《全球人才搶著學密涅瓦的思考習慣訓練》心得

 

《全球人才搶著學密涅瓦的思考習慣訓練》心得

咱有一陣直直收集一寡有關 「思考」、「思維」的冊。無論是用佇工課、投資、人生抑是學習。

這主要的目地是改善咱「生活佮工課的技術」。----這嘛是一本冊名。請揣王永福的專冊，文筆簡單好理解，好讀，真實際。

咱為著認清家己，透過閱讀，思考家己的未來，結構所向望的生活。共家己需要的知識地圖先鬥起來，沓沓仔搜集知識成做清單，ká-ná大腦的配插（plugin；外掛），磨練技術，咱想按怎長期定著有會粒積寡成就才著。

應用佮實際行動是讀冊後愛是做的。這講了就閣會講著「自律」，「大腦愛按怎訓練，甚至人性的探討」。

咱想著leh做兵時，遇一个班長佇一擺歇睏時雄雄對阮即班講，「讀遐chē冊，袂曉應用有啥路用？」

有影，出社會了後，咱過去的教育無影對咱生活甚至是工課有幫贊。

「食到老學到老」這話嘛是講甲欲臭去。學無應用，是欲消磨時間？假始是有歲人做議量，就準拄煞。假始時間有限制，方向錯誤雖罔會有寡經驗，總是，會減少一寡效率，沉沒的成本，尤其是面對無必要的錯誤。假始是犯一寡真僫修補的錯誤咧？人生凡勢就覆佇塗跤，peh袂起來ah。

到底「為啥欲學習」，「如何學習」抑是「學習啥」佗一項較重要？

我想攏嘛真重要。而且三者攏是互相牽挽。

因為拄著困難，所以愛成長。

因為想欲過了較好，所以愛學新的物件。

因為驚惶，因為囡仔…因為現實社會需求，因為求生存…

按呢講起來真濟因端攏是會做推sak咱向某物事工，袂輸方向永遠攏袂重耽，總--是，有時咱貧惰思考，倚靠慣勢，煞行去歹路。

問題無定著是線性的，解決的方式嘛毋是。

這嘛是咱三不五時轉來看一寡基本功、底蒂有猶原好好無。是毋是愛重新修正，重新學習過去無知的所在，學習閣較好的工具…

你若注意一寡關鍵詞，「學習」、「練習 / 訓練」、「習慣」、「態度」、「改變」、「思考」、「思維」，「選擇」，「決策」…彼攏是有系統去破解一寡反人性的行為。

你若閣斟酌，遮个關鍵詞攏是人生 （生活、工課）效率的冊，定著會講著的物件。而且彼此攏會當佮作伙成做另一ê主題。遮的主題通連結去真濟無仝的箍仔，親像理財、投資、創業、歷史、甚至是政治。

因為反人性，主要是愛承認咱人的頭殼是無完美的，嘛是按呢態度，才會願意去學習，刁工克服記持的消磨，減少情緒的起落影響決策，利用數字、科學的掰會解決問題。

假始你最近若有咧痟PODCAST，應該就知影「大人學」，內部不時使用專案管理的方法去敨解人生的問題，減輕風險，分析「局」勢，為人生搜揣上好的選擇抑是決策。

咱職業是工程師，為著良率改善抑是欲共影響的參數掠出來調整，不時就是愛做寡分析，揣出因果關係，揣出證據去說服大頭家。解決問題是需要一套標準流程，以防風險，以防落勾一寡思考無斟酌所在。

有時問題真大抑是根本毋知問題佇佗，就是愛沓沓仔分拆。8D、3X5 WHY佮FMEA…等等的工具是真要求的。有時共問題切做幾也个部分分別做實驗，彼是因端凡勢毋但一个爾爾。多層次多結構的因素正正是起引上大的災難。像311核災，像2008經濟退熱，烏天鵝袂是單一因端雄雄跳出來的。

有啥人一生攏袂遇著失敗？犯錯、失敗才是常態。問題直直濆出來才是常態，佮問題的本質是啥，咱的守備範圍到tah？啥物是會使控制，啥物是袂使控制的…等等。假始這思考會使解決咱工課場的問題，敢袂使解決咱生活的問題？假始這學習無法度佇生活佮工課場做轉徙，這技巧敢閣會佇未來存在？

一套思考法會使應用佇咱一工16小時（假始睏眠8小時），按呢敢毋是閣較需要去共這工具這功夫學好。假始這方法咱逐工使用5點鐘就好，10冬就有18250點鐘，按呢人生不如意的機率應該低真濟才著。

咱閣想著2本冊，《做自己的生命設計師》，《做自己的工作設計師》。這就是位重新共問題環箍出來（re-frame），使用重新思考、重新設計屬於上適合家己的路。

閣回頭看咱40冬的生活/工課過程，不斷更新咱的頭殼內的軟體，學習新的知識，是為著未來的挑戰。咱這三內的專案是咧做khì-chhia雷達，閣過幾冬咱的物件就裝佇有自動駕駛功能的車。靠電腦來分析無仝的狀況，加速減速，倒斡正斡，回報…真濟攏無需要人實際的看顧ah。

學校的存在、學校的學習內容敢有法度應付？咱捌為著囡仔讀過《教育大未來》，《為未來而教》即兩本冊。最近，讀即本《全球人才搶著學密涅瓦的思考習慣訓練》我想咱大人先讀即本會愈較實際，大人著先家己重新學習按怎學習。重新思考未來的局，改變家己歹慣勢，訓練家己思考的才調，為著家己，為著後一代好好讀這冊。