全文 最新失德了歌 最新失德了歌（七字句） (漢字 校正) (tbd)
| 1 | 一个查某佮我鬥 我都寄留佇伊兜 是我即擺福氣到 伊塊設我做緣投 | |
| 2 | 彼个查某誠三八 閣着汝𠢕講白賊 好運交到就瓜葛 (koa-kat) 𨑨迌親像汝就達 (?) | |
| 3 | 𨑨迌無人親像我 不時查某通盤撥 即个查某共我chhōa 錢水無人我遮活 | |
| 4 | 展着金礦汝開墾 爿我撥營幾萬銀 實在人共汝整本 看汝雞胿真𠢕噴 | |
| 5 | 敢講我毋驚見笑 汝敢聽着擋袂牢 換做是汝無才調 也敢欲笑我嘐潲 | |
| 6 | 佮汝講話無彩嘴 嘐潲講到一大堆 敢講汝毋驚漏氣 愛我拄破汝雞胿 | |
| 7 | 阮是花債有相欠 汝媽頭殼生較尖 猶對予汝看無點 我閣予汝一个嫌 | |
| 8 | 查某提錢予汝用 恁厝公媽塊無靈 hŏng設緣投卸世眾 在汝塊想真才情 | |
| 9 | 註是伊欠即个債 不時錢銀予我提 姑母笑我漏屎尾 啥人會贏我一个 | |
| 10 | 恁厝風水塊欲敗 出汝即範的人才 提錢請汝去倒屎 儉欲予人抾錢台 | |
| 11 | 汝敢有通達着我 干焦阮塊好盤撥 身軀銀票若粗紙 食飽閒閒免拖磨 | |
| 12 | 有影我不達着恁 存欲予人做廢人 家己會趁較要謹 hŏng設緣投免風神 | |
| 13 | 在汝塊想無希罕 hŏng設緣投真為難 我人毋是毋免趁 贏汝身軀斷錢山 | |
| 14 | 汝塊專想人做翁 hŏng設緣投做臭人 也敢風神塊開講 毛管出汗錢較香 | |
| 15 | 有錢通用第一好 別人若笑甲伊物(?) 汝也替我塊煩惱 我有較贏汝塊無 | |
| 16 | 戇話汝免共我添 用人即號僥倖錢 後日減彩若破病 會hŏng扛去竹脚邊 | |
| 17 | 伊欲予我做牽手 管我佇時欲liu-chhiu 我是chhōa着汝朋友 若無着拍汝目睭 | |
| 18 | 汝講的話才硬角 目睭欲拍佗一目 也敢欲來佮我觸 一下汝着去監獄 | |
| 19 | 我人免去監獄內 若甲興事汝才來 汝敢正實遐爾呆 我用銀粉共汝埋 | |
| 20 | 靠汝好額人敢thún 食我教水十二分 予我毋願那抾恨 的確放汝後脚根 | |
| 21 | 錢有勢頭用會動 毋驚汝是鱸鰻人 脚根若敢共我放 彼時汝就走無空 | |
| 22 | 看汝錢有食人到 敢欲佮我做對頭 若敢刣汝毋免走 官廳掠汝先去投 | |
| 23 | Chhun寡錢銀予人得 刣我規家就袂直 汝若敢來佮我勅(thit) 看汝欲訂佗一日 | |
| 24 | 若愛才來共看覓 看我毋敢共汝刣 若無來訂明仔載 脚手無展汝毋知 | |
| 25 | 莫得共我放狗屁 敢是靠汝人大堆 看欲訂約佇一位 脚根毋捌予人推 | |
| 26 | 二个相拍欲出刀 朋友知影來勸和 勸咱寃家真毋好 遐久性地才放落 | |
| 27 | 聽見朋友來塊勸 也無因為爭田園 實在毋是我較軟 論真相拍無好物 (mn̍gh) | |
| 28 | 逐家欲寃也有報 汝有人色我敢無 着做廣交人呵咾 出門才會得人和 | |
| 29 | 汝若人色用會到 我敢誠實無勢頭 不時相拍名較臭 想起朋友真難交 | |
| 30 | 汝欲佮我起性地 人我真無愛寃家 相拍起來真歹勢 也無為着啥物个 | |
| 31 | 是汝欲佮我激氣 體面啥人無愛他 掠真汝較無情理 帶者予汝成掃皮 | |
| 32 | 佮汝講笑煞變面 看汝第一袂小人 我若毋敢佮汝琼（？） 目地會予人看輕 | |
| 33 | 野我根底予人笑 看汝第一刺頭鏢 論真寃家無寃小 省事事省總恰着 | |
