讀人的自傳，éng-éng有真大的欽佩佮反省。
自傳嘛是對家己，對捌佇咱生命牽挽的親人朋友有一个交代，是人生真重要的工程。這是一種表白，一種和解。
讀人的自傳，改善家己的行做（kiaⁿ-chò），綴模範行，予咱成長。
咱人生故事可能無像火星阿公遐唌人，精彩。
總是，透過閱讀，看著別人的人生見本，修正家己的人生。
火星阿公是台南人，閣是讀電機的，雖bóng差14-5歲，生活的背景嘛有幾份仔欲仝欲仝。這自傳予咱真大的衝擊，真濟予咱會使學習的所在。
咱想著國小同學林信榮。伊嘛是小兒麻痺。
自卒業了後，咱就無伊的消息。無的確，伊現此時嘛當咧讀火星阿公的冊。
而且透過即本冊，得著真大的力量。
規本冊位頭位尾攏讀過一擺，掠出人生三个重點佮咱人生一个遺憾。
先講遺憾。作者對父母的恩情佮思念，這予咱想著咱研究所口試隔工，阿爸做工程發生意外，頷頸以下無法度振動，著愛佇床直直倒咧，三冬後身體袂堪得做伊去。在生的時，伊真向望參加咱的畢業典禮，咱煞無愛伊來，驚拖累咱的生活的thian-pho͘h。咱毋捌予阿爸佮阿爸穿畢業禮服，感受怹後生的驕傲。
這驕傲是怹的，無應該是我的。我讀到研究所畢業時，閣真毋捌代誌，想起來真見笑。
厝內人是咱上大的倚靠。這是真的。咱身體機能雖然無啥限制，一寡病疼總是會有。
咱讀國小時，跤捌受傷開刀過。開刀了佇加護病房觀察，麻藥漸漸退，咱疼甲擋袂牢直直大聲哀。老父佇外口聽著心肝頭亂紛紛，伊事後共我講「你攏毋知父母佇外口的心情，真無助。」予咱感受著父母的疼。
後來，咱有囡仔嘛定定想著即件代誌，才確確實實體會父母心。
最近中國肺炎南部湠甲真嚴重，囡仔先佇幼稚園穢著，咱規家伙無一人走閃過會。阿母、二姐煩惱，不時敲來問有物件通食無，孫仔有順序無。囡仔著病毒，伊嘛無咧驚，走來探頭探尾。
做父母的，為著囝孫，會變甲真堅強。發生較大的代誌，怹攏會予你靠。
無論咱已經是做人老爸的人，怹猶原共咱當作囡仔照顧。
早期咱真倒彈，無佮意有即種對待。
冊內作者提李欣頻的話，「假使對方是天使，對你的付出敢需要撙節？」
確實，咱無希望成做別人的負擔，予人當作袂大漢的囡仔。
咱父母無受教育，厝內6个囡仔，咱是上細漢的，唯一的查埔。自細漢，咱就向望趕緊大漢，無愛成做父母的經濟負擔。
做父母了後，這心理才沓沓仔敁破。
怹是天使，雖然我到今猶原講袂出喙。
這嘛是後來咱決心用台語書寫、教囡仔講台語成做是我對怹的恩情。予怹理解怹所講的話是有文字，毋是無水準的語言。
這算是欲報答怹。
火星阿公的冊三大重點：突破限制、積極搜揣人生，不斷修正、慈悲。
第一：突破限制。
講位成長過程，讀冊，揣頭路，創業，不斷實驗人生，一个過一个成就的認證。毋但內底有真濟人相助，閣是老母予伊的文化資產。
「別人會使，你就會使」
「受委屈，愛家己想辦法，毋通向望別人為你出頭。」
「只有你會使拯救你家己。」這成長心態，我是鋼鐵人，我穿太空衣…
毋免致意別人的目光，家己不時寫日記佮家己對話，做家己的教練，甚至用想像四十歲的家己安慰家己。
作者不斷發現家己的關卡，然後共拍通；家己的「黎明之牆」，peh過看見閣較媠的光景。
「出世生本就有限制，試看覓共限制活做一个閣一个故事。」
「別人按怎看我，對待我，是咱咧主意的。」
「我像追劇的觀眾，追家己接紲落來會搬出啥物戲。」
「無論做啥代誌，去一个閣較大競爭的場，才會有磨練」
「一个行袂遠的，毋是雙跤。是伊對這世界，無夠好玄。」
「束縛人的，通常毋是現實，是看現實的角度。」
「凡若有機會，毋通放棄。」
「逐擺共限制當作是起跑點，有一工，就會行到一个你無法度想像的所在。」
…
兩本個人成長的冊《成長心態》、《刻意練習》，有真濟科學數字的干證。我想火星阿公的自傳的說服力無影較輸。
看自傳，實在的見本予咱閣較相信咱會使閣較好。
第二：積極搜揣人生，不斷修正。
咱有注意著作者佇高中時就大量閱讀，追求心智的成長。無師父，就位冊內揣！人生是有限，遇著難關，才有進步的機會。
「人生四界攏有通學習的所在，愛去共揣出來。」
像《人生有限，你要玩出無限》即本所講，主動積極就有趣味、心適去面對閣較大的挑戰。
「有時陣，別人的教示毋是用咱佮意的方式出現。假始共情緒囥一邊，位內底提取養分，世間所有的代誌，攏會使學著物件。」
情緒化會損咱的精神，消磨咱的力頭。認捌家己的情緒，清楚家己的目標、方向。
「去做佮意有熱情的代誌，毋通顧慮傷濟。」這才通會長久，有複利效應。
佇學習過程，「自願」、動機是上大的因素。
為啥物要成長？ 是一个好問題，嘛是一个無好回答的問題。
《學習不會背叛你》有一个答案----因為咱袂當干焦按呢活咧。
卡夫卡講「讀冊假若一支斧頭，破開心肝頭堅凍的大海。」
咱嘛是這5、6冬來加強家己的學習閣閱讀，向望有一工比一工成狀（chêng-chông）。火星阿公是高手思維，十倍思維。咱毋驚比別人憨，上驚巧巧人比咱閣較拚，骨力。
咱佮咱囡仔講火星阿公的故事，怹聽甲足斟酌。伊的人生是透過閱讀，改善伊的成長流程、成長系統。這凡勢會使出一本繪本，而且會大賣。
第三：慈悲。
「共布施變學費，布施就袂白費。」
「與人與善，盡興體驗。」
「成功，予你榮光，失敗予你肥塗。寬容佮謙卑是上珍貴的兩種。」
「假始有人位目頭前行過，需要鬥跤手，請毋通予伊空手離開。」
咱性地窮實真䆀，家己不斷修正，讀周慕姿的冊去理解家己的心理。後來閣讀《人慈》即本冊，理解「自我實現預言」畢馬龍效應，人性本善閣有相信家己會使有閣較大的改善、貢獻是咱對家己、對社會、對未來的向望。
《人慈》其中一个規則是同理心莫囥傷重，同情心愛加訓練。這同理心點同情心佮咱一般的理解有寡精差。總講一句，同情是愛行動，同理通常無啥實際幫贊，而且損咱的精神。
火星阿公佇親人、朋友遮的天使相助，家己的努力，行到家己凡勢攏想袂到的所在。這過程中親像伊所講的，一个接過一个𤆬伊行，冊名「我佇地球的奇幻旅程」，這體驗毋是一个人就會使完成的。
減一个敵人是真好，若是閣佮人和善，會閣較圓滿。
慈善成做別人的天使予人生的旅程閣較美麗。
沒有留言:
張貼留言