2026 國際大事起鼓歌 / 2026 Kok-chè tōa-sū khí-kó͘ koa

1	二○二七欲大戰， 毋是我欲吐吐連涎， 支那霸權看現現， 四界做亂無人緣。	Jī-khòng-jī-chhit beh tāi-chiàn, m̄ sī góa beh thò͘-liân-siân, Chi-ná pà-koân khòaⁿ-hiān-hiān, sì-kè chò-loān bô lâng-iân.
2	保護家園著拚勢， 物資先攢三個月， 逐工自律練身體， 軍事知識著愛加。	Pó-hō͘ ka-hn̂g tio̍h piàⁿ-sì, bu̍t-chu seng chôaⁿ saⁿ-kò-goe̍h, ta̍k kang chū-lu̍t liān sin-thé, kun-sū tì-sek tio̍h ài ke.
3	香港大樓大火燒， 共仔大喝緊過橋， 無天無良道德少， 袂當申訴攏伊著。	Hiong-káng tōa-lâu tōa hóe-sio, kiōng-á tōa hoah kín kòe-kiô, bô thian bô liông tō-tek chió, bē-tàng sin-sò͘ lóng i tio̍h.
4	中國飛彈攏灌水， 軍官烏西激槌槌， 無人欲做替死鬼， 欲拍台灣誰食虧。	Tiong-kok hui-tôaⁿ lóng koàn-chúi, kun-koaⁿ o͘-se kek-thûi-thûi, bô lâng beh chò thè-sí-kúi, beh phah Tâi-oân siáng chia̍h-khui.
5	現陣戰爭攏齊變， 無人飛機飛滿天， 機器智慧大發展， 目覕萬人隨做仙。	Hiān-chūn chiàn-cheng lóng chiâu piàn, bô-jîn hui-ki poe móa thian, ki-khì tì-hūi tōa hoat-tián, ba̍k bih bān lâng sûi chò sian.
6	日本相thīn護台灣， 若有代誌in心煩， 第一島鏈做伙管， 若是斷線世界亂。	Ji̍t-pún sio-thīn hō͘ Tâi-oân, nā ū tāi-chì in sim hoân, tē-it tó-liān chò-hóe koán, nā-sī tn̄g sòaⁿ sè-kài loān.
7	川普出手無細膩， 武器買賣無延遲， 防衛條款閣有記， 十全準備誰敢欺。	Chhoan-phó͘ chhut-chhiú bô sè-jī, bú-khì bé-bē bô iân-tî, hông-ōe tiâu-khoán koh ū kì, cha̍p-chn̂g chún-pī siáng káⁿ khi.
8	美國日本同出聲， 欲予共仔心驚驚， 咱人著愛心掠定， 後代閣等咱共晟。	Bí-kok Ji̍t-pún tông chhut siaⁿ, beh hō͘ kiōng-á sim-kiaⁿ-kiaⁿ, lán lâng tio̍h ài sim lia̍h tiāⁿ, āu-tāi koh tán lán kā chhiâⁿ.
9	海底電纜切予斷， 彼是故意曷著問， 假做漁船四界鑽， 共仔心機毋免妝。	Hái-té tián-lám chhiat hō͘ tn̄g, hit sī kò͘-ì a̍h-tio̍h mn̄g, ké-chò hî-chûn sì-kè chǹg, kiōng-á sim-ki m̄-bián chng.
10	刁工軍演欲來嚇， 到今台灣攏無差， 咱今確定in毋敢， 股市三萬笑哈哈。	Thiau-kang kun-ián beh lâi háⁿ, kàu taⁿ Tâi-oân lóng bô chha, lán taⁿ khak-tēng in m̄-káⁿ, kó͘-chhī saⁿ-bān chhiò-ha-ha.
11	國際看che講無理， 包圍台灣是欲哖， 公海領域惹代誌， 美國日本袂忍伊。	Kok-chè khòaⁿ che kóng bô-lí, pau-ûi Tâi-oân sī beh nî, kong-hái léng-he̍k jiá tāi-chì, Bí-kok Ji̍t-pún bē lún i.
12	美國武器真正讚， 中國的物攏袂堪， Be-ne-ju-é-là總統慘， 逢掠過程無困難。	Bí-kok bú-khì chin-chiàⁿ chàn, Tiong-kok ê mi̍h lóng bē-kham, Be-ne-ju-é-là chóng-thóng chhám, hŏng lia̍h kòe-thêng bô khùn-lân.
13	國際大事咱著知， 牽連台灣理路來， 共仔心驚pek-phok-chhái， 面子卸了落下頦。	Kok-chè tōa-sū lán tio̍h chai, khan-liân Tâi-oân lí-lō͘ lâi, kiōng-á sim kiaⁿ pek-phok-chhái, bīn-chú sià liáu làu ē-hoâi.