| 34 | 倒想省事恰事省 所致寃家才賣成 論真相拍無路用 咱今的話免閣琼(?khêng) | |
| 35 | 寃家無成人齊散 無愛佮汝閣超盤 延到時間遮爾晏 趕緊來去thiah車chōa（？） | |
| 36 | 趕緊車chōa來去thiah 改扎（táⁿ-chah）好勢上火車 列位批信我才寄 予恁知影我佇遮 | |
| 37 | 倒著車內睏一醒 精神閂到牡丹坑 目暗金礦看無見 下昏旅館來宿瞑 | |
| 38 | 行到旅館門跤口 即間真爽閣塔樓 規陣下女相爭走 倚來共我接皮包 | |
| 39 | 我chhōa人客上樓頂 起來倚池樓梯前 房間有分一二等 看汝欲宿佇一間 | |
| 40 | 一等房間我才愛 汝看人客罵是哉(?) 做頭chhōa我入房內 下女(hā-lí)隨時捧茶來 | |
| 41 | 開嘴緊共人客問 汝敢猶未食下昏 若是未食我攢飯 隨時行出房間門 | |
| 42 | 我今坐着眠床內 看見下女捧飯來 予我看着真正愛 袂輸月旦的人才 | |
| 43 | 菜攢四碟飯一桶 teh請人客雙手捧 看汝一个才匹送(?) 借問人客佗位人 | |
| 44 | 聽汝海口遮爾讚 揣汝一款真重難 毋通看我是宋判 實在阮厝蹛山間 | |
| 45 | 喙花我無汝一半 聽汝講話𠢕相瞞 人阮目睭會曉看 恁厝毋是蹛內山 | |
| 46 | 下昏宿恁一間房 予汝貯飯敢毋通 看汝生媠才活動 骨力予汝雙手捧 | |
| 47 | 敢是嫌阮無禮數 袂記共恁先招呼 阮是旅館的查某 敢是嫌阮手較粗 | |
| 48 | 毋是假意塊呵咾 即款禮數實情無 即碗食了榫閂好 閣底我也貪袂落 | |
| 49 | 若無閣底塊停手 食飽飯盤煞來收 面巾提予汝拭手 嘴箍拭甲袂齊油 | |
| 50 | 伸予共汝接面巾 提來予我拭嘴唇 看人無笑激汶汶 割斷我的後脚根 | |
| 51 | 下方看着恁個面 看恁生成者巧神 無汝來甲我做陣 下方仙困賣落眠 | |
| 52 | 人客汝講睏袂去\khù 害阮想到心肝如(jû) 無好緣份通配汝 毋敢掠虲嬌恁魚 （？） | |
| 53 | 媠䆀卻然無塊比 看恁親像若西施 敢是嫌阮無佮意 花籃毋插阮糞箕 | |
| 54 | 予恁呵咾欲省步 恨阮怯勢肉恰烏 阮店旅館個查某 毋敢配恁金葫蘆 | |
| 55 | 求恁姻緣袂成事 四兩秧仔（ng-á）代先除 我無嫌恁做下女 看恁真正𠢕推詞 | |
| 56 | 恁欲想阮無走閃 阮欲想恁驚汝嫌 出外人客若糖扦thn̂g-chhiám 無長頭毛予人拈 | |
| 57 | 求汝姻緣袂好勢 汝也塊驚我即个 我都毋是糖扦客 嘴花毋免落傷加 | |
| 58 | 人才驚配恁袂過 犀牛毋敢欲望月 恁若實在有影欲 我也毋敢閣再推 | |
| 59 | 言語講到規船載 求恁姻緣驚袂來 心肝恁若有意愛 閣再推詞不應該 | |
| 60 | 我拄心肝有打算 汝無嫌我䆀眠床 加蹛幾日才通轉 才袂害阮心頭酸 | |
| 61 | 我欲轉去無遐緊 佮恁講話有信憑 若會逐家來做陣 相好無人咱才親 | |
| 62 | 聽恁塊說衫緊褪 褪好才閂房間門 苦袂較緊做喟損（khùi-sńg） 褪鞋才peh上眠床 | |
| 63 | 今着緊睏毋通慢 十二點鐘塊欲彈 予我戇戇倒塊等 下昏予汝較為難 | |
| 64 | 下昏也是天推千（？）即會共恁結姻緣 汝掛一條錶仔鍊 看恁真𠢕激身田 | |
| 65 | 一條鍊仔真䆀款 我想欲來閣再翻 汝今毋免踮旅館 我才共汝翻手環 | |
| 66 | 傍汝致蔭通富貴 聽汝塊講心肝開 手環共我翻一對 汝咱較久着做堆 | |
