向望成做一个chhōa頭改變ê平台
台文通訊30歲？欲寫一篇文來慶祝，chit件代誌直直khǹg tī心肝。總--是，代誌積了siōⁿ濟，soah”有意無意” 放hō͘去。是Hê-bí兄看會起招咱寫，koh無寫有影會袂得過。
Chit二三冬來，咱寫台語ê心態應該有變，詳細欲講變án-chóaⁿ，我mā講袂siáⁿ出來。咱最近6/26號有替成大台文系講一場講座，題目是「為啥物寫台語詩？」。有幾pái文學獎ê經驗lia̍h外，好看頭niâ，khêng-si̍t，咱無啥適合講文學。所致，咱lóng講siáⁿ？
講咱感覺台語界迷失tī家己圍ê 箍仔內。欲講chit句話有影是khò͘-siâu khò͘-siâu。Nā有先輩聽了無爽快，請諒情，mā請先kā強烈ê意識型態放下，soah讀--落-去。
Chit幾冬母語ê發展好無？我ê答應是肯定--ê。總--是，相信真濟前輩iû-goân感覺無夠。畢竟hŏng打壓hiah久ah，母語平等chhan-chhiūⁿ永遠比人khah差。咱反過來想，這敢m̄是需要時間去爭取來--ê。欲提siáⁿ-mi̍h來爭？提siáⁿ-mih來比？無論體制內外，落尾你ê實力kap話語權才是力頭。講kàu到，政治！
當然，書寫民主化是咱向望上重要ê社會運動之一。透過政治認同，親像語言發展法，設立電視台…等等，這比民間舞30冬外效果愈好，愈緊！M̄-thang學媒體lia̍h咱話骨，講這雜誌無效，死諍硬áu。無頭前民間無私ê推sak，母語m̄知消失去佗ah。
Kā看因為社群媒體進步，網路頂ê台語資源是愈來愈濟，質mā無咱想ê
hiah bái。台語歌曲ê創新有kap往過無仝款ê氣喟，整體來講愈來愈濟人願意（重新）接受母語。這當然是咱無科學性ê觀察。總--是，以台文發表ê平台來講確實濟真濟。這對台文通訊來講iah是其它母語非母語雜誌來講，敢是一種機會抑者是危機？
先講對母語發展來講，當然是好處。以母語雜誌來講，可能會hŏng取代。以華語雜誌來講，無chit款問題，因為就算hŏng取代，華語市場永遠會佇leh。何況，華語雜誌根本m̄免去煩惱語言消失ê問題。台文通訊就無仝，欲顧母語、書寫符號，書寫多元性，生活時行ê議題…等等，壓力袂少。
當然，像海翁雜誌、台文戰線、教會台文專欄、台江雜誌有固定ê寫作群，寫作策略。咱koh一kái無科學ê統計，是án-chóaⁿ寫作內容lóng無siáⁿ改變？當然，這無tiāⁿ-tio̍h是缺點。不而過，對長期hŏng打壓ê母話來講，koh隨得著tām-po̍h-á平等ê母語來講，這m̄是好狀況。
華語出版ê冊文學類敢佔有5%？我真giâu-gî，為何咱台語雜誌soah強欲9成？欲久久長長有影愛kā一寡思維（暫時）放下，才thang看清。
咱佇講座分享hō͘大學生有一重點，講來有影無siáⁿ特別。簡單ê代誌堅心直直去做是無簡單。Tī chia咱鼓舞友志--ê：增加閱讀量。欲寫就ài讀。真濟人根本就無leh讀冊，hām華語就無，是án-chóaⁿ向望來讀台語？對母語作家如果直直寫仝款議題、仝款類別ê題材愈無可能吸引人。咱寫作ê人本身敢有leh讀母語作家ê作品？抑是讀其它語言的作品？無論文學非文學。這是一个大問題，oh得講清。母語寫作應該是咱人一生上基本愛有ê「技巧」，無論你欲寫天寫地寫工課代寫生活日常ê代誌。所致，無應該束縛tī「文學手路」。
猶未想欲走就想欲飛。這咱lóng感覺是方向m̄著、欲改有影tio̍h ài增加多元閱讀。台文通訊chit點比其它母語雜誌來講，有影是做了bōe bái。咱捌看過真濟誇語作家操弄語言，用一寡文學奇巧展現伊會使寫母語，甚至tio̍h等。In敢有真正leh使用台語？無，he kan-á是伊一種choán-chia̍h ê工具niā-niā。Chit種文學性ê推sak，就失去意義ah。文學是生活一種khí-mo͘，品味。問題是咱無健全ê母語生活。
寫讀、讀寫是分袂開—ê。如果無去讀寡別人ê作品，大量閱讀，hùn-khoah書寫範圍，母語發展無可能行遠。Bóng報欲行遠，ài好好á思考。
第二點，咱kā大學生講，市場ta̍uh-ta̍uh-á起來ah，lín
ài準備hō͘好。Ài想看māi影，你為何欲修chia ê課，學chia ê理論，學了ē-tang對lín有siáⁿ改變、影響？這是真實際koh現實ê問題。為siáⁿ-mih台語歌曲做詞者目前lóng是誇語人leh得？目前發表平台hiah-nī濟，已經無純母語人ah。總--是，講母語soah有可能變成一種優勢，欲án-chóaⁿ展現？Tio̍h，he就是一種行銷。
咱看新聞屏東楓港soāiⁿ-á因為中國肺炎病毒ê in-toaⁿ soah hŏng退貨，he明明無影無跡，烏白亂鬥ê代誌。物件好食敢免行銷？物件好用，好聽敢免行銷？這「行銷」兩字，可能做社會運動者無愛聽。總--是，有時mā tio̍h愛勇敢展現，才有方法度行久長，有信心傳--落-去。語言無應該是一種商品，總—是，咱真有可能需要利用科技kap一寡行銷手法來吸引koh-khah濟人來參與。
咱無啥好慶祝ê話，kan-ta滿滿ê向望。過去真濟無參與tio̍h，未來tiāⁿ-tio̍h會作伙行，作伙行動。這應該是我siōng好ê祝福。
2021-6/27-28