14	飛彈灌水無路用， 毋是川普大神經， 侵門踏戶真本領， 隱形飛機炸代先。	Hui-tôaⁿ koàn-chúi bô lō͘-ēng, m̄-sī Chhoan-phó͘ tōa sîn-keng, chhim-mn̂g-ta̍h-hō͘ chin pún-léng, ún-hêng hui-ki chà tāi-seng.
15	川普口氣有影大， 講話毋是咧臭彈， 敢動台灣咱才看， 恁父先送伊上山。	Chhoan-phó͘ kháu-khì ū-iáⁿ tōa, kóng-ōe m̄ sī leh chhàu-tôaⁿ, káⁿ tāng Tâi-oân lán chiah khòaⁿ, lín-pē seng sàng i chiūⁿ soaⁿ.
16	伊朗核武看現現， 準你底下十八殿， 號做科技道行淺， 鑽地飛彈袂走偏。	I-lang hu̍t-bú khòaⁿ-hiān-hiān, chún lí té-hē cha̍p-peh-tiān, hō-chò kho-ki tō-hâng chhián, chǹg-tē hui-tôaⁿ bē cháu phian.
17	中國武器較奢颺， 拍倒世界人人驚， 不時新聞一大鼎， 空想影片in較贏。	Tiong-kok bú-khì khah chhiaⁿ-iāⁿ, phah tò sè-kài lâng lâng kiaⁿ, put-sî sin-bûn chi̍t tōa tiáⁿ, khang-siūⁿ iáⁿ-phìⁿ in khah iâⁿ.
18	伊朗（I-lang）天頂攏禁飛， 若做術仔先落衰， 中國飛機來送貨， 世界各國攏共ge。	I-lang thiⁿ-téng lóng kìm poe, nā chò su̍t-á seng lo̍h-soe, Tiong-kok hui-ki lâi sàng hòe, sè-kài kok kok lóng kā ge.
19	Be-ne-ju-é-là石油田， 九成中國有先限， 到今美國半路按， 欲提資源無簡單。	Be-ne-ju-é-là chio̍h-iû chhân, káu siâⁿ Tiong-kok ū seng ān, kàu taⁿ Bí-kok pòaⁿ-lō͘ àn, beh the̍h chu-goân bô kán-tan.
20	神權政府真獨裁， 特別女性無自在， 出外素服才會使， 面am chhun目通出來。	Sîn-koân chèng-hú chin to̍k-chhâi, te̍k-pia̍t lú-sèng bô chū-chāi, chhut-gōa sò͘-ho̍k chiah ē-sái, bīn am chhun ba̍k thang chhut-lâi.
21	無照規定to該慘， khian石行刑堆山岩， 穩死袂活茹鬖鬖， 親目看著目箍澹。	Bô chiàu kui-tēng to kai chhám, khian chio̍h hêng-hêng tui soaⁿ-gâm, únsí bē oa̍h jû-sàm-sàm, chhin-ba̍k khòaⁿ tio̍h ba̍k-kho͘ tâm.
22	中國野心是真大， 毋成跤數做鱸鰻， 閣佮露西亞徛相倚， 欲佔北極咱著磨。	Tiong-kok iá-sim sī chin tōa, m̄-chiâⁿ kha-siàu chò lô͘-môa, koh kah Lō͘-se-a khiā sio óa, beh chiàm Pak-ke̍k lán tio̍h-bôa.
23	格林蘭是丹麥管， 十隻狗仔四人團， 北約路用毋是款， 川普下手先求全。	Kek-lîm-lân sī Tan-be̍h koán, cha̍p chiah káu-á sì lâng thoân, Pak-iok lō͘-ēng m̄ sī khoán, Chhoan-phó͘ hē-chhiú seng kiû choân.
24	北極若是予怹佔， 民主世界做肉墊， 傷過靠勢有風險， 武裝家己誰敢嫌？	Pak-ke̍k nā-sī hō͘ in chiàm, bîn-chú sè-kài chò bah-tiām, siong kòe khò-sè ū hong-hiám, bú-chong ka-kī siáng káⁿ hiâm?
25	因為川普一句話， 股市隨崩塗跤爬， 一暝了甲遐爾濟， 趕欲好額緊連回。	In-ūi Chhoan-phó͘ chi̍t kù ōe, kó͘-chhī sûi pang thô͘-kha pê, chi̍t mê liáu kah hiah-nī chē, kóaⁿ beh hó-gia̍h kín liân-hôe.