| 67 | 汝若無想先僥我 親像尪某無二絕（？） 手錶煞比予汝掛 勸汝毋通相放撥 (?) | |
| 68 | 物件提汝才濟項 免驚阮會想私空 手錶有影欲相送 佮汝相好規世人 | |
| 69 | 別人送我我送恁 買無外人也新新 欲予恁做紀念品 出門通掛較風神 | |
| 70 | 下昏佮汝睏仝枕 送阮手錶十八金 望汝後日相致蔭 佮汝相好真仝心 | |
| 71 | 汝若認真欲綴我 毋免予恁受拖磨 chhōa汝別位來去蹛 致蔭予汝較快活 | |
| 72 | 會得佮汝通相見 註定阮欲出頭天 我欲問汝啥名姓 做啥生理才有錢 | |
| 73 | 金礦是我塊開墾 人我𨑨迌賣雞孫 佮我相好錢無論 皮包野閣二萬銀 | *吝嗇 / 龜孫子 / 縮頭烏龜 |
| 74 | 金礦甲是汝塊整 看汝个人真才情 較早旅館共借用 若無汝煞共我行 | |
| 75 | 金礦通是我塊做 予汝共借真連回 人總欠伊有偌濟 錢著皮包家己提 | |
| 76 | 皮包銀票底貯二捆 逐張新新無啞雲(?) 汝按外濟欲予阮 也無咱來時半分 | |
| 77 | 欲挃去提毋免問 人阮𨑨迌袂孤霜 也無人總寄汝囥 我都免帶錢出門 | *冷酷 / 孤獨 / 孤癖 |
| 78 | 房間有箱通好鎖 較濟麻是底下落 會曉共汝囥好好 免驚會共汝打無 | |
| 79 | 人阮開錢通無痛 毋信共阮小探聽 掠汝準做親某囝 較濟寄汝都毋驚 | |
| 80 | 錢項交代我料理 貪心一錢我不挃 若若欲chhōa阮去飼 甘願予恁做細姨 | |
| 81 | 汝那欲佮阮規氣 阮厝牽手欲來離 是咱雙人看甲意 別人我都袂合脾 | |
| 82 | 講欲佮阮成雙對 毋通到時煞退開 心肝愛着有趁嘴 毋通講話無定規 | |
| 83 | 佮恁講話有切意 愛欲chhōa恁做妻兒 出門若猶欠金器 若欲閣拍趁一時 | |
| 84 | 初初佮阮睏仝床 總無提恁才濟物（mn̍gh） 規暗無睏做(口氣)損 無疑才緊天就光 | |
| 85 | 二个睏到遮爾晏 嘴來相牽手相幔 今阮早起欲拆散 費神汝去捧墨盤 | |
| 86 | 我今眠床緊peh起 捧飯予汝通止飢 磨墨通予恁寫字 寫批予共啥通知 | |
| 87 | 也着予阮小起動 批信我有寫一邦 共我提去郵便桶 欲寄予阮相好人 | |
| 88 | 天光起來面無洗 趕緊寫就一張批 金山頭路無顧做 蹛佇旅館塊探花 | |
| 89 | 日仔欲暗食下昏 閂着郵政來打門 拆批一看心頭酸 金山事業放拋荒 | |
| 90 | 是我目睭看無透 貪心欲設人緣投 錢銀予人拐塊走 閣着佮人相爭猴 | |
| 91 | 共猴整頓無彩錢 唌我心肝大了然 契兄心肝上𠢕變 篡我个猴真嘔仙 | |
| 92 | 出門有共伊交代 當今景氣是真䆀 朋友交接着實在 毋通未趁先欲開 | |
| 93 | 滿喙答應逐聲好 無疑到位想𨑨迌 閣開下女才會做 一範查某屎驚無 | |
| 94 | 佮伊盡情佮盡義 予伊欲僥做一時 阮無比人較怯勢 因為哈代才毋挃 | |
| 95 | 彼範查某面皮厚 也敢欲設伊緣投 我想敢着緊執（？）到 來去佮伊相爭猴 | |
| 96 | 二人相爭猴一隻 緊緊來到下女遮 看伊下女教偌赤 啥代食我才夠額 | |
| 97 | 相爭篡我媠契兄 招伊來說予人聽 若無來去見保正 看伊會輸也會贏 | |
| 98 | 二人相爭塊食醋 拍甲無衫佮無褲 即範三八个查某 毋驚予人笑老虎 | |
| 99 | 相爭一隻木耳猴 拍甲皮破佮血流 甲知二比啥氣𠢕 別日再編說透流 | |
全文 最新失德了歌 最新失德了歌（七字句） (原文)
1.
