懶魚醉貓e烏白寫: 《戶蠅蚊仔大戰歌》

（目地是欲予毋捌讀過這本歌仔冊ê人，資料做一kái chhōe出來，欲深讀khah緊。）

1. 網路 yotube

=> 楊秀卿 https://www.youtube.com/watch?v=pD1zmsUcmOs 欲十一分鐘。

（洪瑞珍有出冊，台灣台語社出版，kap chiâⁿ chē 改編毋是原底七字型式。）
=＝光南調 https://www.youtube.com/watch?v=8AJQyZpC25M ; 後壁有全漢歌詞。

林俊---戶神蚊仔歌

https://www.youtube.com/watch?v=TrtVtqTjg88 江湖調欲十一分鐘。

2. 歌詞

	《戶蠅蚊仔大戰歌》竹林書局民國七十六年（1987-）
1	竹林書局tō是我　chit編胡蠅蠓仔歌　chit本連續做相sóa　萬項生活受拖磨
2	Siáⁿ-mih歌仔hiah趣味　袂念先共lín通知　萬項動物lóng講起　也會反亂chiah有奇
3	無論siáⁿ貨有性地　胡蠅蠓仔起冤家　為着生活ê關係　才會khioh冤事大个
4	胡蠅beh去咬臭肉　飛去kiⁿ着蠓仔跤　蠓仔beh kap伊sio phah　胡蠅kap伊大 kau-ka
5	胡蠅靠伊大箍pe̍h　m̄驚蠓仔伊一个　蠓仔想着足怨慼　起人beh kap伊冤家
6	胡蠅目chiu tián大蕊　m̄驚蠓仔pûn雞胿　無聽你leh放狗屁　kám驚蠓仔人大堆
7	蠓仔飛起一直走　一睏飛去到○兜　去hoah蠓黨chiâu-chiâu到　beh lia̍h胡蠅來liàm頭
8	蠓仔歸陣飛來到　胡蠅雙手舞拳頭　拍死蠓仔hiⁿ-hiⁿ-háu　soah kā tàn落塗跤兜
9	蠓仔phah輸真冤枉　胡蠅武藝真靈通　蠓仔走去竹管洞　去請一尾蟺蟲王
10	蠓仔來到竹管口　叫人通報入內頭　為着冤情來拜候　kai蟺大哥soeh透流
11	鱔人聽着蠓仔講　胡蠅文武雙項通　相chhōa行出竹管洞　beh去食伊胡蠅王
12	胡蠅看着蟺尫來　驚kah喙仔lī-sai-sai　知影蟺尫chhùi厲害　飛懸m̄ káⁿ歇--落-來
13	蟺尫看着伊胡蠅　想甲喙瀾chiap-chiap-tin　胡蠅着驚飛緊緊　蟺尫看着目gîn-gîn
14	胡蠅想着真m̄願　beh kap蠓仔結大冤　beh koh起人kap伊亂　法度請比伊較懸
15	胡蠅beh去請蜈蚣　beh請蜈蚣咬蟺尫　tòa tī厝頂角仔縫　chit位伊tiàm幾十冬
16	蜈蚣聽着胡蠅講　講伊蠓仔無正宗　雙人行出角仔洞　beh liàm蠓仔伊ê hông
17	蜈蚣跤骨又ke̍k濟　三十六枝一直爬　胡蠅想了無好勢　去問虼蠽伊一个
18	虼蠽tòa tī菜廚府　專門leh kāng做軍師　伊ê計智足chiâⁿ有　兩枝消息在身軀
19	虼蠽推算無錯誤　也有一層三不服　緊kā胡蠅伊約束　蜈蚣此去會勞碌
20	蠓仔知影蜈蚣來　走去講hō͘蟺尫知　蟺尫想計在心內　趕緊去請蛤仔（kap-á）來
21	蛤仔tòa tī田岸空　蠓仔去請伊一人　nā無伊來事pháiⁿ pháng　beh請蛤仔破蜈蚣
22	蛤仔法度真厲害　將情說hō͘蠓仔知　蜈蚣法度我知歹　放尿伊着m̄敢來
23	蠓仔去請伊蛤仔　收拾蜈蚣伊ê跤　蜈蚣帶hông beh來咬　蛤仔做前走來cha̍h
