你留佇桌仔頂的紙條仔
一具佇維多利亞港浮漂的死體是我的查某囝
著算雙手雙跤予縳起來
伊嘛自由仔咧浮、自由咧泅
我是伊無路用的阿爸
緊走，咱就按呢相閃身
日頭已經無照起工起落
月娘嘛予銃聲驚甲覕--起-來
無法度倒踏的記持啥人有才調接載會牢
夢--裡，遠遠看你提雨傘遮袂著銃子雨
沃甲規身軀血獅獅
苦袂得𤆬你抽退即个發癀[1]的母土
苦袂得停止這前世業的延續
咱有偌久無作伙食飯啊
這幾工我毋敢閣看電視
你的手機仔嘛接袂通…
頂月日咱最後一擺對話攏無好聲嗽
我捌質疑這是上帝交代落來的罪罰
怪我雙手束縛向[2]腰妥協
聽見警察佇街仔路頂勝利的喊喝
凊凊采采共尊嚴擲入去漉滒糜仔[3]內
你敢知激生冷的頭面是自我防衛
因為我無愛替你收埋你的青春
戰爭強食弱是世界的定數 準講咱毋願慣勢死亡
往過的榮華已經無才調閣喘氣
上無我閣有你，你閣有我予你做靠岸
我塊共想這是一場西北雨爾爾
等雨落了，你就會轉來…
「阿爸，這是我的時代 我的主張 咱的未來
慣勢無思考是欲按怎看見自由的光
阿爸，你敢看有春天的影
留佇塗跤的血跡，這毋是寬恕的洗禮
無需要翻譯，自由是袂當喝價
當頭白日鑿鼻ê煙火共頭前的路引去地獄
我佮衝組的兄弟姐妹仝爿搝大索
彈破的目睭猶原有法度看清這獨裁的驚惶
佇記者的鏡頭內展現怹無愛致意的堅心
身軀頂的疼痛是吮食民主的證據
香港當咧流血，當咧沉落去地獄
阮祈禱序大會當理解這是一場戰爭
這毋是一場夢，咱煞姑不而終愛接載伊的重量
獅仔山頂的友--的共咱的訴求放送
向望世界現此時看見、聽見咱的心聲
欲共壓迫成做𫝏鋼[4]的意志
自由種佇心內上深的所在
拚勢用短khiuh-khiuh的青春
喊和平理性的方式替換獨裁的退讓
割破的子宮是閣一擺殖民的干證
緊，著趁今暗截稿進前敨放心肝內燒怫怫的手尾字
反擊刺夯夯的橫霸
位大樓hőng車落來[5]的友志
用靈魂應答向望的救贖
準講佇歷史的壁角猶原顯目
硬插的性命猶原四界開花
阿爸，我的掛礙敢通成做你的諒解？」
我的囝，我tsín才聽著
聽著你的祈禱，自由的風敢會是來引𤆬
𤆬開這深lòng-lòng睏袂飽眠的日子
我迒[6]入去你對我的向望 看見
你久見的笑容 起來咱父仔囝作伙勇敢
這落雨的勢面有影真大，我知你袂閣轉來
是我赤裼裼[7]的軟汫綴袂著你猛掠的速度
總--是，即擺我會徛--出-來
佮你作伙共烏黔黔[8]的專制裂--開
擔頭弓起來起做自由的粗胚
歷史的幽魂閣再精神、死亡毋是一種慣勢
咱袂閣為著空想的未來相信暴力後會有平和
來，共身軀拭予焦 咱做一个約束
搝搦絪纏的情份就留佇街仔路
起義者的獻祭終其尾喊醒沈眠的公義
袂完成的革命定著行向後世...阿爸替你行
註：記香港友人■■佮怹查某囝反送中的遭遇佮過程。