一个查某蛤我鬭 我都寄留治因兜 是我即擺福氣對 伊袋扇我做召投
2.
喜个查某成三八 閣着汝爻廣白賊 好運交到就瓜葛
勅桃親像汝就達
3.
勅桃無人親像我 不時查某通盤撥
即个查某蛤我帶 錢水無人我即活
4.
典着金礳汝開懇
爿我撥營幾萬艮 實在人共汝整本
看汝圭歸真爻噴
5.
敢廣我不京見少 汝敢聽着擋買朝 換做是汝無才調 也敢卜笑我校哨
6.
蛤汝廣話無彩嘴 校哨廣到一大堆 敢廣汝不京漏氣 愛我廚破汝圭歸
7.
阮是花債有相欠 汝媽頭売生恰占 腰對乎汝看無點 我姑乎汝一个嫌
8.
查某提錢乎汝用 恁厝公媽袋無靈
皇扇召投舍四正 在汝袋想真才情
9.
註是伊欠是個債 不時錢艮乎我提
姑母笑我漏屎尾 省人能營我即個
10.
恁厝風水袋卜敗 出汝一辦個人才 提錢倩汝去倒屎 存卜乎人却錢台
11.
汝敢有通達着我
干乾阮袋好盤撥 身軀良票那粗紙
食飽榮榮免拖磨
12.
有影我不達着恁
存卜乎人做廢人 加已下趁恰要謹 皇扇召投免風神
13.
在汝袋想無希罕 皇扇召投真為難 我朗不是不免趁 營汝身軀斷錢山
14.
汝袋專想人做尪 皇扇召投做臭人 也敢風神袋開講 毛捲出汗錢恰香
15.
有錢通用第一好 別人那笑甲伊物 汝也退我袋煩惱
我有恰營汝塊無
16.
戇話汝免蛤我鄭
用人即號僥倖錢 下日減彩那破病 下乎扛去竹脚邊
17.
伊卜乎我做牽手 管我治時卜留秋 我是帶着汝朋友 那無着打汝目周
18.
汝廣個話即硬角 目周卜打倒一日 也敢卜來蛤我篤 一下汝着去監獄
19.
我朗免去監獄內 那甲興事汝即來 汝敢正實化哖呆 我用銀粉共汝台
20.
靠汝好額人敢吞 食我教水十二分 乎我不愿那却恨 得売放汝後脚根
21.
錢有勢頭用下動 不京汝是爐麻人
脚根那敢共我散 許時汝就走無空
22.
看汝錢有食人教
敢卜蛤我做對頭 那敢刣汝不免走 官廳諒汝先去投
23.
存寡錢銀乎人得 刣我歸家就袂直
汝若敢來ka7我勅 (thit?) 看汝卜訂佗一日
24.
那愛即來共看埋 靠我不敢共汝刣 那無來定明仔再 脚手無典汝不知
25.
莫得共我放狗庇
敢是靠汝人大堆 看卜定約倒一位 脚根不識乎人抽
26.
二個相打卜出刀 朋友知影來勸和 勸咱寃家真不好 許久性第即放落
27.
