一開始位這冊名號做是專門咧講創新的冊，冊買轉來才知是半自傳兼創業過程的心得。不止仔趣味，心適。
◎求學部份
作者的文風自然閣笑詼，定著siâⁿ袂少人的目光。咱ná讀ná回顧著家己的大學生生活、研究所生活，出社會的生活，當然無作者hiah-nî-á精彩、傳奇。總—是，予咱心肝頭有時甜蜜，有時淡薄仔後悔。
當然啦，咱嘛捌拚暝工寫程式，煞無像作者hiah執迷。咱大一聖誕舞會主動招學姐跳舞，煞無留伊的名佮電話。愛情的學分有修，總是無夠入格。學校無教的愛的藝術、éng-éng攏是愛佇家己傷別人、予別人傷的時才覺醒。凡勢，咱應該好好愛程式創造，予寫程式成做真愛（XD）。干焦你本身會使放棄程式，只要你願意，程式袂放棄你。
想著大學佮老師做專題時有一寡衝突，咱毋知老師共咱的未來排入去伊的升等規劃，造成咱畢業時雙方無一个好的尾溜。無想作者有遐濟方法會使作業得懸分，準備論文完成口試。作者文章內底有濟濟生存技巧攏是咱佇做學生時，攏毋捌想過--ê。這溝通的技巧佇學校無學著，無法度判斷雙方的利益精差，出社會是真食虧的。
嘛想起考完GRE煞毋敢申請國外大學，濟濟因素háⁿ家己。後來有機會短期去國外出差攏著把握機會去補足這遺憾。佮世界各國的精英學習這代誌，咱攏是出社會了，增加家己的閱讀才有發生的。
這本冊求學的部份，非常適合佇大學生抑是欲準備出國讀冊的人來讀。當然時代leh變化，現此時，網路頂的學習百百款，有心欲佮上厲害的老師學嘛免出國ah。
◎工業界部份
佇業界，博士的名聲的確佮作者所講的仝款，閣不止仔有路用，講話會較大聲。咱就捌幾ā擺的經驗，無論是空降來的博士做咱的長官。電子業真闊，誰知大頭家袂輸認捌博士攏捌。新官上任三把火，致使一流的人聽二流的人，三流的人出一支喙曲跤撚喙鬚。
亞洲人的溝通問題，抑是攏愛扶國外，無愛國內家己的物，國際觀…等等的問題。作者攏用一款笑詼的氣口來講。伊做一个創業老闆，愛台灣的公民嘛向望這土地有所進步。
伊所講著負面的代誌，跳樓、bussiness models、哭枵…等等，咱感覺攏是咧講咱的前前大頭家。非常符合咱所遇著的狀況。
咱嘛佇電子業界15-6冬。以咱有限的工作經驗，佮目前的政治局勢來看，有影是遇到佮中國相關事業的客戶就是愛緊閃。毋是會無頭路，無，就是規碗hŏng捀去。
若是阮欲共人推薦佗一篇予--人，我會推薦「我們真的關心勞工嗎？」
這佮咱的觀察嘛仝款。咱真少看同事會去佮掃地的阿姨阿桑去拍招呼抑是盤撋。人人直直講的創意，佇實際做工課是真少的，嘛無偌濟通做。創意兩字已經予咱過頭翻譯佮烏白用ah。就算是台積電，聯發科的員工嘛毋是百分之一百攏咧做創意的穡頭。
予阮感覺幫chān上大的是「危機的處理方式」佮軟體工程「divide and conquer」 的分拆思維。無論是讀冊抑是工課上，咱落尾發現濟濟攏佮行為心理學有牽連。佮查理蒙格所講的去建立多元思維，繼續學習攏無脫離。
最後，阮推薦《反叛-改變世界的力量》成做即本冊的對照。親像博士地位抑是職位地位的話語權的討論，抑是放棄博士去創業即本冊攏有相關的案例參考。
（ps. 林董毋知敢有興趣做台語語言教學軟體無。）
1190字，小寡讀冊記錄