24	蜈蚣sô tio̍h蛤仔尿　跤骨親像火leh燒　大聲細聲哀哀叫　歸尾tiàm leh phoh-phoh-tiô
25	蜈蚣跤骨落了了　袂振袂動直liâu-liâu　想着有影真見笑　為伊胡蠅chiah soe-siâu
26	歸尾tiàm leh la̍k-la̍k-chhoah　無跤thang行án-chóaⁿ拖　一條chhan-chhiūⁿ手錶帶　遠遠看tio̍h chhan-chhiūⁿ蛇
27	胡蠅飛懸看現現　看伊蛤仔較gâu仙　伊ê法度m̄免戰　ná看蜈蚣真可憐
28	蜈蚣就共胡蠅講　汝緊去請蛇大王　帶在青山石峰洞　伊ê法度ke̍k靈通
29	胡蠅隨時飛起行　去到青山叫蛇兄　代先問hia蛇仔囝　講蛇大王伊ê名
30	大蛇聽tio̍h真歡喜　thiòng kah喙仔hi-hi-hi　腹肚iau kah半小死　今日有thang好止飢
31	大蛇喙仔peh開開　蛤仔驚甲目bui-bui　一隻予伊做一喙　吞落ām-kún結一lûi
32	蛤仔伊死tú日暗　蠓仔共伊做孝男　ta̍k隻哭kah真悽慘　蛤仔你死我m̄甘
33	蛤仔你死真phah-sńg　蠓仔日哭tú e-hng　有情sòa kā你phâng飯　哭kah喙仔長長長
34	日頭nā暗tio̍h leh háu　khu tī暗暗桌仔跤　哭kah規身lóng無肉　詳細kai聽無cheng-chha
35	蠓仔想tio̍h情就盡　beh koh去請黃真人　想報冤仇較要緊　hoa̍t落就緊beh起身
36	Hoa̍t落起行緊備辦　透暝趕到花果山　黃蜂真人出來等　蠓仔kā伊 soeh一番
37	黃蜂第一歹性地　beh助蠓仔伊一个　起hoah蜂黨足成濟　beh kap大蛇起冤家
38	虼蠽推算真厲害　隨時講hō͘胡蠅知　蠓仔去通○黨派　近日大兵tō會來
39	胡蠅聽--tio̍h虼蠽講　黃蜂武藝ke̍k靈通　咱tio̍h預備較妥當　beh請siáⁿ人較適當
40	虼蠽leh想隨時有　叫伊着去請蜘蛛　蜘蛛tòa在后壁厝　人人叫伊天羅師
41	伊有天羅kap地網　法術又koh真靈通　tio̍h請chit ê較妥當　緊去請伊來持防
42	胡蠅koh再問一pái　先生你koh講我知　m̄知伊tòa siáⁿ所在　叫我佗位請伊來
43	虼蠽chit kā伊開口　伊是tiàm人厝後郊　不管佗位伊會到　有時tòa人厝角頭
44	胡蠅隨時tō起行　去到講hō͘蜘蛛聽　蠓仔beh kap伊拚命　去請黃蜂kài出名
45	蜘蛛聽--tio̍h胡蠅講　黃蜂戰術ke̍k靈通　伊ê法度ke̍k妥當　身軀伊tài一點hông
46	胡蠅聽--tio̍h chit號事　好喙tī leh求蜘蛛　你着來去做我主　也無驚了去thâi輸
47	蜘蛛娘娘chit講起　我ê身軀會放絲　天羅地網創完備　千軍萬馬盡驅除(khu-tî）
48	蜘蛛計智ke̍k gâu想　人人叫伊施娘娘　製成陰陽天羅帳（tiuⁿ）　m̄驚蠓仔gâu主張
49	黃蜂chit日chiâu出陣　冤家蠓仔kap胡蠅　胡蠅看tio̍h會chheⁿ-chhìn　黃蜂相phah kài認真
50	黃蜂歸陣chiâu-chiâu到　蜘蛛網tī厝角頭　黃蜂tio̍h驚想beh走　天網地網sì-kè包
51	黃蜂tio̍h驚走袂離　飛去kēng tio̍h蜘蛛絲　想beh脫身走bē去　蜘蛛翻身beh lia̍h伊