聽見朋友來袋勸 也無因為爭田園 實在不是我恰軟 論真相打無好物
28.
大家卜寃也有報 汝有人色我敢無
着做廣交人呵咾 出門即下得人和
29.
汝那人色用會到
我敢正實無勢頭 不時相打名恰臭 想起朋友真難交
30.
汝卜蛤我起性第 人我真無愛寃家 相打起來真呆世
也無為着省乜個
31.
是汝卜蛤我格氣
體面省人不愛他 琼真汝恰無情理 帶者乎汝成掃皮
32.
蛤汝廣笑煞變面 看汝第一賣小人 我那不敢蛤汝琼 目第下乎人看輕
33.
野我根底乎人笑 看汝第一刺頭鏢 論真寃家無寃小 省事事省總恰着
34.
倒想省事恰事省 所致寃家者賣成 論真相打無路用 咱今下話免閣琼
35.
寃家無成人巢散 無愛蛤汝閣超盤
延到時間即哖晏 赶謹來去折車尋
36.
赶謹車尋來去折 改扎好勢上火車 列位批信我即寄 乎恁知影我著者
37.
倒著車內困一醒 精神閂到牡丹玩 日暗金礦看不見 下方旅館來宿瞑
38.
行到旅館門脚口 即間真爽閣塔樓 歸陣下女相爭走 瓦來共我接皮包
39.
我●人客上樓頂 起來倚池樓梯前 房間有分一二等 看汝卜宿倒一宮
40.
一等房間我即愛 汝看人客罵是哉 做頭●我入房內 下女隨時捧茶來
41.
開嘴謹共人客問 汝敢野未食下方 那是未食我拴飯 隨時行出房間門
42.
我今坐着眠床內 看見下女捧飯來 乎我看着真正愛 賣須月旦個人才
43.
菜拴四碟飯一桶 底請人客雙手捧 看汝一個即匹送 惜問人客倒位人
44.
聽汝海口即哖讚 尋汝一款真重難 不通看我是爽盼
實在阮厝帶山間
45.
嘴花我無汝一半 聽汝廣話爻相麻 人阮目周能曉看 恁厝不是帶內山
46.
下方宿恁一間房 乎汝底飯敢不通 看汝生水即活動
魯力乎汝雙手捧
47.
敢是嫌阮無禮數 賣記共恁先招呼 阮是旅館下查某 敢是嫌阮手恰粗
48.
不是假意袋呵咾 即款禮數實情無 即碗食了准閂好 閣底我也貪賣落
49.
那不閣底袋停手 食飽飯盤煞來收 面巾提乎汝七手
嘴科即恰賣朝油
50.
春乎共汝接面巾 提來平我七嘴唇
看人不笑格汶汶 割斷我下後脚根
51.
下方看着恁個面 看恁生成者巧神 無汝來甲我做陣 下方仙困賣落眠
52.
人客汝廣困賣去 害阮想到心肝如 無好緣份通配汝 不敢力虲嬌恁魚
53.
水呆却然無袋比 看恁親像那西施 敢是嫌阮無甲意 花籃不插阮糞枝
54.
乎恁呵咾卜省步 恨阮却示肉恰烏 阮店旅館個查某 不敢配恁金葫爐
55.
求恁姻緣賣成事 四兩袂仔代先除 我無嫌恁做下女 看恁真正爻推詞
56.
恁卜想阮無走閃 阮卜想恁京汝嫌 出外人客那糖鉆 無長頭毛乎人拈
57.
求汝姻緣賣好勢 汝乜袋京我即個 我都不是糖鉆客
嘴花不免落箱加
58.
人才京配恁賣過 獅牛不敢卜望月 恁那實在有影卜 我也不敢閣再退
59.
言語廣到歸船侢
來恁姻緣京賣求 心肝恁那有意愛 閣再推詞不應該
60.
我遇心肝有打算 汝無嫌我呆眠床 加帶幾日即通返 即賣害阮心頭酸
61.
我卜返去無花謹
蛤恁廣話有信憑 那能大家來做陣 相好無人咱即親
62.
聽恁袋說衫謹脫 脫好即閂房間門 苦賣恰謹做●損 脫鞋即扒上眠床
63.
今着謹困不通慢 十二點鐘袋卜陳 乎我慐慐倒袋等 下方乎汝恰為難
64.