26	台灣人民緊覺醒， 支持藍白穩了錢， 國會創空烏白變， 倚去中國烏陰天。	Tâi-oân jîn-bîn kín kak-chhéⁿ, chi-chhî nâ pe̍h ún liáu chîⁿ, kok-hōe chhòng-khang o͘-pe̍h pìⁿ, óa khì Tiong-kok o͘-im-thiⁿ.
27	倚靠中國風險濟， 外國資金緊收回， 台商陸續攏抽退， 若無連鞭塗跤爬。	Óa-khò Tiong-kok hong-hiám chē, gōa-kok chu-kim kín siu-hôe, tâi-siong lio̍k-sio̍k lóng thiu-thè, nā bô liâm-piⁿ thô͘-kha pê.
28	黃仔國昌衰尾面， 掠準通人咧陷眠， 背骨西瓜食上緊， 自我利益算蓋真。	N̂g á kok-chhiong soe-bóe-bīn, lia̍h-chún thong-lâng leh hâm-bîn, pōe-kut si-koe chia̍h siōng kín, chūn-gó͘ lī-ek sǹg khàm chin.
29	你看中國的狀況， 一逝一路欲拍通， 世界開始欲共擋， 經濟崩敗快欲亡。	Lí khòaⁿ Tiong-kok ê chōng-hóng, chi̍t chōa chi̍t lō͘ beh phah-thong, sè-kài khai-sí beh kā tòng, keng-chè pang-pāi khoài beh bông.
30	內部軍事袂平靜， 烏白貪污掠無停， 事實按怎無一定， 若反黃帝使無情。	Lāi-pō͘ kun-sū bē pêng-chēng, o͘-pe̍h tham-u lia̍h bô thêng, sū-si̍t án-chóaⁿ bô it-tēng, nā hoán Hông-tè sái bû-chêng.
31	今看運河巴拿馬， 中國食羹眾人拍， 著緊選爿趁冗早， 政治步局美國閘。	Taⁿ khòaⁿ ūn-hô Pa-nâ-má, Tiong-kok chia̍h kiⁿ chèng-lâng phah, tio̍h kín soán pêng thàn liōng-chá, chèng-tī pō͘-kio̍k Bí-kok cha̍h.
32	閣有北極格林蘭， 北約看守攏零星， 美國基地緊來辦， 中俄先佔會袂堪。	Koh ū Pak-ke̍k Kek-lîm-lân, Pak-Iok khàn-siú lóng lân-san, Bí-kok ki-tē kín lâi pān, Tiong-Gô seng chiàm ē bē-kham.
33	國際政治大變局， 民主自由愛養育， 風險大細著斟酌， 家己親中揣侮辱。	Kok-chè chèng-tī tōa-piàn-kio̍k, bîn-chú chū-iû ài ióng-io̍k, hong-hiám tōa-sè tio̍h chim-chiok, ka-kī chhin-Tiong chhōe bú-jio̍k.
34	若提日本來做例， 國會重選重起家， 親中官員攏失勢， 氣運轉輪開始踅。	Nā the̍h Ji̍t-pún lâi chò lē, kok-hōe têng soán têng khí-ke, chhin-Tiong koaⁿ-oân lóng sit-sè, khì-ūn choán-lûn khai-sí se̍h.
35	蕭仔旭岑毋成猴， 咧講中國是伊兜， 三跤藍白欲做狗， 第一島鍊連鞭包。	Siau á Hiok-gîm m̄-chiâⁿ-kâu, leh kóng Tiong-kok sī i tau, saⁿ-kha nâ pe̍h beh chò káu, tē it tó-liān liâm-piⁿ pau.
36	不時唱聲閣會哭， 台灣寶島著愛交， 交予中國人免留， 美國心肝亂操操。	Put-sî chhiàng-siaⁿ koh ē khàu, Tâi-oân pó-tó tio̍h ài kau, kau hō͘ Tiong-kok lâng bián lâu, Bí-kok sim-koaⁿ loān-chhau-chhau.
37	國防武器袂當賣， 關稅簽約閣挨推， 美國今看毋是勢， 台灣三跤真攪家。	Kok-hông bú-khì bē-tàng bē, koan-sòe chhiam-iok koh e-the, Bí-kok taⁿ khòaⁿ m̄-sī-sè, Tâi-oân saⁿ-kha chin kiáu-ke.
38	藍白佬仔雙面刀， 這刀較鈍軟翱翱， 美國護照佗位討， 稅金準時繳曷無？	Nâ pe̍h láu-á siang-bīn-to, che to khah tūn nńg-kô-kô, Bí-kok hō͘-chiàu tó-ūi thó, sòe-kim chún-sî kiáu a̍h bô?