52	蜘蛛翻身tō kālám　真人暗放梅花針　娘娘中毒chiâⁿ悽慘　m̄敢kā lia̍h面青紅
53	真人毒chhèng ke̍k厲害　娘娘寡(kóa) 時lóng m̄知　好得無死siōng佳哉　中毒腸肚大聲哀
54	蜘蛛肚大又袂死　着驚m̄敢去咬伊　知伊身軀有暗器　娘娘十分leh tiuⁿ-tî
55	蠓仔知影事歹代　真人有去無轉來　tiâu tī蜘蛛ê網內　ta̍k日大聲細聲哀
56	蠓仔再去叫田嬰　田eⁿ出戰giâ大旗　田嬰chiah kā伊講起　我去有死穩無生
57	田嬰着驚m̄敢來　蠓仔將情講伊知　無你kā我想看māi　beh請siáⁿ人來安排
58	田嬰tō kā伊指示　你tio̍h去請蟬先生　大蟬tòa tī樹林寺　你taⁿ趕緊去請伊
59	蠓仔受氣做伊走　想beh koh去請肚猴　肚猴tòa tī空仔口　蠓仔隨時去○兜
60	肚猴講伊無法度　蜘蛛算是老江湖　chit號陣圖難tit破　伊在空中我在thô͘
61	肚猴加講不敢來　蠓仔走去請姑玳(kong-tāi)　伊tòa水府石洞內　蠓仔beh去請伊來
62	蠓仔去到姑玳府　beh請姑玳做軍師　姑玳kā伊講幾句　我無法度lia̍h蜘蛛
63	蠓仔想着也有影　戶架樹頂上好請　因為胡蠅做bô正　今日beh kai大輸贏
64	戶架tō kā伊講起　你taⁿ去請阮小弟　我弟名叫老樟茲　日在府中暗無tī
65	叫我送肉去飼虎　戶架做事真糊塗　着請別人較妥當　chit个nā去穩成功
66	蠓仔走去草猴府　厝tòa在山崑崙　草猴kā伊講幾句　你着去請阮姊夫
67	身軀兩枝吾梅刺　thong人看tio̍h to驚伊　阮姊頭殼紅kì-kì　姊夫外號叫草蜢
68	祖傳hō͘伊吾梅刺　而後（hiō）死了傳hō͘--伊　寶貝是伊學上起　看又軟軟無半絲
69	蠓仔聽着草猴講　叫伊去請草蜢公　beh破（phò）天羅佮地網　tio̍h請伊來穩成功
70	蠓仔講hō͘草蜢聽　請你去收蜘蛛精　蜘蛛法術萬項件　別人請來無穩贏
71	蠓仔知影事pháiⁿ pháng　leh求草蜢tàu-saⁿ-kāng　草蜢未kham求歸暗　較苦kā你鬥幫忙
72	beh破（phò）陰陽天羅帳（tiuⁿ）　thang好sòa lia̍h施娘娘　beh破（phò）天羅地網陣　着chiūⁿ崑崙請門人（jîn）
73	來到崑崙tō入去　白鶴洞中請師弟　白鶴先師chit講起　胡蠅蠓仔起交邊
74	白鶴koh去孔雀洞　鶴鈞老師做仙翁　鳳凰燕集做一黨　鴛鴦水鴨來相逢
75	老龜伊去背戰鼓　石降拍鵠皮粗粗　水蛙腹大袂行路　跳遠一步甚歸晡
76	蝴蝶本是媠查某　影戲伊是做紅姑　有學劍光ê法度　是沈雌霞ê門徒
77	就點烏鴉去thong報　tú着一隻破伯勞　代誌驚了做不好　soah koh tn̄g着伊蜜婆
78	虼蚤靠伊好跤手　跋落水底○○泅　好咧燕仔走去救　若無性命伊着hiu
79	木蝨 (ba̍k-sat)kài gâu放臭屁　毛蟹 siōng gâu pûn雞胿　喙瀾不時lām-sám sûi　予火金蛄皆落𩮴
80	鳥鼠第一好計智　偷咬蜘蛛ê戰書（si / 泉州）　天羅地網八卦起　實在難得來破伊
81	蝙蝠計智siōng kài好　伊chit走去假蜜婆　蠓仔着驚走轉倒　好得鴛鴦來講和
82	烏鶖 tī leh做大將　黃卿相phah第一雄　tio̍h是粉鳥siōng有量　hō͘伊點tio̍h姑不將
