好時機才有創造台積電現此時的地位。

有影，總是，彼時有偌濟人看會出來？

有人偌濟人實際去做，成功的人有偌濟？而且有人願意支持予你去做？

彼時因為戰爭，時局無穩定，不斷搬徙，抑是你敢有方法維持自律的學習，而且知影方向欲行去佗位？

無願意滿足現狀，勇敢伐出去，接受無仝的文化挑戰？這敢免家己有一寡才情？

頂懸一寡的答案有人講彼是父母才情。這予咱想著兩本冊《阿姨我不想努力了》佮《你的努力要配上你的野心》。

老爸的冒險基因及看thàng局勢的才調，凡勢傳予伊，厝內的愛予伊閣較大膽追求未來，這若像著樂透仝款，予伊佇人生加較順序。阮的確真欣羨張有一个真有遠見的老父，細漢真好的閱讀慣勢。總是，毋通袂記，彼時的局勢，無論父母抑是伊家己攏無放棄投資家己，願意去挑戰去揣機會。

人生是不斷的選擇，欲選擇著知影大概的方向。無，行的路是無彩工。

《你的努力要配上你的野心》所講，一般人講的éng-éng攏比做的較少。

佇彼个時局，較富裕的人有法度逃，嘛真知影民主跟自由的可貴。看著美國的教育是遐爾仔開放，接受別人的意見，這才有法度創造，新的科技嘛才有通出世。今，這一切咱攏有矣。你我敢有方法度創造比台積電較好的事業？

愈拍拚愈好運，袂予現實縳死咱的思維，阻礙咱想欲去的所在。繼續增加咱的技巧組合（skillset），機會來的時，敢爭取，掠予牢，毋驚失敗。而且向無仝箍仔的專業吸收智慧，楦闊心靈的地帶。這才是張自傳內底上主要學習的精神。

現此時的產品已經佮張出社會時差大碼，總是，科技嘛是會繼續進步，10冬後欲變做啥款，無人會知。咱目前負責的產品是汽車雷達，彼是用佇自動駕駛。位個人電腦，手機硬體變化遐爾大，軟體的進展、整體效能的提升是用飛的。加上面對阿共仔的威脅，咱欲按呢生存，按呢確定後一代會使好好仔成長？

咱嘛是做一个半導體人，嘛是一个老爸。讀即本冊予咱上敬佩的是張忠謀的老爸。雖bóng伊47歲才閣去讀碩士，煞無猶原揣無適合的頭路，總是，伊培養一个有出脫的後生。因為他的遠見佮教育傳予張忠謀。後來，張忠謀共這精神某種程度釘佇台灣身上，利用家己自己的成功替國家謀取閣較大的幸福佮利益。

咱的確無可能像張忠謀按呢。咱佇台灣出一个張忠謀，凡勢嘛是著樂透仝款。是講，台灣有這「先天基因」，敢有影就一直有好的未來？

嗯，我會好好仔予咱手頭即粒晶片準時上市。閣有好好起造一个好的家庭教育。

以上。1130字