39	水表欲查放風聲， 睏蹛台灣美國名， 吮食台灣做狗囝， 這人世界無路行。	Chúi-pió beh chhâ pàng hong-siaⁿ, khùn tòa Tâi-oân Bí-kok miâ, chhńg-chia̍h Tâi-oân chò káu-kiáⁿ, chelâng sèkài bô lō͘ kiâⁿ.
40	關稅條件簽了媠， 毋簽敢是大憨槌， 藍白刁工欲予廢， 欲予共仔心花開。	Koan-sòe tiâu-kiāⁿ chhiam liáu súi, m̄ chhiam káⁿ-sī tōa-gōng-thûi, nâ pe̍h thiau-kang beh hō͘ hùi, beh hō͘ kiōng-á sim-hoe khui.
41	美國早知遮佬仔囝， 食銅食鐵歹名聲， 精牲無通遐歹請， 無蹔兩下是袂驚。	Bí-kok chá chai chia láu-á kiáⁿ, chia̍h tâng chia̍h thih pháiⁿ miâ-siaⁿ, cheng-seⁿ bô thang hia pháiⁿ chhiáⁿ, bô chàm nn̄g ē sī bē kiaⁿ.
42	中國獨裁敗文明， 四界唱聲攏無停， Bian-mà泰國上僥倖， 詐騙巢窟做流行。	Tiong-kok to̍k-chhâi pāi bûn-bêng, sì-kè chhiàng siaⁿ lóng bô thêng, Bian-mà Thài-kok siōng hiau-hēng, chà-phiàn châu-khut chò liû-hêng.
43	南海島國菲律賓， 漁船hŏng挵真拄真， 海沙偷挖捷快緊， 唱講南海怹相承。	Lâm-hái tó-kok Hui-lī-pin, hî-chûn hŏng lòng chin-tú-chin, hái-soa thau ó͘ chia̍p khoài kín, chhiàng kóng Lâm-hái in siong-sîn.
44	日本國會閣重選， 高市早苗閣得權， 國會過半有心願， 欲予國家閣完全。	Ji̍t-pún kok-hōe koh têng soán, Ko-chhī-chá-biâu koh tit koân, kok-hōe kòe pòaⁿ ū sim-goān, beh hō͘ kok-ka koh oân-choân.
45	聯手台灣做伙行， 中國看甲心驚驚， 好膽來拍看誰疼， 自由聯盟欲得成。	Liân-chhiú Tâi-oân chò-hóe kiâⁿ, Tiong-kok khòaⁿ kah sim-kiaⁿ-kiaⁿ, hó-táⁿ lâi phah khòaⁿ siáng thiàⁿ, chū-iû liân-bêng beh tit chiâⁿ.
46	韓國總統毋知路， 倚靠中國面烏烏， 國會阻擋今知苦， 關稅雙倍袂無辜。	Hân-kok chóng-thóng m̄ chai lō͘, óa-khò Tiong-kok bīn-o͘-o͘, kok-hōe chó͘-tòng taⁿ chai khó͘, koan-sòe siang-pōe bē bû-ko͘.
47	世界局勢著看清， 台灣的路明明明， 狗仔擋路捙跋反， 文明經濟萬世窮。	Sè-kài kio̍k-sè tio̍h khòaⁿ chheng, Tâi-oân ê lō͘ bêng-bêng-bêng, káu-á tòng lō͘ chhia-poa̍h-péng, bûn-bêng keng-chè bān-sè-kêng.
48	Mú-nih-khuk安全會議， 美國歐洲訴情誼， 守護文明閣再起， 日本喝聲無憢疑。	Mú-nih-khuk an-choân hōe-gī, Bí-kok Au-chiu sò͘ chêng-gî, siú-hō͘ bûn-bêng koh chài khí, Ji̍t-pún hoah siaⁿ bô giâu-gî.
49	中國見笑閣再唱， 眾人準備欲共tiang， 準講家己真正khiàng， 閃較邊仔去納涼。	Tiong-kok kiàn-siàu koh chài chhiàng, chèng-lâng chún-pī beh kā tiang, chún-kóng ka-kī chin-chiàⁿ khiàng, siám khah piⁿ-a khì nah-liâng.
50	戰爭會來抑袂來， 跋筶問神誰會知， 痟人發病著使歹， 文武事工先相排。	Chiàn-cheng ē lâi ia̍h bē lâi, poa̍h-poe mn̄g sîn siáng ē chai, siáu-lâng hoat pēⁿ tio̍h sái-pháiⁿ, bûn-bú sū-kang seng saⁿ-pâi.