83	覓鶚懸飛leh kho͘風　拄tn̄g一隻大鳳凰　花眉無信伊來講　tō是粟鳥 siōng大 gōng
84	白鶴仙師 gâu想計　去請太乙伊一个　即點鯪鯉去chǹg地　獨角金龜giâ鐵叉
85	鶯哥去借巴蕉扇　beh破chit陣目一ni̍h　大鵬靠伊gâu飛天　孔雀親像順風耳
86	燕仔展伊siōng gâu飛　南洋大海飛會過　老君看伊無目地　而後即命姜子牙
87	元始天尊來做證　leh kā老君說分明　飛天chǹg地無路用　天羅地網天生成
88	天羅地網八卦起　銅牆鐵壁一般年　飛天鑽地走袂去　着用法度來破伊
89	蜘蛛m̄是sió-kóa人　道行算來五千冬　beh破伊ê蜘蛛網　着點門徒tàu相幫
90	白象一條捆仙索　月兔頭插兩枝刀　老猴展伊跤手好　伊會上天偷仙桃
91	烏貓本成愛格水　烏狗看kah喙開開　叫伊赤牛來做鬼　條件袂和chiah推開
92	閣點黃貓翻天印　羌仔 kap伊格氣人　sòa點瀧猴誅頭陣　狐狸伊也下凡塵
93	白頭鵠仔kài pîn-tōaⁿ　真人叫伊下仙山　代誌到chia足m̄願　beh koh起人結大冤
94	虼蚤飛身入陣內　就對東門phah過來　娘娘法術ke̍k厲害　虼蚤𠖫 tī八卦台
95	青爛才去借火鏡　協力beh收蜘蛛精　鯪鯉鑽地m̄知影　鼢鼠chhōe無路thang行
96	蜘蛛看着鼢地鼠　手the̍h天羅來𠖫伊　好得拄着伊鯪鯉　招伊鑽地去逃生
97	蜘蛛看伊鑽地走　地網放落塗跤兜　真言咒語念了後　塗跤變成鐵石頭
98	許陣卜走走無路　予伊𠖫落八卦爐　神兵神將佇leh顧　掌豆成兵老江湖
99	金龜趕緊來到位　連拍三粒掌心雷　去hō͘蜘蛛喙peh開　三粒吞做kap一堆
100	燕仔看了無妥當　隨時吐出白劍光　蜘蛛一派算崆峒　伊有十分leh持防
101	蜘蛛放出青光劍　伊个劍尾野較尖　兩pêng劍光金閃閃　予伊切斷碎iâm-iâm
102	白光soah hō͘伊切斷　青ê劍肉有較長　tàu贏劍koh收倒轉　拄着草蜢入陣門
103	草蜢接陣伊無問　兩枝鐵尺丈外長　見面隨時跳倒轉　卜摔蜘蛛ê尻川
104	蜘蛛看着伊暗器　世間ná有chit兩枝　都是案仔吾梅刺　娘娘十分leh張持
105	蜘蛛手the̍h乾坤袋　四句咒語m̄免加　予伊收落袋仔底　無人通救伊一个
106	大蟬知影走來叫　去報烏鶖kap鶆鶚（la̍h-hio̍h）　想無計智真可惜　乾坤寶袋偷袂着
107	鳥鼠卜咬乾坤袋　去招石降kap水蛙　石降鵠仔 phah三下　三更beh kā伊偷 the̍h
108	鳥鼠伊卜入陣內　chǹg對壁空無人知　蜘蛛娘娘真厲害　知影鳥鼠鑽入來
109	娘娘手the̍h天羅網　鳥鼠隨時走無空　hō͘伊𠖫落袂振動　大聲tī leh hoah救人
110	予伊咧着chih-chih叫　娘娘看伊全無tio̍h　鳥鼠來輸真可惜　後來好得伊la̍h-hio̍h
111	鶆鶚來kā ngeh leh走　走到崑崙ê山頭　好得天尊趕來到　野無袂得轉○兜
112	鱔魚伊去觀星宿　蜘蛛性命袂該休　亦有救星通來救　來kā大蛇soeh理由
113	大蛇吐出毒烟霧　毒氣beh傷伊蜘蛛　蜘蛛豪光本成有　毒光袂óa伊身軀
114	蝴蝶gia̍h頭leh觀望　連放三枝紅劍光　卜傷蜘蛛○妖黨　來助大蛇ê威風