下方也是天推千 即能共恁結姻緣 汝掛一條錶仔練 看恁真爻格身田
65.
一條練仔真呆欵 我想卜來閣再翻 汝今不免店旅館 我即共汝翻手環
66.
飯汝智蔭通富貴 聽汝袋廣心肝開 手環共我翻一對 汝咱恰久着做堆
67.
汝那無想先僥我 親像尪某無二絕 手錶煞比乎汝掛 勸汝不通相放撥
68.
物件提汝者罪項
免京阮會想私空 手錶有影卜相送 蛤汝相好歸世人
69.
別人送我我送恁 買無外人野新新 卜乎恁做紀念品 出門通掛恰風神
70.
下方蛤汝困同枕 送阮手錶十八金 望汝下日相智蔭 蛤汝相好真同心
71.
汝那認真卜袋我 不免乎恁受拖磨 ●汝別位來去帶 智蔭乎汝恰快活
72.
下得蛤汝通相見 註定阮卜出頭天 我卜問汝省名姓 做省生理即有錢
73.
金礦是我袋開懇 人我敕桃賣圭孫
蛤我相好錢無論 皮包野閣二萬銀
74.
金礦甲是汝袋整 看汝个人真才情 恰早旅館共借用 那無汝煞共我行
75.
金礦通是我袋做 乎汝共借真然回 朗總欠伊有外罪 錢著皮包加己提
76.
皮包艮票底二懇 毒張新新無啞雲 汝按外罪卜乎阮 也無咱來時半分
77.
卜池去提不免問 人阮敕桃賣孤霜
也無朗總寄汝勸 我都免帶錢出門
78.
房間有箱通好鎖 恰罪罵是底下落 下曉共汝勸好好 免京下共汝打無
79.
人阮開錢通無痛 無信共阮小探聽 力汝准做親某子 恰罪寄汝都不京
80.
錢項交代我料理 貪心一錢我不池 那那卜●阮去飼 甘愿乎恁做小姨
81.
汝那卜蛤阮歸氣 阮厝牽手卜來厘 是咱雙人看甲意 別人我都賣合脾
82.
廣卜蛤阮成雙對 不通教時煞退開 心肝愛着有趁嘴 不通廣話無定規
83.
蛤恁廣話有切意 愛卜●恁做妻兒 出門那野欠金器 那卜閣打趁一時
84.
初初蛤阮困同床 總無提恁即罪物 歸暗無困做●損 無宜者謹天就光
85.
二个困到即哖晏 嘴來相啿手相瞞 今阮早起卜折散 費神汝去棒墨盤
86.
我今眠床謹扒起 捧飯乎汝通止飢 磨墨通乎恁寫字 寫批乎共誰通知
87.
也着乎阮小起動 批信我有寫一邦 共我提去郵便桶
卜寄乎阮相好人
88.
天光起來面無洗 赶謹寫就一張批 金山頭路無顧做 帶池旅館袋探花
89.
日仔卜暗食下方 閂着郵政來打門 折批一看心頭酸 金山事業放拋坊
90.
是我目周看不透 貪心卜扇人召投 錢銀乎人拐袋走 閣着蛤人相爭猴
91.
共猴整頓無彩錢 城我心肝大了然 契兄心肝上爻變 篡我个猴真嘔仙
92.
出門有共伊交代 當今景氣是真呆 朋友交接着實在 不通未趁先卜開
93.
滿嘴答應毒聲好
無疑到位想勅桃 閣開下女即下作 一辦查某屎京無
94.
蛤伊盡情甲盡義 乎伊卜僥做一時 阮無比人恰却示 因為省代即不池
95.
許辦查某面皮厚 也敢卜扇伊招投 我想敢着謹執到 來去蛤伊相晶猴
96.
二人相晶猴一隻
謹謹來到下女者 看伊下女教外赤 省代食我即到額
97.
相晶篡我水契兄
招伊來說乎人聽 那無來去見保正 看伊會須也下營
98.
二人相晶袋食醋
打敎無衫甲無褲 即辦三八个查某 不京乎人笑老虎
99.
相晶一隻木耳猴 打教皮破共血流 恰知二比省氣爻 別日再編說透流
沒有留言:
張貼留言