115	蜘蛛伊有護身鏡　劍光未óa先知影　蝴蝶想beh顧性命　beh走無路thang好行
116	娘娘發起乾坤袋　將劍收收做一下　蝴蝶看了m̄是勢　將劍收轉緊回家
117	田嬰做人siōng鐵齒　仙師叫伊giâ戰旗　崑崙正派四大字　崆峒許pêng也知機
118	崆峒伊有野蠻黨　有學邪法ê劍光　寶貝也是ke̍k妥當　移山倒海件件thong
119	崑崙劍仙是白鶴　相thâi伊也免用刀　孔雀寶貝也真好　仙家法術m̄是無
120	水牛腸肚siōng大桶　駱駝練成金鋼棒　beh來拍破蜘蛛網　連拍三下無彩工
121	蜘蛛法術ta̍k項有　練成五粒定光珠　駱駝m̄知kap伊株（chu）　予伊phah kah soah杯龜
122	烏貓靠伊siōng gâu走　beh咬蜘蛛ê眉頭　hō͘伊拍着ai-ai-háu　一隻taⁿ soah m̄成猴
123	水蛙beh破蜘蛛網　胡蠅才去放毒蟲　食了逐隻大肚桶　袂行一箍ná死人
124	灶雞入陣成悽慘　tiâu佇蜘蛛八卦網　錢鼠poa̍h落佇地陷　身軀不時tâm-tâm-tâm
125	狐狸靠伊尾大koaⁿ　較懸牆圍也敢pôaⁿ　現時尾soah chhun一半　chhun死跳chiūⁿ八卦山
126	雞公來到kâm-kâm叫　望冬見面phok-phok-tiô　雞囝對米一直khioh　也無看着伊la̍h-hio̍h
127	番公出聲leh hoah殺　鴨母刣輸hoah m̄值　陣圖siáⁿ款無人捌　拄tio̍h地牛 siōng有力
128	老猴目chiu siōng厲害　siáⁿ-mih機關看會知　伊對中門入陣內　beh kap娘娘伊相thâi
129	娘娘看着大受氣　大罵老猴死cheng-siⁿ　你káⁿ入陣來送死　手gia̍h拂塵來phah伊
130	猴是大聖孫悟空　入陣接戰有持防　猴ê目chiu m̄是gōng　菩薩祖師ê道童
131	猴ê目chiu看會曉　蜘蛛本是絲線妖　伊ê寶貝ke̍k巧妙　風火伊tō擋袂tiâu
132	着請風火來破陣　也無難得lia̍h伊身　也着寶貝大要緊　會得收陰絲線神
133	蜘蛛是驚風kap火　無線蜘蛛就袂飛　東洋大海袂得過　看伊敢有雙領皮
134	門人服tī午門外　上下koh有烏白蛇　胡蠅驚kah khī-khī-chhoah　娘娘有死穩無活
135	肥力一枝巴蕉扇　悅着大風滾chiūⁿ天　戶架hoah聲oaⁿ-oaⁿ死　蜘蛛性命敢難移
136	真人發起神火箭　九隻火獅chhiⁿ-chhiⁿ-chhiⁿ　好得娘娘走有離　hō͘伊燒斷蜘蛛絲
137	蜘蛛着驚走落地　走kak袂行做狗爬　身軀有帶乾坤袋　第一厲害是chit个
138	鳳凰發起七星劍　連sòa兩枝格相連　娘娘性命真危險　較險挑油過石尖
139	烏貓烏狗kap狐狸　寶劍連放四五枝　逐枝ê劍白sih-sih　協力beh收蜘蛛精
140	蜘蛛發起乾坤罩　各人寶貝算真gâu　好得真人tī尾後　發起太極tī雲頭
141	老祖發起通天手　乾坤寶袋被伊收　無in師父走來救　性命險險着soah休
142	蜘蛛師父是飛絲　許日閒遊出遙池　看着門徒險險死　下凡趕緊來救伊
143	好得師父來解救　nā無性命伊着休　飛絲leh求眾道友　門徒伊beh家己收
144	眾人同情in師父　飛絲chit來收蜘蛛　眾仙回轉逍遙府　仙家道友極仁慈
145	chit部歌仔眞希罕　內中獸名歸千項　m̄是古書也無傳　全講動物無講人